Watchtower ONLINE LIBRARY
Watchtower
ONLINE LIBRARY
Ponapean
  • PAIPEL
  • SAWASEPEN PAIPEL KAN
  • MIHTING KAN
  • br5 pp. 13-16
  • Sohte Tehtehn Mahwen Ehu Pahn Kak Kauweiukala

Sohte kasdo ong met

Kupwurmahk, mehkot sapwung en kihda kasdo

  • Sohte Tehtehn Mahwen Ehu Pahn Kak Kauweiukala
  • Iren Onop kan ong Kahn Iroir 5—2007
  • Sawaspen Oaralap kan
  • Ire kan me Duwehte Met
  • Sehdan Kin Wiahda Tehtehn Mahwen kan, Ahpw E Sohte Kin Pweida
  • Karaun Likamw kan Kin Pasapengla
  • Serusalem—“Takai Toutou Ehu”
  • Koht Pahn Ketin Doarehla “Impwal en Suda”
  • Ire Kesempwal akan Sang nan Pwuhken Akkai oh Sekaraia
    Kahn Iroir Pakpakairki Wehin Siohwa—2007
  • Werennansapw kan oh Nihn Ehu Wia Perepomw
    Kahn Iroir Pakpakairki Wehin Siohwa (Ong Onop)—2017
  • Pehmwail Kan En Kehlail
    Kahn Iroir Pakpakairki Wehin Siohwa—2006
  • Mi nan Wahu en Poadoandoar me Siohwa Ketikihda
    Kahn Iroir Pakpakairki Wehin Siohwa—2013
Iren Onop kan ong Kahn Iroir 5—2007
br5 pp. 13-16

Sohte Tehtehn Mahwen Ehu Pahn Kak Kauweiukala

“Sohte tehtehn mahwen ehu pahn kak kauweiukala.”​—AISEIA 54:17.

1, 2. Iaduwen ekspiriens kan en Sounkadehdehn Siohwa kan nan Albania kin kasalehda mehlelpen Aiseia 54:17?

SANG nan pahr 1940 samwa lel 1990, mie pwihn en Kristian kommwad ehu me kin kousoan nan ehu kisin wehi limwahn nahna kan nan Europe. Arail koperment me sohte kin kamehlele Koht kin wia uwen me re kak en kasohrehirailla. Ahpw, lokolok, selidi nan wasahn kalokolok, oh karaun likamw kan sohte kak kasohrehirailla. Ihs irail? Sounkadehdehn Siohwa kan nan Albania. Mendahki e inenen apwal en tuhpene oh kalohk, arail nannanti erein sounpar tohto kin kalinganahla padahk en Kristian oh wahdo kaping ong mwaren Siohwa. Nan pahr 2006 ni kasarawi en arail imwen branch ohpis kapw kan, emen Sounkadehde lelepek men me kin papah ahnsou reirei koasoia: “Sohte lipilipil ia uwen laud Sehdan pahn nannanti, e pahn ahnsou koaros luhs oh Siohwa pahn ahnsou koaros ketin kana!”

2 Soahng pwukat koaros kin wia mehn kadehdehpen mehlel en sapwellimen Koht inou ong sapwellime aramas akan me kileldi nan Aiseia 54:17 me mahsanih: “Sohte tehtehn mahwen ehu pahn kak kauweiukala; oh ke pahn kak sapeng koaros me kin kedipeiuk.” Poadopoad kin kasalehda me sohte mehkot me ahn Sehdan sampah pahn kak wia en irehdi sapwellimen Siohwa ladu kan en wia kaudok mehlel.

Sehdan Kin Wiahda Tehtehn Mahwen kan, Ahpw E Sohte Kin Pweida

3, 4. (a) Soahng dah kan me ahn Sehdan tehtehn mahwen kan kin pidada? (b) Ni ahl dahieu ahn Sehdan tehtehn mahwen kan sohte kin pweida?

3 Tehtehn mahwen kan ong tohnkaudok mehlel kan kin pid soahng pwukat duwehte en irehdi arail doadoahk, wia tiahk lemei ong irail, salihiraildi nan imweteng, oh en ‘kamanahla kosonned sapahrek.’ (Mel. 94:20) Ni mehlel, nan ekei sahpw kan, ni ahnsou me Sounkadehdehn Siohwa kan wia onohnop artikel wet, irail Kristian mehlel kan kin “lokolongki” arail lelepek ong Koht.—Kaud. 2:10.

4 Karasepe, ehu branch ohpis en Sounkadehdehn Siohwa kan ripohtki me nan sounpar ehute, pak 32 me sapwellimen Koht ladu kan lelohng tiahk lemei ni ahnsou me irail kin iang doadoahk en kalohk. Patehng met, pak 59 me police koledi Sounkadehde kan​—me pwulopwul oh me mah, ohl oh lih—​me kin iang doadoahk en kalohk nan wasa kan me ong wasahn wehi pokon. Ekei irail kileldi oh wiahda kilel en sendin pehrail, oh selidi nin duwen loallap kan. Police ko pil kin wia tiahk lemei ong Sounkadehde teikan pwehn kamasak irail. Pil nan ehu sahpw, mie pak tohto sang 1,100 me kileldi nan rekord me pid Sounkadehdehn Siohwa kan me selidi, anahne pwain, de ale kamakam. Soahng wet pil wiawi pak tohto sang 200 ni rahn me irail kohpene pwehn wia katamanpen kamatalahn Sises! Ahpw, sapwellimen Siohwa ngehn sarawi kin sewese irail pwehn dadaurete mendahki soangen kahpwal pwukat, nan soangen wasa pwukat oh pil nan sahpw teikan. (Sek. 4:6) Lingeringer laud en imwintihti kan sohte pahn kak kauhdi irail akan me kin kapinga Siohwa. Ei, kitail kin kamehlele me sohte soangen tehtehn mahwen ehu kak kauwehla kupwuren Koht.

Karaun Likamw kan Kin Pasapengla

5. Soangen karaun likamw dah kan kin wiawiong sapwellimen Siohwa ladu lelepek kan nan mwehin tepin Kristian akan?

5 Aiseia kohpadahr me sapwellimen Koht aramas akan pahn sapengla soangen karaun likamw kan me pahn wiawiong irail. Nan mwehin tepin Kristian akan, imwintihti kan kin kalapw karaun likamwih Kristian akan oh wiahkin irail aramas loallap kei. Mahsen kan me dierek nan Wiewia 16:20, 21 iei ehu karasepen soangen karaun likamw pwukat: “Ohl riemenet . . . wiadahr me suwed nan atail kahnimw wet. Ira kin padapadahngki tiahk kan me kin uhwong atail kosonned; kitail mehn Rom, eri, kitail sohte kak en idawehn tiahk pwukat.” Pil ehu ahnsou, irail me uhwong kan kamwakidada kaun en arail kahnimw kan en pil uhwong sapwellimen Krais tohnpadahk kan oh nda: “Ohl akat kapingadahr wasa koaros! Eri met, ira pil kodohr nan atail kahnimw wet; oh . . . Irail koaros kin kaukauwe en Sihsar kosonned akan.” (Wiewia 17:6, 7) Irail me kin uhwong Pohl kin nda me ih “me keper oh kedirepw” oh e tapihadahr moromor kei “nan sampah pwon.”​—Wiewia 24:2-5.

6, 7. Ia ehu ahl me Kristian mehlel akan kin sapeng karaun likamw me wiawiong irail?

6 Duwehte met, imwintihti kan kin nantihong en kauwehla eden Kristian mehlel kan sang ni ar kin karaun likamwih irail. Iaduwen kitail kin sapeng soangen karaun likamw pwukat?​—Ais. 54:17.

7 Soangen karaun likamw pwukat kin kalapw sansalda me likamw pwehki wiewia mwahu en Sounkadehdehn Siohwa kan. (1 Pit. 2:12) Ni ahnsou me Kristian akan kin kasalehda me re kin peikiong kosonned kan oh kolokol tiahk mwahu oh uhdahn nsenohki mouren aramas teikan, met kin kasalehda me karaun pwukat likamw. Atail wiewia mwahu kin kasalehda duwen atail pwung. Ni ahnsou me aramas akan kin kilang atail wiewia mwahu kan, met kin kalapw kamwakid irail en kapinga Samatail nanleng oh pohnese me elen mour en sapwellime aramas akan mwahusang arail.​—Ais. 60:14; Mad. 5:14-16.

8. (a) Ekei ahnsou, dahme kitail pahn anahne wia pwehn pere atail pwung me poahsoankihda Paipel? (b) Duwehte Krais, iaduwen atail kin sapeng karaun likamw kan?

8 Patehng atail wiewiahn Kristian kan, ekei ahnsou kitail pahn anahne eimah oh pere atail pwung me poahsoankihda Paipel. Ehu ahl en wia met iei en peki sawas sang koperment oh mwoalen kopwung kan. (Est. 8:3; Wiewia 22:25-29; 25:10-12) Ni ahnsou me Sises ketiket pohn sampah, ekei pak e kin ketin kapwungala irail akan me kin kauwe ih, oh kin ketin kasalehda me dahme irail kin nda me likamw. (Mad. 12:34-37; 15:1-11) Duwehte Sises, kitail kin isaneki ahnsou mwahu kan pwehn kawehwehiong meteikan ni sansal duwen dahme kitail kin uhdahn kamehlele. (1 Pit. 3:15) Kitail en dehr mweidohng iangatail tohnsukuhl kan de tohndoadoahk kan de kisehtail kan me kin kauwe kitail en kauhdi atail kin kalohki padahk mehlelo duwen Mahsen en Koht.​—2 Pit. 3:3, 4.

Serusalem—“Takai Toutou Ehu”

9. Mehnia Serusalem me “takai toutou ehu” me kileldi nan Sekaraia 12:3 kin mwete, oh ihs me kin wiliandi takai wet pohn sampah?

9 Kokohp en Sekaraia kin kasalehda dahme kahrehda wehi kan kin uhwong Kristian mehlel kan. Tehk dahme Sekaraia 12:3 mahsanih: “Ni ahnsowo eh pahn leledo, I pahn wiahkihla Serusalem duwehte takai toutou ehu.” Mehnia Serusalem me kokohp wet kin koasoia duwe? Kokohp en Sekaraia me pid duwen Serusalem kin doakedoake “Serusalem en nanleng,” iei Wehin nanleng me Kristian me keidi kan pahn iang. (Ipru 12:22) Kisin pwihn ehu me wia luwen irail akan me pahn sohsohki Wehin Mesaia mihmihte sampah ni ahnsouwet. Irail oh iangarail “sihpw teikan” kin kangoange aramas akan en iangala irail me kin mih pahn kaundahn Wehin Koht isaneki eh mih miehte ahnsou. (Sohn 10:16, NW; Kaud. 11:15) Iaduwen wehi kan mwekidki luhk wet? Soangen utuht dahieu Siohwa kin ketikihong tohnkaudok mehlel kan nan atail ahnsou? Kitail pahn tehkpene ire wet sang ni atail pahn kasawih mouren Sekaraia irelaud 12. Met pahn kak kihong kitail mehn kamehlel ong me ‘sohte tehtehn mahwen ehu pahn kauwehla’ sapwellimen Koht aramas me keidi kan oh iengerail me inouda kan.

10. (a) Dahme kahrehda sapwellimen Koht aramas akan kin lelong uhwong kan? (b) Dahme kin wiawiong irail akan me kin song en kihsang “takai toutou ehu”?

10 Sekaraia 12:3 kin kasalehda me wehi kan pahn “ohla.” Iaduwen met wiawi? Koht ketin koasoanehdier me rongamwahu en Wehio pahn lohkiseli. Sounkadehdehn Siohwa kan kin uhdahn kapwaiada arail pwukoa en kalohk. Ahpw, pakpakairki me Wehio ihte koapworopwor en aramas akan kin wia “takai toutou ehu” ong wehi kan. Wehi pwukat kin song en irehdi doadoahk wet sang ni arail kin lidere irail sounkalohk kan en Wehio. Sang ni arail kin wia met, wehi kan me kin lidere doadoahk en kalohki Wehio kin ale “ohla” ni ahl tohto. Adarail kin ohla pwe re sohte kin pweida. Irail sohte kak kauhdi tohnkaudok mehlel kan, me kin kesempwaliki pwais en pakairki “rongamwahu poatopoat” en Wehin sapwellimen Koht Mesaia mwohn imwin koasoandi wet eh pahn leledo. (Kaud. 14:6) Ni ahnsou me emen silepen imweteng nan ehu sahpw nan Aprika kilangada tiahk lemei me wiawi ong sounkadehdehn Siohwa kan, e koasoia met: ‘Kumwail kin kauwehla mwahl amwail kehl en nannantihong kaloke aramas pwukat. Irail sohte pahn wekila. Re pahn wie tohtohlahte.’

11. Iaduwen Koht kin ketin kapwaiada sapwellime inou me kileldi nan Sekaraia 12:4?

11 Wadek Sekaraia 12:4. Siohwa ketin inoukihda me e pahn ketin kahrehiong irail akan me kin uhwong sapwellime sounkalohk eimah kan en Wehio ren maskunla oh “pweipweila” ni karasaras. E kin ketin kapwaiada sapwellime mahsen kan. Karasepe, nan ehu sahpw me kaudok mehlel kin irairdi, irail me uhwong kan sohte kak irehdi sapwellimen Koht aramas akan en ale sawaspen Paipel kan. Ehu nuhspehpa koasoia me Sounkadehdehn Siohwa kan kin doadoahngki pwuhseng kan en wahdo sawaspen Paipel kan nan sahpwo! Sapwellimen Koht inou ong sapwellime ladu lelepek kan kin uhdahn pweida: “I pahn kupwurehda pwe nein ar imwintihti kan oahs kan en maskunla.” Imwintihtih kan en Wehio kin pingada oh mwakarada oh sohte wehwehki dahme re kak wia. Ahpw kitail kin kamehlele me Siohwa pahn ketin doarehla sapwellime aramas akan nin duwen ehu pwihn oh nsenohki arail mour.​—2 Nan. 6:15-19.

12. (a) Ni ahl dahieu Sises ketin saunda kisiniei ni ahnsou me e kin ketiket pohn sampah? (b) Iaduwen me keidi kan kin saunda kisiniei ni karasaras, oh dahme met kin imwikihla?

12 Wadek Sekaraia 12:5, 6. Irail me wia “kisehn peneinei en Suda” kan iei irail akan me kin apwahpwalih sapwellimen Koht aramas akan. Siohwa ketin kamwakid irail en ngoangki laud mehkan me pid sapwellime Wehio. Ehu ahnsou, Sises mahsanihong sapwellime tohnpadahk kan: “I kohdo pwe I en saunehng sampah kisiniei.” (Luk 12:49) Mehlel, e ketin saunda kisiniei ni karasaras. Pwehki Sises ketin ngoangki wia doadoahk en kalohk, padahk en duwen Wehin Koht kin wia sapwellime oaralap me keieu kesempwal. Met kin kamwakidada akamai laud en wiawi nanpwungen mehn Suhs akan. (Mad. 4:17, 25; 10:5-7, 17-20) Duwehte Sises, irail akan me kin idawehn Krais nan atail ahnsou kin “duwehla kisiniei nanwel de nan mwetin wahnsahpw ehu me mahier,” re kin saunda kisiniei ni karasaras. Nan pahr 1917, pwuhken The Finished Mysterya (Padahk Kapwonopwon Riro Kaimwiseklahr) uhdahn kasansalehda mwalaun en pwihn kan me kose irail Kristian akan. Met kin kahrehiong arail kaun akan en lingeringerda. Ni ahnsou kerendo kan, Kingdom News No. 37 me oaralap mahsanih “Imwin Sarawi Likamw Kerendohr!” kin kamwakidada aramas tohto en wiahda pilipil ma iei re pahn utungada Wehin Koht de re pahn uhwongada.

Koht Pahn Ketin Doarehla “Impwal en Suda”

13. Dahme lepin lokaia kan “impwal en Suda” kin kasalehda, oh dahme kahrehda Siohwa kin ketin doareirailla?

13 Wadek Sekaraia 12:7, 8, NW. Nan Israel en mahs, aramas akan kin kalapw doadoahngki impwal kan, keieu irail silepen sihpw kan oh soumwet kan. Soangen aramas pwukat pahn keieu mih nan keper oh anahne pereparail ma imwintihti kan pahn kohdo mahweniong kahnimw en Serusalem. Lepin lokaia kan “impwal en Suda” kin kasalehda me ni karasaras, me keidi kan nan atail ahnsou kin mih nan mohs, wasa me sohte mie pereparail, kaidehn nan kahnimw kehlail kan. Ih wasa me re kin ni eimah apwahpwalih mehkan me pid Wehin Mesaiao. Siohwa pahn ketin doarehla “impwal en Suda mahs” pwehki irail me Sehdan kin nantihong en kauwehla.

14. Iaduwen Siohwa kin ketin pere irail me kin mih nan “impwal en Suda” oh doareirailla sang dipekelekel?

14 Ni mehlel, poadopoad kin kasalehda me Siohwa kin ketin pere irail me meninkeder keidi kan en Wehio nan arail “impwal kan” nan mohs ni karasaras.b E kin ketin doareirailla sang “dipekelekel,” kahrehiong irail en kehlail oh eimah duwehte Depit, me kin wia nanmwarki oh sounpei men.

15. Dahme kahrehda Siohwa “pahn kamwomwala wehi koaros,” oh iahd me e pahn ketin wia met?

15 Wadek Sekaraia 12:9. Dahme kahrehda Siohwa “pahn kamwomwala wehi koaros”? Pwehki irail kin kaukaule uhwong Wehin Mesaia. Pwehki re kin mwamwahleki oh kaloke sapwellimen Koht aramas akan, irail anahne ale kadeikparail. Ni ahnsou keren, irail akan me kin papah Sehdan pohn sampah pahn wia kaimwiseklahn mahwen ong sapwellimen Koht tohnkaudok mehlel kan, oh met pahn kahluwa sampah ong irair ehu me Paipel kin kahdaneki Armakedon. (Kaud. 16:13-16) Sounkopwung Lapalapo pahn mwekidki uhwong wet oh pere sapwellime ladu kan oh kasarawihla mware nanpwungen wehi kan.​—Esek. 38:14-18, 22, 23.

16, 17. (a) Ia “sohsohn sapwellimen Siohwa ladu kan”? (b) Dahme atail kin dadaurete pahn uhwong kan sang rehn Sehdan kin kasalehda?

16 Sohte ahn Sehdan tehtehn mahwen me kak kaluwetala pwoson oh ngoang en sapwellimen Koht aramas akan nin sampah pwon. Popohl me kitail kin ahneki pwehki atail ese me Siohwa kin ketin sewese kitail ki sapwellime manaman iei “sohsohn sapwellimen Siohwa ladu kan.” (Ais. 54:17, NW) Sohte emen kak adihasang kitail popohl oh irair mwahu me kitail kin ahneki. (Mel. 118:6) Sehdan pahn nantihongete en kamwakid uhwong kan oh kahpwal kan en lelohng kitail. Atail lelepek oh dadaurete pahn kahpwal pwukat kin kasalehda me kitail kin ahneki sapwellimen Koht ngehn. (1 Pit. 4:14) Rongamwahu en sapwellimen Siohwa Wehio kin lohkiseli nan sampah pwon. Sapwellimen Koht aramas akan kin lelohng uhwong kan me kin song en kauhdi arail doadoahk en kalohk. Ahpw pwehki Siohwa kin kakehle sapwellime aramas akan, eri irail kak powehdi soangen uhwong pwukat. (Sek. 9:15) Luwen me keidi kan oh iengerail me lelepek kan sohte pahn uhdihsang arail doadoahk!

17 Kitail kin kasikasik ahnsou me kitail pahn uhdahn pitsang ahn Sehdan uhwong kan. Ia uwen kansenamwahu atail kin ahneki mehn kamehlel me ‘sohte tehtehn mahwen ehu pahn kak kauweikitailla, oh kitail pahn kak sapeng koaros me kin karaun likamwih kitail’!

[Footnotes]

a Sounkadehdehn Siohwa kan me wiahda, ahpw met solahr kin wiawihda.

b Ong kalaudepen ahmw wehwehki ire pwukat, menlau wadek pwuhken Jehovah’s Witnesses​—Proclaimers of God’s Kingdom (Sounkadehdehn Siohwa kan—Sounkalohk en Wehin Koht akan), pali 675-6, me Sounkadehdehn Siohwa kan me wiahda.

Iaduwen Ke Pahn Sapeng?

• Dahme kin kasalehda me ahn Sehdan tehtehn mahwen sohte kin pweida?

• Iaduwen Serusalem en nanleng kin wia “takai toutou ehu”?

• Iaduwen Siohwa kin ketin doarehla “impwal en Suda”?

• Ni atail kin kerkerenlahng Armakedon, dahme kitail kin uhdahn kamehlele?

    Pwuhk kan en lokaiahn Pohnpei (1987-2025)
    Log Out
    Log In
    • Ponapean
    • Share
    • Me Ke Mwahuki
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Log In
    Share