Dahme Kin Wiahiong Mour en Katapan?

“Lemmwiki Koht, oh kapwaiada sapwellime mahsen.”—EKL. 12:13.

1, 2. Iaduwen kitail kak paiekihda audepen pwuhken Eklesiasdes?

MEDEWEHLA duwen ohl emen me mwomwen ahneki soahng koaros. Ih soun politik ndand men, me keieu kepwehpwe pohn sampah, oh me keieu loalokong nanpwungen eh dih. Mendahki e wiahda soahng tohto nan eh mour, e ahpw pein idek reh, ‘Dahme kin wiahiong mour en katapan?’

² Soangen ohl menet uhdahn mie—e momour nin sampah mpen sounpar silikid samwalahro. Eden ohlo iei Solomon, oh pwuhken Eklesiasdes kin kasalehda mwomwen eh kin rapahki mour nsenamwahu. (Ekl. 1:13) Kitail kak sukuhliki ire kesempwal tohto sang mour en Solomon. Ni mehlel, erpit me dierek nan pwuhken Eklesiasdes kak sewese kitail en wiahda mehn akadei kan me pahn wiahiong atail mour en uhdahn katapan.

“Pwakipwakih Kisinieng”

3. Ire dahieu me pid duwen atail mour kitail koaros kin lelohng?

³ Solomon kin kawehwehda me Koht ketin kapikada soahng kaselel tohto pohn sampah—me inenen kapwuriamwei me kitail kak paieki kohkohlahte. Ahpw, kitail sohte kak uhdahn wehwehki sapwellimen Koht kapikipikda kan pwehki atail mour nohn mwotomwot. (Ekl. 3:11; 8:17) Nin duwen me Paipel mahsanih, atail mour mwotomwot oh kin mwadang imwisekla. (Sohp 14:1, 2; Ekl. 6:12) Ire wet anahne kamwakid kitail en doadoahngki atail mour ni ahl me konehng. E sohte mengei en wia met pwehki koasoandi en Sehdan kin kaweidih kitail en wiahda pilipil sapwung.

4. (a) Ia wehwehn lepin lokaia “sohte katepe”? (b) Soangen wiewia dah kan nan mour kitail pahn tehkpene?

⁴ Pwehn kasalehda keper en doadoahngki atail mour ni ahl me sapwung, Solomon kin doadoahngki lepin lokaia “sohte katepe” oh lepin lokaia teikan me duwehte met mpen pak 30 nan pwuhken Eklesiasdes. Lepin lokaiahn Ipru me kawehwehdiong “sohte katepe” kin pid mehkot mwahl de sohte mehkot kesempwal me kak dadaur ahnsou reirei. (Ekl. 1:2, 3) Ekei pak Solomon kin karasahiong mehkan me “sohte katepe” ong “pwakipwakih kisinieng.” (Ekl. 1:14; 2:11) E sansal me pwakipwakih kisinieng mehkot mwahl. Emen me kin wia met sohte pahn kak koledi mehkot. Raparapahki mehn akadei kan me sohte konehng pahn wahdo nsensuwed me duwehte pwakipwakih kisinieng. Pwehki atail mour nan koasoandi wet kin nohn mwotomwot, kitail en dehr kesehla mwahl ong raparapahki mehkan me sohte katepe. Pwe kitail en dehr wiahda soangen pilipil kan me sapwung, kitail en tehkpene ekei karasepe kan me Solomon kihda me pid duwen dahme aramas tohto kin raparapahki. Nan artikel wet, kitail pahn keieu tehkpene duwen raparapahki peren en sampah oh kepwe kan. Mwurin mwo, kitail pahn tehkpene duwen kesempwalpen soangen doadoahk kan me kin kaperenda Koht.

Raparapahki Mehn Kamweit kan Kak Kihong Kitail Nsenamwahu?

5. Soangen peren dah kan Solomon kin rapahki?

⁵ Duwehte aramas tohto rahnwet, Solomon pil kin song en diarada nsenamwahu sang ni eh kin raparapahki mehn kamweit kan. E ripohtki: “I sohte soikala peren ehu en paliwereiet.” (Ekl. 2:10) Soangen peren dah kan e kin rapahki? Eklesiasdes irelaud 2 kin kasalehda me e kin ‘kapereniheki paliwere wain’—ahpw e sohte kin daulihala—oh raparapahki soangen wiewia kan duwehte wiahda mwetuwel kan, kauwada ihmw kan nan eh tehnpaso, rongorong keseng kan, oh kangkang mwenge iou.

6. (a) Dahme kahrehda e sohte sapwung en ahneki ahnsou mwahu nan mour? (b) Me pid duwen mehn kamweit, iaduwen kitail pahn kasalehda toupahrek?

⁶ Paipel kin keinepwihsang kitail en ahneki ahnsou mwahu rehn kompoakpatail kan? Uhdahn soh. Karasepe, Solomon kin koasoia me kangkang mwenge nan irair kansenamwahu mwurin doadoahk laud en rahn ehu iei kisakis sang rehn Koht. (Wadek Eklesiasdes 2:24; 3:12, 13.) Patehng met, Siohwa kin ketin kangoange me pwulopwul kan en ‘pereperen oh wia dahme irail inengieng’ ni ahl me konehng. (Ekl. 11:9) Kitail anahne ahnsoun kommoal oh mehn kamweit. (Pil kilang Mark 6:31.) Ahpw, mehn kamweit en dehr wia mehkot me keieu kesempwal nan atail mour. Ni pali teio, mehn kamweit anahne duwehte keik me kitail kin kang mwurin mwenge, ah kaidehn uhdahn mwenge. Ke pahn pwungki me mendahki ma ke kin iouki keik, ahpw ke pahn pwangahkihda ma ihte keik me ke pahn kangkang, oh met sohte pahn mwahu ong paliweromw. Duwehte met, Solomon kin diarada me mour me kin poahsoankihda peren en paliwar kin rasehng “pwakipwakih kisinieng.”—Ekl. 2:10, 11.

7. Dahme kahrehda kitail anahne pilada mehn kamweit kan ni keneinei?

⁷ Oh pil, kaidehn mehn kamweit koaros kin konehng kitail en wia. Mehn kamweit tohto kin inenen suwed—me kak kauwehla atail nanpwungmwahu rehn Siohwa oh pil kamwakid kitail en iang wiewia samin kan. Ia uwen tohtohn aramas akan kin loiong kahpwal kan pwehki irail men ‘ahneki ahnsou mwahu’ oh doadoahngki wini en kasahliel kan oh kamam sakau oh iang pilein mwohni? Ni elen kadek, Siohwa kin ketin kaweidih kitail pwe ma kitail pahn mweidohng mohngiongitail de mesetail en kahrehiong kitail en men wia soahng kan me keper, kitail pahn lelohng imwila suwed kan.—Kal. 6:7.

8. Dahme kahrehda e konehng kitail en doudouloale duwen elen atail mour?

⁸ Patehng mepwukat, ma kitail pahn rapahki mahs mehn kamweit kan nan atail mour, e pahn irehdi kitail sang mehkan me uhdahn kesempwal. Tamanda, me atail mour kin mwadang imwisekla oh kitail sohte ese ma kitail pahn ahnsou koaros ahneki roson mwahu oh sohte pahn lelohng kahpwal kan. Ihme kahrehda Solomon doula oh koasoia me kitail ele pahn paiekihda laud ni atail pahn kohla ni mehla—keieu mehlahn riatail brother de sister lelepek men—sang en kohla ni imwen “kamadipw ehu.” (Wadek Eklesiasdes 7:2, 4.) Pwekida? Pwehki sang ni atail kin rong kapahrek en mehla oh doudouloale duwen elen mour en sapwellimen Siohwa ladu lelepek men me ahpwtehn melahr, met pahn kak kamwakid kitail en kasawih pein atail elen mour. Met pahn ele kamwakid kitail en koasoanehdi en wekidala atail mehn akadei kan pwehn doadoahngki atail luhwen mour ni ahl me konehng.—Ekl. 12:1.

Kepwe kan Pahn Kihong Kitail Nsenamwahu?

9. Dahme Solomon kin diarada duwen ahneki kepwe kan?

⁹ Solomon iei ohl me keieu kepwehpwe pohn sampah ni ahnsou me e ntingihdi pwuhken Eklesiasdes. (2 Kron. 9:22) E ahneki soahng kan me kak elehieng ih en ale soahng koaros me e mwahuki. E ntingihdi: “Mehkot me I kin anahne, I kin ale.” (Ekl. 2:10) Ahpw e kin diarada me en ihte ahneki kepwe kan sohte pahn wahdo nsenamwahu. E koasoia: “Ma ke pahn poakohng mwohni, ke sohte mwahn pahn itarki; ma ke inengieng kepwehpwehla, ke sohte kak alehdi mehkoaros me ke anahne.”—Ekl. 5:10.

10. Dahme kin wahdo nsenamwahu mehlel oh kepwe mehlel kan?

¹⁰ Mendahki kepwe kan kin katapan kisin ahnsou kiste, aramas tohto men kepwehpwehla. Nan roporop ehu me ahpwtehn wiawi nan United States, pahkis siluh en tohnsukuhl kan en university kasalehda me arail mehn akadei nan mour iei en “kepwehpwehla.” Ahpw iaduwe, ma re pahn lel arail mehn akadei wet, re pahn uhdahn nsenamwahu? Soh. Irail me kin wia roporop kan kin diarada me ni ahnsou me aramas akan kin nohn kesempwaliki kepwe kan nan arail mour, met kin kerempwa irail en diarada peren oh nsenamwahu. Ahnsou werei samwalahr, Solomon eseier ire wet. E ntingihdi: “I pil koasoakedahr silper oh kohl me kohsang wasahn nekinek en wehi kan me I kaunda . . . I ahpw wehwehkihda me met sohte katepe. Met rasehng pwakipwakih kisinieng-me sohte katepe douluhl.”a (Ekl. 2:8, 11) Ni pali teio, ma kitail pahn doadoahngki atail mour ong papah Siohwa ni mohngiong unsek oh ale kapai kan sang reh, kitail pahn ahneki kepwe mehlel kan.—Wadek Lepin Padahk 10:22.

Soangen Doadoahk Dahieu Kin Wahdo Nsenamwahu Mehlel?

11. Dahme iren Paipel kan kin kasalehda duwen kesempwalpen doadoahk?

¹¹ Sises mahsanih: “Semei kin ketin doadoahk ahnsou koaros, oh pil ngehi, I uhdahn pahn doadoahk.” (Sohn 5:17) E sansal me Siohwa oh Sises kin kupwurperenki sapwellimara doadoahk kan. Paipel kin kasalehda me Siohwa kin kupwurperenki sapwellime doadoahk en kapikada mehkan oh mahsanih: “Koht eri inenen kupwurperenkihda wiepen nin lime pwukat koaros.” (Sen. 1:31) Tohnleng kan “ngisingiski ar peren” ni ahnsou me irail kilang soahng koaros me Koht ketin wiahdahr. (Sohp 38:4-7) Solomon pil kin wehwehki katapan en wia doadoahk kesempwal kan.—Ekl. 3:13.

12, 13. (a) Iaduwen aramas riemen kin kasalehda nsenamwahu me re alehdi sang ara doadoahk laud? (b) Dahme kahrehda doadoahk en mwohni kin ekei pak kahrehda kansensuwed?

¹² Aramas tohto kin ahneki soangen pepehm me re wiahda mehkot katapan ni ahnsou me re kin doadoahk laud. Karasepe, emen soun mahlen ndand me ede José koasoia: “Ni ahnsou me ke kak mahlenihada dahme ke mwahuki, ke pahn ahneki soangen pepehm duwehte ke douda pohn nahna ileile ieu.” Emen soun pesines me ede Miguelb koasoia: “Doadoahk kin kihong uhk nsenamwahu pwehki e kak kahrehiong uhk en kak apwalih ahmw peneinei. E pil kak kihong uhk soangen pepehm me ke wiahda mehkot katapan.”

¹³ Ahpw ni pali teio, doadoahk tohto sohte kin kaperen oh sohte kin kahrehiong tohndoadoahk kan en pehm me re kin wiahda mehkot katapan. Ekei pak, tohndoadoahk kan kin nsensuwedla oh lelohng kopwung sapahrek ni wasahn arail doadoahk. Nin duwen Solomon kin kasalehda, emen me dangahnga—mwein pwehki e kin kompoakepahnki irail me ahneki manaman nan wasahn doadoahk—kin ale katingpen doadoahk me emen me kin pwerisek wiahda. (Ekl. 2:21) Pil mie ekei ire teikan me kin kansensuwedih aramas akan. Ehu pesines me kin pweida mwahu nin tepio ele solahr pweida pwehki kahpwal en mwohni nan eh wehi de paisuwed wiawi. (Wadek Eklesiasdes 9:11.) Pak tohto, emen me kin nantihong pweida mwahu kin imwikihla nsensuwed pwehki e diarada me e kin mwomwen “songosong en koledi kisinieng.”—Ekl. 5:16.

14. Soangen doadoahk dahieu kin ahnsou koaros wahdo nsenamwahu mehlel?

¹⁴ Mie doadoahk ehu me sohte pahn kansensuwedih kitail? José, soun mahlen men me koasoipe kohda mwowe, koasoia: “Mwurin sounpar kei, mahlen kan kakete salongala de ohla. Ahpw met sohte kin wiawi ong mehkan me kitail kin wia ong papah Koht. Sang ni ei kin peikiong Siohwa en kalohki rongamwahu, I kin sewese meteikan en wiahla Kristian mwahu kan me kin wauneki Koht, oh met kak sewese irail kohkohlahte. Met inenen kesempwal.” (1 Kor. 3:9-11) Miguel pil nda me en kalohki rongamwahu en wehio kin kihong ih nsenamwahu me siksang eh doadoahk en mwohni. E koasoia: “Sohte mehkot kak wiliandi peren me ke kin ahneki ni ahnsou me ke kin koasoiong emen duwen padahk mehlel en Paipel oh kilang me padahk mehlelo kin kamwakid eh mohngiong.”

“Kadarala Kenomw Pilawa”

15. Dahme kin wiahiong mour en uhdahn katapan?

¹⁵ Ni kaimwiseklahn koasoipene wet, dahme kin uhdahn wiahiong mour pwe en katapan? Kitail kin ahneki nsenamwahu mehlel ma kitail kin doadoahngki ahnsou mwotomwot nan koasoandi en sampah wet pwehn wiahda me mwahu oh kaperenda Siohwa. Kitail kak kakairada atail nanpwungmwahu rehn Koht, kitail kak padahkihong neitail seri kan padahk kan en Paipel, kitail kak sewese meteikan en esehla Siohwa, oh kitail kak kakairada atail nanpwungmwahu rehn riatail brother oh sister kan. (Kal. 6:10) Soahng pwukat koaros kin mie katepe me emen pahn kak paieki kohkohlahte oh wahdo kapai kan ong irail akan me kin nantihong wia mepwukat. Solomon kin doadoahngki karasaras mwahu ehu pwehn kasalehda kesempwalpen en wiahda me mwahu. E koasoia: “Kadarala kenomw pilawa pohn pihl, oh ehu rahn ke pahn pwurehng diarada.” (Ekl. 11:1, NW) Sises ketin kangoange sapwellime tohnpadahk ko: “Kumwail kihwei, pwe kumwail en ale dupukpe sang rehn Koht.” (Luk 6:38) Oh Siohwa kin ketin pein inoukihda me e pahn katingih irail akan me kin wiahda me mwahu ong meteikan.—Lep. Pad. 19:17; wadek Ipru 6:10.

16. Iahd ahnsou me keieu mwahu en koasoanehdi dahme kitail men wia nan atail mour?

¹⁶ Paipel kin kangoange kitail en wiahda pilipil mwahu kan ni ahnsou me kitail kin pwulopwulte me pid duwen iaduwen kitail pahn doadoahngki atail mour. Ni ahl wet, kitail pahn kak pitsang sounpar kansensuwed kan en mwuhr. (Ekl. 12:1) Ia uwen e pahn kansensuwed ma kitail pahn kesehkihla ahnsou mwahu nan atail mour raparapahki peren en sampah, oh mwuhr diarada me dahme kitail kin raparapahki sohte katepe, me rasehng kisinieng!

17. Dahme pahn sewese iuk en pilada ahl me keieu mwahu nan mour?

¹⁷ Duwehte pahpa limpoak men, Siohwa kin kupwurki ken paieki mour, wiahda me mwahu, oh liksang soahng kamedek kan. (Ekl. 11:9, 10) Dahme pahn sewese iuk en wia met? Koasoanehdi mehn akadei kan me pahn kalaudehla ahmw papah Koht. Kereniong sounpar 20 samwalahro, Javier anahne pilada ma e pahn wia doadoahk pwei mwahu nan pali en wini de doadoahk en regular pioneer. E koasoia: “Mendahki doadoahk en toahkte kak kansenamwahu, sohte mehkot kak pahrekiong peren me I kin ahneki ni ahnsou me I sewese aramas akan en esehla padahk mehlel. Doadoahk en regular pioneer kin sewese ie en uhdahn paieki ei mour. Ihte me I koluhkihla iei me I sohte mwadang tepida doadoahk wet.”

18. Dahme kahrehda mour en Sises pohn sampah kin uhdahn katapan?

¹⁸ Eri, dahme kin wia mehkot me keieu kesempwal me kitail en nantihong ahneki? Pwuhken Eklesiasdes kin mahsanih: “Adamwahu mwahusang lehn wai pweilaud kan; oh rahn me ke mehla mwahusang rahn me ke ipwidi.” (Ekl. 7:1) Mour en Sises kin kasalehda mwahu ire wet. E uhdahn ketin wiahda adamwahu rehn Siohwa. Ni ahnsou me Sises pwoula ni lelepek, e ketin kalinganahda kaundahn Semeo oh wiahda meirong tomw, me ritingada elen mour ong kitail. (Mad. 20:28) Nan erein ahnsou mwotomwot me Sises kin ketiket pohn sampah, e ketin wiahda mehn kahlemeng unsek en uhdahn mour katapan me kitail anahne kahlemengih.—1 Kor. 11:1; 1 Pit. 2:21.

19. Soangen kaweid erpit dahieu Solomon kihda?

¹⁹ Kitail pil kak wiahda adamwahu rehn Koht. Ahneki adamwahu mwohn silangin Siohwa uhdahn kesempwal sang ahneki kepwe kan. (Wadek Madiu 6:19-21.) Rahn koaros, kitail kin diarada elen wiahda mehkan me mwahu mwohn silangin Siohwa oh met kin kamwahwihala atail mour. Karasepe, kitail kak ehukihong meteikan rongamwahu, kakehlailih pein atail mour en pwopwoud oh peneinei, oh kamwahwihala atail nanpwungmwahu rehn Siohwa sang ni atail kin wia pein atail onop en Paipel oh iang towehda mihding kan. (Ekl. 11:6; Ipru 13:16) Eri, ke men paieki mour me uhdahn katapan? Ma ei, ken kaukaule idawehn ahn Solomon kaweid: “Lemmwiki Koht, oh kapwaiada sapwellime mahsen, pwehki ih kahrepe wet me aramas kepikipikihda.”—Ekl. 12:13.

[Nting tikitik me mi pahs]

Iaduwen Ke Pahn Sapeng?

• Dahme anahne kamwakid kitail en medemedewe mwahu duwen atail mehn akadei kan nan mour?

• Iaduwen kitail en kilangwohng me pid en raparapahki mehn kamweit kan oh kepwe kan?

• Soangen doadoahk dahieu pahn wahdo nsenamwahu me kitail kak ahneki ahnsou kohkohlahte?

• Dahme kin wia mehkot me keieu kesempwal me kitail en nantihong en ahneki?

[Kawehwehpen kilel kan nan ehu ehu pali 28]

Dahme kin wiahiong doadoahk en kalohk en uhdahn kansenamwahu?