Sapwellimen Koht Kehl Kin Sansalda Sang Usu Kan
KETIPIN wehte pali laud en usu kan. Mendahki met, e laudsang sampah pak 330,000. Pali laud en usu kan me karanih sampah tikitiksang ketipin. Ah usu teikan, me duwehte usu me adaneki V382 Cygni, pak 27 lapala sang ketipin.
Ia uwen kehl me kin kohsang ketipin? Nna song medewe ia uwen kehl en kisiniei ehu me ke pahn kak alu mwail eisek ah ke kakete pehm karakar en kisinieio. Ketipin dohsang sampah ki mpen mwail million 93. Ahpw ni rahn akan me ketipin kin kehl, kilin aramas kin kak mpweinpihlda! Ahpw e kapwuriamwei pwe ihte lik kis ehu en kehl en ketipin me kin leledo sampah. Ahpw kisin kehl wet itar en apwalih mour pohn sampah.
Kehl en ketipino kin kohsang nan werengen ketipino ahpw ketipino inenen laud mehlel oh nan werengen ketipino inenen kekeluwak me kahrehda kehl me kohsang nan werengen ketipino anahne seiseiloaki erein sounpar million kei pwe kehl wet en kak lella ni mas likin ketipino. Web site en SEC koasoia: “Ma rahnwet me Ketipino sohla wiahda de kihda kehl wet, kitail me koukousoan pohn Sampah ahpw pahn esehda oh pehmada duwen met mwurin sounpar 50,000,000!”
Nna song medewehla duwen met: Ni ahnsou me ke kin kilangada nanleng nipwong, ke kin kilang usu kid kei, oh ehuehu usu pwukat kin kihwei soangen kehlohte me atail ketipin kin kihwei. Oh saintis kan kapatahda me mie usu billion pak billion kei me mih nan wehwe!
Iawasa usu pwukat kohsang ie? Pali laud en soun roporop kan kin pwonopwonki iaduwen sampah wet eh kak pein miehla erein sounpar billion 14 samwalahro. Paipel kasalehda ni sansal: “Nin tepio, Koht ketin kapikada lahng oh sampah.” (Senesis 1:1, New World Translation) Sohte peikasalpe me Ih me ketin kapikada usu pwukat me kin wiahda kehl kin sapwellimanki ‘manaman lapalap.’—Aiseia 40:26.
Iaduwen Koht Kin Ketin Doadoahngki Sapwellime Manaman
Siohwa Koht kin ketin doadoahngki sapwellime manaman pwehn kakehle irail akan me kin wia kupwure. Karasepe, wahnpoaron Pohl kin doadoahngki eh kehl pwehn padahkihong meteikan duwen Koht. Pohl sohte ahneki manaman, ahpw e kak wiahda me mwahu tohto mendahki uhwong laud. Iaduwe? Pein ih kamehlele me e alehdi “manaman lapalap eh uhdahn sapwellimen Koht.”—2 Korint 4:7-9.
Siohwa Koht pil ketin doadoahngki sapwellime kehl pwehn kauwehla irail akan me kin nsenki uhwong sapwellime irair pwung kan. Sises Krais ketin kasalehda duwen kasohrlahn Sodom oh Komora oh Nohlik en mwehin Noha pwehn kasalehda duwen ekei karasepen en Siohwa kin ketin doadoahngki sapwellime kehl pwehn kasohrehla me suwed akan. Sises ketin kohpada me ni ahnsou keren Siohwa pahn ketin doadoahngki sapwellime manaman pwehn kasohrehla irail akan me kin uhwong Sapwellime irair pwung kan.—Madiu 24:3, 37-39; Luk 17:26-30.
Iaduwen Met Kin Kamwakid Uhk?
Ni ahmw pahn doudouloale duwen sapwellimen Koht kehl de manaman me sansalda sang usu kan, ele ke pahn ahneki soangen pepehmohte me Nanmwarki Depit ahneki ni eh mahsanih: “Ni ei kin kilengdawohng pahnlahng, iei wiepen nin limomwi, maram oh usu kan me komw ketin koasoanedier nan dewerail—dahkot aramas, me komwi kin ketin kupwukupwure; aramas mwahl, me komwi kin ketin apwahpwalih?”—Melkahka 8:3, 4.
E kin kahrehda kitail en ahneki lamalam en aktikitik ni atail kin kilang uwen atail tikitik ah sampah inenen laud. Ahpw kitail en dehr ahneki pepehm me sohte katepatail pwehki uwen manaman me Koht sapwellimanki. Siohwa ketin doadoahngki sapwellime ngehn sarawi en kamwakid soukohp Aiseia en ntingihdi mahsen en kamweit pwukat: “E [Koht] kin ketin kakehlahda me luwet oh me pwangadahr kan. Pil me pwulopwul kan kak luwetala, oh mwahnakapw kan kak pwupwukihdi eh sohla angirail. Ahpw irail kan me kin koapworopworki KAUN-O, pahn onehda sapahl ar kehl. Re pahn kin kehlail, rasehng ikel kan; ni ar pahn kin tang, re sohte pahn pwangada; ni ar pahn kin alu, re sohte pahn luwetala.”—Aiseia 40:29-31.
Ma ke men kapwaiada kupwuren Koht, ke kak koapworopworki me e pahn ketikihwei sapwellime ngehn sarawi pwehn sewese oh kakehle iuk. Ahpw ke anahne peki met. (Luk 11:13) Ki sapwellimen Koht utuht, ke kak powehdi soangen kahpwal koaros oh alehdi kehl en wia dahme pwung.
[Kawehwehpen kilel kan nan ehu ehu pali 6]
Sang powe palimeing: Whirlpool galaxy; nanwerenge: mwutumwut en usu Pleiades; palimaun: Orion Nebula; pah palimeing: Andromeda galaxy
[Kawehwehpen kilel kan nan ehu ehu pali 6]
Ketipin laudsang sampah pak 330,000
[Kawehwehpen kilel kan nan ehu ehu pali 6]
Pleiades: NASA, ESA oh AURA/Caltech; koaros me kilelidi powe: National Optical Astronomy Observatories