Soangen Koht Dah Men Samatail me Ketiket Nanleng?
ARAMAS tohto wadlikihla Kapakap en Samat de Kapakap en Kauno me Sises ketin padahkihong sapwellime tohnpadahk kan. (Madiu 6:9-13) Ehuehu pak me re kin nda kapakap wet, re kin kamwarenki Koht “Samat.” Ahpw, meh depe me kak nda me irail uhdahn ese ih?
Iaduwen kowe? Ia uwen omw ese Koht? Ke ahneki nanpwungmwahu reh? Ke kin kasalehiong ih ni koasoi omw peren de omw nsensuwed? Ni mehlel, ia wehwehn ese Koht?
“Siohwa Iei Mware”
Ihte me kisin seri men kin esehki eh pahpa iei me ede, Pahpa. Ahpw ni eh kekeirda, e kin esehla eden eh pahpao oh dahme aramas kin ndahki eh pahpao oh e kin suweiki eh pahpao. Iaduwen Meno me kin ketikihong kitail mour? Ke ese mware oh ia wehwe?
Me tohto kin kapwukapwurehiong lepin mahsen pwukat, “Mwaromwi en sarawihla” ni ahnsou me re wia Kapakap en Kauno. Ahpw irail sohte ese pasapengpen peidek wet, “Ia mwaro?” Usuhn pahnlahng kan, nahna kaselel kan oh sehd me direkihla soangsoangen mour kan—mepwukat kin kasalehda me mie Koht. Ahpw mepwukat sohte kin padahkihong kitail mware. Ma kitail men esehla mwar wet, kitail anahne kilang nan Paipel. E mahsanih: “Siohwa iei mware.”—Eksodus 15:3, NW.
Koht kupwurki kitail en ese ih ki mware Siohwa. Dahme kahrehda? Pwehki mware kasalehda soangen Koht dahmen ih. Mwareo wehwehki “E Kahrehiong en Wiahla.” Met wehwehki me e kin ketin wiahla soahng koaros me e ketin kupwurki pwehn kapwaiada kupwure. Medewehla met: Pahpa men kin wiahla soun wahdo anahn en peneinei, soun kaweid, sounkopwung, wiliepen peneinei, silepen peneinei oh sounpadahk pwehn apwalih eh peneinei nin duwen arail anahn. Ni soangen ahlohte, mwar wet Siohwa kin kamehlelehiong kitail me Koht kak kapwaiada kupwure pwehn kapaiada koaros me kin papah ih, sohte lipilipil dahme pahn wiawi mwuhr.
Kitail kak kilang soangsoangen pwukoa kan me atail Koht limpoak kin ketin pwukoahki me kin pahrekiong wehwehn mware. Met pahn sewese iuk en kak wehwehki soangen Koht dahmen Siohwa oh dahme ke anahne wia pwe ken kak karanih ih.
“Koht en Limpoak oh Popohl”
Wahnpoaron Pohl kahdaneki Sounwiapatail “Koht en limpoak oh popohl.” (2 Korint 13:11) Dahme kahrehda? Sises mahsanih: “Pwe iei uwen Koht eh ketin loalloale sampah, me e ketikihdohki Sapwellime Iehros, pwe mehmen me kin pwosonla ih en dehr salongala, a en ahneki mour soutuk.” (Sohn 3:16) Pwehki sapwellime limpoak loal ong aramas, Koht ketikihda sapwellime Ohl kompoak nin duwen tomw ehu pwe irail akan me pwoson ih en kak ahneki mour soutuk me sohte medek oh lokolok me kin kohsang dihp. Ihme kahrehda Pohl nda: “Pweinen dihp, iei mehla; ahpw sapwellimen Koht kisakis sapan, iei mour soutuk rehn Krais Sises atail Kaun.” (Rom 6:23) Met pahn kamwakid kitail en poakohng Koht oh karanih ih.
Koht sohte kin ketin kasalehda sapwellime limpoak ongete tohnsampah nin duwen pwihn ehu ahpw pil ong emenemen me lelepek kan. Moses ndaiong mehn Israel kan en mahs me kin kalapw sapeik: “Ih duwen amwail pahn dupukohng KAUN-O, kumwail aramas sempoak oh pweipwei? Iei ih me samamwail, ih me ketin kapikkumwailda, e ketin wiahkinkumwailla wehi ehu.” (Deuderonomi 32:6) Ke wehwehki kesempwalpen mahsen pwukat? Nin duwen Sahm limpoak men, Siohwa kin ketin nsenohki sapwellime aramas kan mendahki arail soh unsek kan. Oh e ketikihda arail anahn en war, pepehm oh pil mehkan me anahn pwe ren kak kolokol nanpwungmwahu reh.
Kitail koaros kin lelohng wekidekla kan nan mour oh pwehki met, ekei ahnsou kitail kin nsensuwedla de pahtoula. Kitail kin anahne emen me kak sewese kitail en alehda madamadau pwung duwen atail irair kan oh kahpwal kan. Ihs me kak sewese kitail? Sang nan sapwellime Mahsen, Paipel, Siohwa ketin kadehdehda me ih Sounkaweid limpoak men oh wia Sounapwalih men. Pwuhk Sarawi kin kawehwehda kahrepen atail kin lelohng lokolok kan oh iaduwen kitail kak powehdi kahpwal pwukat. Duwehte pahpa limpoak men me kin sewese nah pwutak men me pwupwudi oh ohla, Siohwa kin ketin kasalehda sapwellime limpoak laud ong kitail ni eh ketikihda sawas me kitail anahne. Siohwa kak oh ketin kupwurki sewese irail akan me pwoson ih.—Aiseia 59:1.
Sapwellimen Koht limpoak ong kitail pil kin sansalkihda eh “kin ketin sapeng pekipek kan.” (Melkahka 65:2) Ia duwen eh kin ketin sapeng atail pekipek kan kin kasalehda sapwellime limpoak ong kitail? Wahnpoaron Pohl kawehwehda: “Kumwail dehr pwunodki mehkot, ahpw nan amwail kapakap akan kumwail en peki dahme kumwail kin anahne. Amwail kasapahlkalahngan en pil iang amwail kapakap ahnsou koaros. Eri, sapwellimen Koht popohl, me inenen laudsang uwen atail dehdehki, ahpw pahn nekinekid mohngiongimwail oh pil amwail lamalam rehn Krais Sises.” (Pilipai 4:6, 7) Sang ni atail kin kapakapohng Koht sang nan atail mohngiong oh kapwaiada sapwellime kaweid kan nan sapwellime Mahsen, kitail pil kak ahneki “sapwellimen Koht popohl, me inenen laudsang uwen atail dehdehki.”
“Koht Emen me Mwahngih Mehkoaros”
Paipel kasalehda me Siohwa iei “Koht emen me mwahngih mehkoaros, oh kin ketin kadeikada wiewia koaros en aramas akan.” Ihme kahrehda e ketin mwahngih irair en aramas akan oh arail anahn akan laud sang koaros. (1 Samuel 2:3) E kasalehkihda sapwellime ladu Moses me “kaidehkin pilawahte me aramas kak mourki, pwe mahsen koaros me kin pwilipwilsang nin doauesen Koht.” (Deuderonomi 8:3; Madiu 4:4) Met wehwehki me ma kitail uhdahn men peren nan mour, kitail anahne laud sang dipwisoute.
Sounkapikpatail kihda kaweid oh peneu kesempwal ong kitail ki sapwellime mahsen, Paipel. Ni atail kin onop Paipel oh doadoahngki sapwellime kaweid kan nan atail mour, kitail kin ale kapai sang “mahsen koaros me kin pwilipwilsang nin doauesen Koht.” Karasepe, emen lih Kristian me ede Zuzanna koasoiahki eh peneinei: “At mouren pwopwoud kin kehlailkihda at kin wadekpene Paipel, towehda mihding kan oh ehukihong meteikan audepen Paipel. Pwehki sapwellimen Koht kaweid se kin ahneki soangen men akadei ehute nan at mour oh kin perenki at ehupene.”
Iaduwen omw kak paiekihda kaweid sang rehn Koht? Sang ni omw pahn kaukaule onop Paipel oh doadoahngki kaweid en Paipel kan, ke pahn kak ale kapai tohto sang rehn Koht.—Ipru 12:9.
‘Koht me Ketin Doareikitaila’
Rahnwet sampah kin direkihla wiewia lemei. Aramas sohte ese dahme pahn wiawi ni ahnsou kohkohdo. Ma ke kin mih nan sahpw ehu me ohkihlahr mahwen, ke mwein pahn men uhd mih wasakis me meleilei. Wasa tohto nan sampah, aramas kin masepwehk pwehki tiahk suwed oh tiahk lemei, apwal en mwohni oh tiahk en mwersuwed. Ihs me pahn doare kitail sang soahng pwukat koaros? Ahnsou wet, aramas anahne doarepe oh pereparail laud sang mahs.
Paipel mahsanih me mwaren “KAUN-O [“Siohwa,” NW] rasehng wasahn doulik ileile ehu, wasa me aramas pwung kan kak patohla ie oh rukula.” (Lepin Padahk 18:10) Ese mwaren Koht oh koapworopworki kin kak kaweid kitail en medewe dahme e ketin wiaiong kitailehr oh dahme e pahn ketin wia pwehn doare irail akan me kin kasalehda arail pwoson ih. Siohwa Koht ketin kasalehdahr me e kak doare sapwellime aramas akan. Karasepe, e doarehla mehn Israel kan ni e ketin kasorehla nein Parao karis en sounpei kan oh kauwehla wararail dakepen mahwen kan. Siohwa kadehdedahr me ih Koht en loalopwoat oh mehlel, Koht me kin tamataman irail akan me kin lokolok oh kin ketin inengieng doareirailla.—Eksodus 15:1-4.
Atail mour soutuk kin pid atail pwoson Siohwa Koht nin duwen atail Sounkomour. Nanmwarki Depit, me anahne powehdi kahpwal tohto kan, kasalehda soangen pwoson wet ni eh ntingihdi: “Komwi me ei Koht, komwi me ketin doareiehla.” (Melkahka 25:5) Wahnpoaron Piter ni likilik nda: “Kaun-o ketin mwahngih kapitasang me poadidi kan nan ar apwal akan.”—2 Piter 2:9.
Ong emen me kin sohpeiong Koht pwehn ale sapwellime sawas, Koht ketin inoukihda: “I pahn sinsile irail kan me ese me ngehi [“mwarei,” NW] KAUN-O.” (Melkahka 91:14) Sapwellimen Koht ladu kan rahnwet pil kilangehr mehlelpen inou wet. Nan Poland Henryk kin papah Siohwa ni lelepek erein sounpar 70 mendahki uhwong oh kalokolok kan. Ni ahnsou me Henryk sounpar 16, eh pahpao sellahng wasahn kalokolok. Henryk oh rie pwutak me laud wisiklahng ahn Nazi kan wasahn kapwungala madamadau en me pwulopwul kan. Mwurin mwo e pil kosoulahng imwen kalokolok kei. Ni ahnsowo, Henryk tamanda: “Nan ahnsou apwal pwukat koaros, Siohwa sohte ketin likidmelieiehla. E ketin sewese ie en kolokol ei lelepek, mendahki I kereniong mehla pak kei.” Ei, Siohwa kin ketikihong sapwellime ladu kan pwoson oh kehl en dadaur.
Ahnsou keren Koht pahn ketin komourla koaros me kin pwoson oh likih me e pahn ketin kapitirailla. E ketin kasalehda: “Ngehite me KAUN-O [“Siohwa,” NW], ngehite me kak komourkumwailla.” (Aiseia 43:11) “Ni mahwen me pahn wiawi ni Rahn Lapalap en Koht, Wasa Lapalahpie,” e pahn ketin kasorehla me suwed akan sang sampah oh kapitala me pwung kan. (Kaudiahl 16:14, 16; Lepin Padahk 2:21, 22) Siohwa ketin kamehlelehiong kitail: “Me aktikitik kan pahn sapwenikihla sahpwo oh re pahn paiamwahu oh popohl.”—Melkahka 37:11.
Wiahla “Sapwellimen Koht Seri kan”
Ni mwehin soukohp Malakai, mehn Israel kan kin nda me Siohwa iei Samarail. Ahpw ni ahnsou me irail kin wia arail kaudok, irail kin meirongki pilawa ohla oh mahn me maskun oh mwoator. Iei me kahrehda Siohwa keinemwe rehrail: “Eri, ngehi samamwail-a dahme kumwail sohte kin waunekiniehki?”—Malakai 1:6.
Dehr duwehte mehn Israel me seupwoson kan. Se kangoange iuk en sukuhliki Siohwa Koht oh en karanihala ih. Tohnpadahk Seims kangoange kitail, “Kumwail keido mpen Koht, oh e pahn ketin keiong mpamwail.”—Seims 4:8.
Mie soahng kan me ke anahne wia ma ke men Samankihla Siohwa. Ma ke pahn nantihong kapwaiada kupwuren Koht ni lelepek, eh sohte pahn ketin meliehla omw doadoahk kan. E pahn ketin kahluwa iuk lahng nan sampah kapw me e ketin inoukidahr, me “mehla solahr pahn wiawi, solahr mwahiei, solahr nsensuwed, solahr medek.” (Kaudiahl 21:4) Ni ahnsowo, aramas peik koaros “pahn maiaudahsang mouren liduwih mehla, oh pahn iang sapwellimen Koht seri kan nan arail saledek lingan.”—Rom 8:21.
[Kawehwehpen kilel kan nan ehu ehu pali 5]
Koht kupwurki kitail en esehla ih ki mware Siohwa, me wehwehki “E Kahrehiong en Wiahla”