“En Mwasamwasahn”

“Eri, imwin mehkoaros kerendohr. Kumwail uhdahn pahn . . . mwasamwasahn pwe kumwail en kak kapakap.”​—1 PIT. 4:7.

1. Ia oaralap en sapwellimen Sises padahk?

AHNSOU me Sises ketiket pohn sampah, oaralap en sapwellime padahk iei Wehin Koht. Ki Wehi wet, Siohwa pahn ketin kawauwihala sapwellime pwung en kaunda oh kasarawihala mwareo. Ihme kahrehda, Sises ketin padahkihong sapwellime tohnpadahk kan duwen arail pahn kapakap ong Koht: “Mweimwi en pweida wasa koaros, kupwuromwi en kin wiawi nin sampah duwen eh kin wiawi nanleng.” (Mad. 4:17; 6:9, 10) Wehi wet pahn kereniong kasohrehla koasoandi en Sehdan wet oh kapwaiada dahme Koht kupwurki ong sampah. Duwehte dahme Daniel kohpada, Wehin Koht “pahn kauwehla mwehi teikan koaros, oh pahn mihmi kohkohlahte.”​—Dan. 2:44.

2. (a) Ia duwen sapwellimen Sises tohnpadahk ko pahn ese me e ketin kaundahier Wehio? (b) Pil dahme kilelo pahn kasalehda?

² Pwehki ketidohn Wehin Koht wia mehkot kesempwal ong sapwellimen Sises tohnpadahk kan, irail eri idek reh: “Kilel da kei me pahn kasalehda ahnsoun omwi pahn ketido oh imwin sampah.” (Mad. 24:3) Kilel ehu pahn kohda ong tohn sampah pwehn kasalehda me Krais kaundahier Wehio. Kilel wet pahn sansalkihda soangsoangen wiewia kei me Paipel kohpadahr. Sapwellimen Sises tohnpadahk me momour ni ahnsowo kak wehwehki me e tepier kakaun nanleng. E pahn pil wia kasalepen tepidahn ahnsou ehu me Paipel kin kahdaneki “imwin rahn akan” en koasoandi suwed me powehdier sampah wet.​—2 Tim. 3:1-5, 13; Mad. 24:7-14.

En Mwasamwasahn ni Imwin Rahn akan

3. Dahme kahrehda Kristian akan anahne en mwasamwasahn?

³ Wahnpoaron Piter ntingihdi: “Eri, imwin mehkoaros kerendohr. Kumwail uhdahn pahn kaunda paliwaramwail kan oh mwasamwasahn pwe kumwail en kak kapakap.” (1 Pit. 4:7) Sapwellimen Sises tohnpadahk kan anahne mwasamwasahn oh tetehk duwen mwekid kan en sampah me pahn kasalehda me e tepidahr kakaun Wehio. Oh irail anahne en mwasamwasahn laud sang mahs pwehki imwin koasoandi wet kereniong leledo. Sises mahsanihong sapwellime tohnpadahk kan: “Kumwail mwasamwasahn pwe kumwail sehse iahd me soumas en ihmwo pahn pwurodo [pwehn kadeikada en Sehdan sampah wet].”​—Mark 13:35, 36.

4. Kasalehda wekpeseng en wiewiahn irail kan me wia kisehn ahn Sehdan sampah wet oh irail sapwellimen Siohwa ladu kan. (Pil kilang kakon.)

⁴ Pali laud en aramas kin milahr pahn kaundahn Sehdan, oh irail sohte kin iang mwasamwasahn duwen wehwehn mwekimwekid kan en sampah wet. Irail sohte kasawihada me Krais tepidahr kakaun nanleng. Ahpw sapwellimen Krais tohnpadahk mehlel kan kin mwasamwasahn oh kasawihadahr uhdahn wehwehn dahme wiawiher sounpar epwiki samwalahro. Sangete nan pahr 1925, irail Sounkadehdehn Siohwa kan kilangehr me sang nan Mahwen Keieu en Sampah oh wiewia kan me pwarada mwuhr kin kadehdehda me Krais tepidahr kakaun Wehin nanleng nan pahr 1914. Eri, imwin rahn akan en koasoandi suwed wet en Sehdan tepidahr. Tohto irail kan me pil kin tetehk dahme wiawi ahpw sohte wehwehki kahrepe kin pohnese wekpeseng laud en ahnsou kan mwohn Mahwen Keieu en Sampah oh pahr kan mwuri.​—Menlau wadek kakon me oaralap nda: “Pahr akan me Kahpwal Laud Tepida.”

5. Dahme kahrehda e kesempwal kitail en kin mwasamwasahn?

⁵ Kereniongehr sounpar epwiki me soangen mwekid suwed kapwuriamwei kan wiawiher nan sampah pwon me kasalehda me kitail miher nan imwin rahn akan. Kisin ahnsou kis luhwe mwohn Siohwa pahn ketikihong Sises kehkehlik en kahluwa tohnleng kan pwehn kauwehla en Sehdan sampah wet. (Kaud. 19:11-21) Kaweid kohwong Kristian mehlel kan en kin mwasamwasahn. Eri, e kesempwal en kaukaule wia met nin doken atail kasikasik imwin koasoandi wet. (Mad. 24:42) Kitail anahne en mwasamwasahn, oh pahn kaweid en Krais, kitail anahne en kapwaiada doadoahk en kalohk nan sampah pwon.

Doadoahk Ehu nan Sampah Pwon

6, 7. Ia duwen doadoahk en kalohki Wehio kin kekeirda erein imwin rahn akan?

⁶ Kokohp kasalehda me doadoahk me sapwellimen Siohwa ladu kan kin wia iei kisehn kilel me kasalehda kitail miher nan imwin rahn akan en koasoandi suwed wet. Sises ketin kawehwehda met ni ahnsou me e ketin kasalehda soahng kan me pahn wiawi ni imwin ahnsou. Patehng sapwellime kokohp iei mahsen kesempwal wet: “Rongamwahu en Wehin Koht pahn lohkseli wasa koaros nin sampah, pwe kadehde en mie ong aramas koaros​—a mwuri, imwin sampah ahpw pahn kohdo.”​—Mad. 24:14.

⁷ Medewe duwen ekei ire mehlel me pid sapwellimen Sises kokohpo. Nempehn irail kan me kin kalohkiseli rongamwahwo inenen malaulau ahnsou me imwin rahn akan tepida nan pahr 1914. Ahpw met, irail uhdahn tohtohla. Sounkadehdehn Siohwa kan tohtohsang me 7,000,000 kin kalokalohk nan sampah pwon, me wiahda pwihn en mwomwohdiso daulih 100,000. Patehng met, irail me 10,000,000 iang Sounkadehdehn Siohwa kan kawauwih Katamanpen kamatalahn Krais nan pahr 2008. Irail me towehda, inenen tohto sang pahr me neklahro.

8. Dahme kahrehda uhwong kan sohte kin kauhdi pweidahn atail doadoahk en kalohk?

⁸ Ia uwen laud doadoahk en kalohki Wehio kin wiawi ong wehi kan koaros mwohn imwin koasoandi suwed wet pahn leledo! Met pweida mendahki Sehdan wia “koht suwed en sampah wet.” (2 Kor. 4:4) Sehdan me kin kaunda palien politik, pelien lamalam, oh palien pesines me kin wia kisehn sampah wet, iangahki mehkan me kin wiahda rohng de koasoi likamw pwehn pitihdi aramas akan. Ahpw dahme kin sewese pweidahn doadoahk en kalohk wet? Iei sapwellimen Siohwa sawas. Ihme kahrehda doadoahk en kalohki Wehio kin pweida mwahu mendahki Sehdan kin song en kauhdi.

9. Dahme kahrehda pweidahn doadoahk en kalohk oh tohtohlahn aramas akan me kin esehla Siohwa oh kupwure kin duwehte manaman ehu?

⁹ Pweidahn doadoahk en kalohk oh tohtohlahn aramas akan me kin esehla Siohwa oh kupwure kan kin duwehte manaman ehu. Ma sohte sapwellimen Koht sawas, me iei sapwellimen kaweid oh epwel mwahu ong sapwellime aramas akan, doadoahk en kalohk sohte kak pweida. (Wadek Madiu 19:26.) Kitail kak kamehlele me ki sapwellimen Koht manaman me kin kaweidih mohngiong en irail akan me men papah ih, doadoahk en kalohk wet pahn pweida, “a mwuri, imwin sampah ahpw pahn kohdo.” Ahnsowo inenen kerendohr.

‘Kahn Kamakam Kowahlap’

10. Ia duwen Sises ketin kawehwehda duwen rahnen kahn kamakam kowahlap me pahn kohdo?

¹⁰ Koasoandi suwed wet pahn imwikihla ‘kahn kamakam kowahlap.’ (Kaud. 7:14) Paipel sohte kin padahkihong kitail ia uwen werei met pahn wiawi, ahpw Sises mahsanih: “Pwe apwal en ni ahnsowo pahn laudsang apwal me kin wiawi sang mahs kohdo lel met; pil sohte me pahn duwe sang met kohla.” (Mad. 24:21) Ni atail pahn tehk duwen kahpwal kan me sampah wet lelohngehr, duwehte dahme wiawi nan Mahwen Keriau en Sampah me aramas kereniong rar pak 60 mehla, kahn kamakam kowahlap me pahn kohdo pahn laudsang met mehlel. E pahn imwikihla mahwen en Armakedon. Iei ahnsou me Siohwa pahn ketin kadarala sapwellime pwihn me pahn kasorehla Sehdan oh lipwe kan koaros nan sampah wet.​—Kaud. 16:14, 16.

11, 12. Dahme pahn kasalehda tepidahn kahn kamakam kowahlap?

¹¹ Paipel sohte kin kilelehdi rahn me kahn kamakam kowahlap wet pahn tepida, ahpw e padahkihong kitail dahme pahn kasalehda tepidahn wiewia wet. E pahn tepida ni ahnsou me kaun en koperment kan pahn kauwehla palien sarawi likamw kan koaros. Nan kokohp en Kaudiahl ire laud 17 oh 18, palien sarawi likamw kan koaros kin karasahiong lih en netiki paliwere men me wiahdahr dipen nenek rehn kaun en wehi kan en sampah wet. Nan Kaudiahl 17:16 kin kasalehda me ahnsowo pahn kereniong leledo me kaun en wehi kan “pahn kailongkihla lih suwedo. Re pahn kihsang mehkoaros me e ahneki oh kakilisawihada. Mwuhr, re ahpw pahn kangala uduke oh kamwomwkihla kisiniei.”

¹² Ni ahnsou me met pahn wiawi, Koht pahn ketin “audehkidahr kapehdirail kan [kaunen koperment kan] dahme e ketin kupwukupwurehiong liho” pwehn kauwehla sarawi likamw koaros. (Kaud. 17:17) Eri Koht me pahn wia kasohrala wet. Met iei sapwellime kadeik ong palien sarawi mwalaun kan me kin padahngki padahk kan me uhwong kupwuren Koht oh kaloke sapwellime ladu kan ahnsou reirei. Pali laud en aramas sohte kin kasik kasohrlahn sarawi likamw akan. Ahpw sapwellimen Siohwa ladu lelepek kan kin kasikasik met. Oh irail kin kalokalohki duwen met nan imwin rahn akan.

13. Dahme pahn kasalehda me imwilahn sarawi likamw akan pahn wiawi ki erein ahnsou mwotomwot?

¹³ E pahn wia mehkot inenen kapwuriamwei ong aramas akan en kilang palien sarawi likamw akan kasohrala. Kokohp en Paipel kin kasalehda me irail “nanmwarkien sampah kan” pahn kin ndinda duwen kasohrala wet: “Ia uwen kamasepwehk, ia uwen apwal laud wet! . . . Nan awateieu kadeikpomw wiawiher!” (Kaud. 18:9, 10, 16, 19) En Paipel kin doadoahngki mahsen wet “awateieu” kin kasalehda me mwekid wet pahn wiawi ki erein ahnsou mwotomwot.

14. Ahnsou me imwintihti en Siohwa kan pahn tepida uhwongada sapwellime ladu kan, dahme Koht pahn ketin wia?

¹⁴ Kitail ese me mwurin palien sarawi likamw akan pahn kasohrala, uhwong kan pahn lelohng sapwellimen Siohwa ladu kan me kin wie pakpakairki sapwellime mahsen kan. (Esek. 38:14-16) Ahnsou me met pahn wiawi, tohn uhwong kan pahn pwarado mwohn Siohwa, me ketin inoukidahr e pahn ketin pere sapwellime aramas lelepek kan. Siohwa mahsanih: “I kalohkihda ni karakar en ei engieng . . . Irail pahn esehla me ngehi iei KAUN-O.” (Wadek Esekiel 38:18-23.) Koht mahsanih: “Mehmen me pahn sair kumwail [sapwellime ladu lelepek kan] pahn sair mehkot me keieu kesempwal rehi.” (Sek. 2:8) Eri ahnsou me imwintihti kan pahn tepida uhwong sapwellime ladu kan sampah pwon, Siohwa pahn ketin mwekid. E pahn ketin mwekid ni eh pahn kaimwisekihla kahn kamakam kowahlap ki Armakedon. Pahn kaweid en Krais, karis en sounpei en nanleng akan pahn kapwaiada sapwellimen Siohwa kadeik oh kasohrehla koasoandi en Sehdan wet.

Ia Duwen Kitail en Mwekidki Met

15. Ni atail eseier me imwin koasoandi wet kereniong imwisekla, ia duwen kitail en mwekidki met?

¹⁵ Ni atail eseier me imwin koasoandi suwed wet kereniong imwisekla, ia duwen kitail en mwekidki met? Wahnpoaron Piter ntingihdi: “Eri, ma mepwukat pahn ohla nin duwe met, a ia duwen kumwail, soangen mour dah me konehng kumwail en weweidki? Amwail mour uhdahn pahn konehng en kin mwakelekel oh kasarawihong Koht.” (2 Pit. 3:11) Mahsen pwukat kin kasalehda duwen anahnepen en tetehk pwe atail wiewia kan en kin pahrekiong dahme Koht kupwurki, oh atail mour en kin poadidi ong ih, pwehn kasalehda atail limpoak ong Siohwa. Wiewia pwukat pil kin pidada atail en wia uwen atail kak en kalohki rongamwahu en Wehio mwohn imwio pahn leledo. Piter pil ntingihdi: “Eri, imwin mehkoaros kerendohr. Kumwail uhdahn pahn . . . mwasamwasahn pwe kumwail en kak kapakap.” (1 Pit. 4:7) Kitail kin karanihala Siohwa oh kasalehda atail limpoak ong ih sang ni atail kin kaukaule kapakap oh peki sapwellime manaman sarawi oh pil sawas sang sapwellime pwihn en mwomwohdiso sampah pwon en kaweidih kitail.

16. Dahme kahrehda kitail anahne en kolokol teng kaweid en Koht?

¹⁶ Nan soangen ahnsou keper pwukat, kitail anahne en kolokol teng kaweid en sapwellimen Koht mahsen: “Kumwail kanahieng duwen amwail mour me kumwail weweidki. Kumwail dehr duwehte aramas me loalopwon kan, ahpw kumwail duwehte me loalokong kan. Kumwail isaneki ahnsou mwahu koaros, pwe ahnsou pwukat ahnsou suwed kei.” (Ep. 5:15, 16) Wiewia suwed kan kin inenen rekla sang mahs. Sehdan wiadahr soahng tohto pwehn kauhdi aramas akan sang en wia kupwuren Siohwa de e kin song en kedirepwala irail. Nin duwen ladu en Koht kei, kitail eseier met, oh kitail sohte men mweidohng mehkot en katikihala atail kin lelepek ong Koht. Kitail pil ese dahme pahn wiawi ni ahnsou keren, oh kitail kin kihong atail likilik koaros rehn Siohwa oh kupwure kan.​—Wadek 1 Sohn 2:15-17.

17. Menlau kawehwehda ia duwen irail kan me pitsang Armakedon pahn mwekidki iasadahn me melahr akan?

¹⁷ Inou me Koht ketin wiahda pwehn kaiasada me melahr kan pahn pweida, pwehki “aramas koaros, me mwahu oh suwed, pahn iasada sang mehla.” (Wiewia 24:15) Kilang uwen mehlel en inou wet: “Aramas . . . pahn iasada sang mehla”! Met uhdahn mehlel pwehki Siohwa ketin mahsanihier met! Nan Aiseia 26:19 kin inoukihda: “Irail kan sang rehn at tungoal aramas akan me melahr pahn pwurehng mourda! . . . Koaros me memeir nan ar sousou pahn pwourda oh koulki koulen peren. Duwen pwoaik en nimenseng eh kin kalamwuri sampah, iei duwen KAUN-O eh pahn ketin kamourada me melahr akan.” Ire mehlel duwen en Koht kapwaiadahr ekei kokohp teikan, kin kamehlelehiong kitail duwen mehlel en inou wet eh pahn pweida nan sampah kapw. Ia uwen kaperen en kilang me iasadahr kan pahn pwurehng tuhwong kompoakparail kan! Ei, imwin koasoandi en Sehdan kerendohr, oh sapwellimen Koht sampah kapw pil kerendohr. Ia uwen kesempwal en kin mwasamwasahn!

Ke Tamataman?

• Ia oaralap en sapwellimen Sises padahk?

• Ia uwen laud en doadoahk en kalohki Wehio nan atail ahnsou?

• Dahme kahrehda e uhdahn kesempwal en kin mwasamwasahn?

• Dahme kangoange iuk duwen inou me kileldi nan Wiewia 24:15?

[Kawehwehpen kilel kan nan ehu ehu pali 18]

Pahr akan me Kahpwal Laud Tepida

Pahr akan en Kahpwal Laud: Dahme Wiawi nan Irair en Sampah Kapw Ehu (The Age of Turbulence: Adventures in a New World) iei pwuhk ehu me ntingda nan pahr 2007 sang ohl emen me adaneki Alan Greenspan. Kereniong sounpar 20, ohl menet wia emen lapalap nan ohpis en Federal Reserve Board en wehin Amerika, wasa ehu me kin apwahpwalih wasahn mwohni kan koaros nan sampah. Greenspan kasalehda duwen wekpeseng laud en irair en sampah mwohn pahr 1914 oh pil pahr akan mwuri.

“Nin duwen ripoht en ahnsou ko kasalehda, irair en sampah mwohn 1914 kin mwomwen mwekimwekidwei ong kamwahulahn onepek en nanpwungen aramas oh pil arail wehi kan. Mwomwen irair en mouren aramas ahnsowo kin inenen mwahu, kereniong unsek. Nan pahr akan en 1800, mwekid kan me pidada kalidu de netiki lidu kan solahr wiawi. Wiewiahn aramas lemei kan mwomwen tikitikla. . . . Wiawihdahn dipwisou kapw kan nan sampah pwon, duwehte wiawihdahn wasahn tangatang en kisa kan, telephone, lioal, imwen kasdo kan, sidohsa, oh pil soangsoangen dipwisou kapw kan en nan ihmw kin uhdahn kekeirda laud oh tohtohla. Palien wini, kekeirdahn roson mwahu, oh pil kamwahulahn epwelpen pihl mwakelekel ong roson en aramas kin wiawi wasa koaros. . . . Koaros kin lemeleme me irair en paiamwahu wet sohte pahn wekila.”

Ahpw . . . “Mahwen Keieu en Sampah uhdahn kauwehla irair en mouren aramas oh pil nanpwungmwahu en wehi kan laudsang Mahwen Keriau en Sampah me kemehla aramas ngedehrie, met pwehki Mahwen Keieuwo kin kauwehla madamadauo me aramas kak ahneki mour mwahu. I sohte kak manokehla pahr akan mwohn Mahwen Keieu en Sampah, ahnsowo me mwomwen mouren tohnsampah kin uhdahn kekeirda mwahu. Madamadau en rahnpwukat uhdahn weksang madamadau en sounpar epwiki kei samwalahro. Re kin mwomwen medemedewehte dahme uhdahn kin wiwiawi met. Eri ia duwe, mwersuwed laud, karakarlahn sampah, de pelian politik kan kak wiaiong irair en sampah ahnsouwet duwehte dahme Mahwen Keieu en Sampah wia nin tepio? Sohte me kak uhdahn sapengla peidek wet.”

Ohl menet, Greenspan, pil tamanda dahme emen sounpadahk saman, Benjamin M. Anderson (1886-1949), koasoia ahnsou me e kin iang sukuhl laud: “Irail akan me ahneki madamadau oh dehde mwahu duwehte me mah kan ong ahnsou kan mwohn Mahwen Keieu en Sampah, kin tamanda rahn ako oh kin loaleidkihda. E kin mie pepehm en epwel mwahu ahnsowo me sohte kin wiawi ahnsou pwukat.”​—Pwuhk en Kekeirdahn Wehi oh Mour Mwahu en Aramas (Economics and the Public Welfare).

Madamadau wet pil duwehte dahme kileldi nan pwuhk me adaneki Sampah Ehu me Liselipingdahr (A World Undone) me G. J. Meyer ntingihada nan pahr 2006. Kitail pahn wadek wasao: “Aramas tohto kin nda me dahme kin wiawi nan poadopoad kak ‘kawekila soahng koaros.’ Met uhdahn sansalda mehlel erein Mahwen Laudo [1914-1918]. Mahwen wet uhdahn kawekila soahng koaros: kaidehn ihte irepen sahpw akan, nanpwungen wehi kan oh pil dahme pahn wiawi ong wehi pwukat, ahpw pil elen madamadau en aramas akan ong dahme re kilang nin sampah wet oh pil duwen arail mour sangete ahnsowo. E mwomwen duwehla ahnsou ehu me sohte audepe, me kahrehda sampah en ahnsouwet kin weksang douluhl irair en epwel mwahu me kin wiawi nan koasoandien sampah mahso.”

[Kawehwehpen kilel kan nan ehu ehu pali 20]

Nan Armakedon, Siohwa pahn ketin kadarala karis en tohnleng kan