Ke Kin Kesempwalki Dahme Siohwa Ketin Wiahda Pwehn Komouruhkala?

“Kapinga Kaun-o, Koht en Israel! Pwehki eh ketidohr pwe en sewese sapwellime kan oh komourirailla.”—LUK 1:68.

1, 2. Ia duwen atail kak karasahda apwal en irair me kitail mihmi loale? Peidek dah kan me kitail pahn koasoiapene?

MEDEWEHLA me ke mihmi nan imwen wini. Ke mi nan pere ehu me koaros ahneki soangen soumwahu ehu me sohte wini kak kamwahwihala. Ni ahnsou me ke esehda me mie emen toahkte me kin tiengla mwowe pwehn rapahki wini me kak kamwahwihala soumwahwo, ke kin koapworopworki me met pahn pweida. Ke men ese soahng koaros me pid duwen dahme toahkte kin wiewia. Ehu rahn, ke esehda me mie wini dierekda! Toahkte me rapahkihda winio wiahda tounmetei tohto pwehn wiahda winio. Ia pahn omw pepehm? Ni mehlel, ke pahn uhdahn wauneki oh kalahnganki toahkte me doareiukala oh meteikan sang mehla.

² Ele met nohk daulihala, ahpw ih me kitail koaros kin lelohng. Emenemen kitail kin mi nan irair ehu me apwal sang dahme sansalda powe. Kitail uhdahn anahne emen me kak doarekitailla. (Wadek Rom 7:24.) Siohwa ketin wiahda tounmetei laud pwehn komourkitailla. Sapwellime Ohlo pil ketin wiahda tounmetei laud. Eri, kitail pahn tehk peidek pahieu. Dahme kahrehda kitail anahne komour? Dahme Sises ketin anahne tounmeteikihla pwehn kak komourkitailla? Soangen tounmetei dah me Siohwa ketin wiahda oh soangen medek dah me e ketin lelohng? Oh ia duwen atail kak kasalehda atail kesempwalki komour wet sang rehn Koht?

Dahme Kahrehda Kitail Anahne Komour?

3. Ia duwen dihp eh duwehte soumwahu lusulus?

³ Nan ehu ripoht, mie ehu soumwahu lusulus me keieu suwed nan poadopoad en aramas me wiawi nan pahr 1918 lel 1919, oh kemehla aramas me tohtohki rar pak eisek samwa. Mie soumwahu teikan me keper sang met. Soumwahu pwukat kin lelohng aramas malaulau ahpw kin kemehla pali laud en irail.a Ahpw ia duwen ma kitail kapahrekihpene dihp ong soangen soumwahu lusulus wet? Tamanda Rom 5:12 me mahsanih: “Dihp tepidohng sampah sang rehn aramas tehmen, ahpw tialahng mehla. Eri, mehla lelohngehr aramas koaros, pwe aramas koaros dipadahr.” Koaros sohsohki dihp, pwehki aramas soh unsek koaros kin wia dihp. (Wadek Rom 3:23.) Aramas depe kin mehkihla dihp? Pohl ntingihdi me dihp wahdo mehla ong “aramas koaros.”

4. Ia sapwellimen Siohwa madamadau ong atail mour? Ia duwen sapwellime madamadau eh kin weksang ahn aramas tohto rahnwet?

⁴ Me tohto rahnwet pehm me dihp oh mehla kaidehn mehkot kapwuriamwei. Re kin pwunodki soangen mehla me sohte kasikpe, ahpw re kin leme me mehla me kohsang arail kin mahla kin wia kisehn mour. E uhdahn mengei ong aramas akan en manokehla kupwuren Sounkapikadao. Atail mour kin mwotomwot sang dahme e ketin kupwurki. Ni mehlel, sohte emen me momour lel “rahnteieu” mwohn silangin Koht. (2 Pit. 3:8) Mahsen en Koht mahsanih me atail mour kin mwotomwot rasehng reh de tumwenieng. (Mel. 39:5; 1 Pit. 1:24) Kitail anahne tamataman met. Dahme kahrehda? Ma kitail wehwehki uwen laud en “soumwahu” wet me kitail kin lokolongki, kitail kak pohnese kesempwalpen “wini” wet me iei komourpatail.

5. Dahme kitail sohte ahneki pwehki dihp?

⁵ Pwehn kak wehwehki uwen laud en dihp oh lipwe kan, kitail anahne song en wehwehki dahme dihp kin wiahiong kitail. E pahn ele apwal en wehwehki met pwehki dihp kahrehiong kitail en sohte ahneki dahme tepin atail pahpa oh nohno ahneki. Nin tapio, Adam oh Ihp ahneki mour unsek. Pwehki ira ahneki madamadau oh paliwar unsek, ira kak pilada en kaunda ara madamadau kan, pepehm kan, oh wiewia kan. Eri, ira kak pousehlahte kakairada irair kaselel kan nin duwen sapwellimen Siohwa Koht ladu kan. Ahpw ira soikala kisakis kesempwal wet en ahneki mour unsek. Pwehki Adam oh Ihp dipada ong Siohwa, ira oh kadaudokara kan koaros sohla ahneki soangen mour me Siohwa kupwurki ong irail. (Sen. 3:16-19) Ni ahnsowohte, ira kahrehiong pein ira oh pil kitail en iangada “soumwahu” me kitail koasoia duwe. Ihme kahrehda Siohwa ketin kadeikada ira ni pwung. Ahpw e ketikihong kitail koapworopwor en komour.—Mel. 103:10.

Dahme Sises Ketin Tounmeteikihla ong Komourpatail?

6, 7. (a) Nin tapio, ia duwen Siohwa eh ketin kasalehda me tounmetei laud pahn anahne wiawi pwehn mie komourpatail? (b) Dahme kitail kak sukuhlki sang meirong me Eipel oh ohl lelepek teikan me momour mwohn Kosonnedo wiahda?

⁶ Siohwa mwahngih me e pahn ketin anahne wiahda tounmetei laud pwehn komourala kadaudok en Adam oh Ihp kan. Nan kokohp me kileldi nan Senesis 3:15, kitail sukuhlki dahme anahn ong komourpatail. Siohwa pahn ketikihda “nein liho,” sounkomour men, me pahn kasorehla Sehdan ehu rahn. Ahpw ni karasaras, sounkomour menet pahn lelohng lokolok ni keimwen neh eh pahn keikeidi. Kitail wehwehki me keikeidi ni keimwen neh pahn kamedek oh kin kaluwetehla aramas emen, ahpw ia wehwehn met (ke keimwen neh) nan kokohp wet? Dahme sapwellimen Siohwa me Pilipildahro pahn anahne dadaur?

⁷ Pwehn komourala aramas akan sang dihp, sounkomouro pahn anahne wiahda tomw ehu pwehn kapwungala nanpwungen Koht oh aramas akan ni eh pahn kasaledekala aramas sang lipwen dihp. Dahme met kin pidada? Sangete mahs mie mehn kadehde me meirong ehu anahn. Ni ahnsou me tepin aramas lelepek, Eipel, meirongkihong Siohwa mahn emen, Siohwa kupwuramwahwih ih. Mwuhr, ohl kan me kin lemmwiki Koht duwehte Noha, Eipraam, Seikop, oh Sohp pil wiahda soangen meirong kan me kaperenda Koht. (Sen. 4:4; 8:20, 21; 22:13; 31:53, 54; Sohp 1:5) Kosonned en Moses sewese aramas akan ren kalaudehla ar wehwehki duwen meirong.

8. Dahme samworo lapalapo kin wia ni Rahn en Tomw?

⁸ Nanpwungen meirong kan me keieu kesempwal pahn Kosonnedo iei Rahn en Tomw me kin wiawi pak ehu nan sounpar ehu. Rahno, mie koasoandi kei me mie wehwepe ni karasaras me samworo lapalapo kin wiahda. E kin wia meirong kan ong Siohwa pwehn wia mahkpen dihp kan, keieu ong samworo kan oh arail keinek, a mwuhr, ong irail me kaidehn keinek en samworo kan. Samworo lapalapo kin pidelong nan Wasa Sarawiheo nan impwalo de tehnpaso me ih kelehpw kak pidelong loale, oh e kin wia met ni Rahn en Tomw. Nan wasao, e kin usupihki ntahn meirong ko mwohn kohpwahn inowo. Pohnangin kohpwa sarawio, mie depwek lingaling ehu me kin pwarada ekei pak, oh kin wia kasalepen Siohwa Koht eh ketiket wasao.—Eks. 25:22; Lip. 16:1-30.

9. (a) Ni Rahn en Tomw, ihs me samworo lapalapo kin mwete? Ia wehwehn meirong kan me e kin wiahda? (b) Dahme kin mwete en samworo lapalapo eh kin pidelong nan Wasa Sarawiheo?

⁹ Koht ketin doadoahngki wahnpoaron Pohl en kasalehda wehwehn wiewia kan en samworo lapalapo ni rahno. E kasalehda me samworo lapalapo kin mwete Mesaia, Sises Krais, oh meirong kan kin wehwehki sapwellimen Krais meirong ni eh pwoula. (Ipru 9:11-14) Meirong unsek wet pahn uhdahn wia mahkpen dihp ong pwihn en aramas riau—pwihn en samworo me wia rien Krais 144,000 keidi kan oh pil “sihpw teikan.” (Sohn 10:16, NW) Ni ahnsou me samworo lapalapo pidelong nan Wasa Sarawiheo, e kin mwete en Sises eh pidelong nanleng mwohn silangin Siohwa Koht pwehn patohwan ong Ih pweinen meirong en tomwo.—Ipru 9:24, 25.

10. Dahme kokohp en Paipel kin kasalehda me Mesaiao pahn lelohng?

¹⁰ Eri, e sansal me tounmetei laud anahn pwe kadaudok en Adam oh Ihp kan ren kak komourala. Mesaiao pahn anahne tounmeteikihla sapwellime mour. Soukohp kan en Palien Pwuhk Sarawi ni Lokaiahn Ipru kin kihda oaritik kan duwen met. Karasepe, soukohp Daniel koasoia ni sansal me “kaun me Koht ketin piladahro” pahn “kamakamala” pwe “mahkpen dihp pahn miehla.” (Dan. 9:24-26) Aiseia kohpada me aramas pahn sohpeisang Mesaiao oh e pahn ketin lokolok oh kamakamala pwehn pwainda dipen aramas soh unsek kan.—Ais. 53:4, 5, 7.

11. Ia duwen sapwellimen Siohwa Ohl eh kupwurki tounmeteikihla pein ih ong komourpatail?

¹¹ Mwohn e ketido sampah, sapwellimen Koht Iehros mwahngih dahme e anahne wia pwe kitail en kak komourla. E pahn anahne lelohng lokolok laud oh kamakamala. Ia duwe, ni ahnsou me Semeo ketin padahkihong ih duwen ire mehlel pwukat, e kin pweiek de pelian? Soh. E kin kasalehda me e uhpah ni eh pwungki dahme Semeo ketin padahkihong ih. (Ais. 50:4-6) Pil duwehte, ni eh ketiket sampah, Sises kin ketin peikiong kupwuren Semeo. Dahme kahrehda? E ketikihda pasapeng ehu me duwehte met: “I poakohng Semei.” E pil mahsanih: “Limpoak me keieu laud me emen kak ahneki ong kompoakepah kan, ma e pahn tounmeteikihla eh mour pwehki kompoakepah ko.” (Sohn 14:31; 15:13) Komourpatail kin mie sang ni limpoak en sapwellimen Siohwa Ohl. Mendahki e anahne tounmeteikihla sapwellime mour unsek, e kupwurki wia met ong komourpatail.

Dahme Siohwa Anahne Wia Pwe en Mie Komourpatail

12. Ihs me koasoanehdi tomwo? Dahme kahrehda e ketikihda tomwo?

¹² Kaidehn Sises me ketin koasoanehdi meirong tomwo de ia duwen eh pahn wiawi. Koasoandi en komourla wet wia mehkot me keieu kesempwal nan kupwur en Siohwa. Wahnpoaron Pohl kasalehda me pei sarawi me mi nan tehnpaso, wasa me meirong kan kin wiawi, kin wia kasalepen kupwuren Siohwa. (Ipru 10:10) Eri kitail me keieu pweipwand ong Siohwa pwehki komour me kitail ale sang meirong en Krais. (Luk 1:68) Met iei kasalepen sapwellime kupwur unsek oh limpoak laud ong aramas.—Wadek Sohn 3:16.

13, 14. Ia duwen mehn kahlemeng en Eipraam eh sewese kitail en wehwehki oh kesempwalki dahme Siohwa ketin wiahda ong kitail?

¹³ Dahme Siohwa ketin tounmeteikihla ni eh ketin kasalehda sapwellime limpoak ni ahl wet? E apwal ong kitail en wehwehki. Ahpw mie iren Paipel me kak sewese kitail en wehwehki ire wet ni sansal. Siohwa mahsanihong ohl lelepek Eipraam en wia mehkot me uhdahn apwal iei en meirongkihong ih nah pwutak Aisek. Eipraam wia pahpa limpoak men. Siohwa mahsanihki Aisek nin duwen met, “noumw pwutak iehrosen, me ke kin kesempwalki.” (Sen. 22:2) Ahpw, Eipraam ese me en wia kupwuren Siohwa kin kesempwal sang eh limpoak ong Aisek. Eipraam eri peikiong. Ahpw Siohwa sohte ketin mweidohng Eipraam en wia dahme E pahn ketin wia ehu rahn. Koht ketin poaronehdo tohnleng men en kauhdi Eipraam mwohnte eh pahn meirongkihla nah pwutako. Eipraam uhdahn koasoanehdi en peikiong eh Koht nan apwal wet. E kamehlele me ihte ahnsou me e pahn pwurehng kilang mwahnakapw menet iei ni eh pahn iasada sang mehla. E ahneki pwoson unsek me Koht pahn ketin kaiasada ih. Ni mehlel, Pohl koasoia me ni karasaras Eipraam pwurehng alehdi Aisek ni kaiasada.—Ipru 11:19.

¹⁴ E apwal ong kitail en medewe ahn Eipraam medek ni eh kaunopada en meirongkihla nah pwutako. Ni ahl ehu, dahme Eipraam wia kin mwete en Siohwa eh ketin meirongkihla meno me e ketin kamwarehki “nei pwutak kompoake.” (Mad. 3:17) Ahpw, tamanda me Siohwa uhdahn kupwurtoutoula laudsang Eipraam. Ih oh sapwellime Ohl kin sapwellimanikipene nanpwungmwahu erein sounpar lik lik kei. Sapwellimeo kin perenki doadoahk rehn Semeo nin duwen sapwellime “sounsawas” kompoak men oh pil Sounkair men, “Mahseno.” (Lep. Pad. 8:22, 30, 31; Sohn 1:1) Ni ahnsou me aramas kaloke, kapailoke, oh kemehla Sapwellimeo nin duwen loallap men, dahme Siohwa ketin lelohng inenen laudsang dahme kitail ese. Ia uwen tounmetei laud me Siohwa ketin wiahda pwehn ketikihong kitail komour! Ia duwen atail kak kasalehda me kitail kesempwalki komourpatail?

Ia Duwen Omw Kak Kasalehda me Ke Kesempwalki Komourpatail?

15. Ia duwen Sises eh ketin kapwaiada koasoandi en tomwo? Dahme met kin imwikihla?

¹⁵ Sises ketin kapwaiada koasoandi en tomwo mwurin eh iasada oh ketidahla nanleng. Ni eh pwurehng pwurala rehn Semeo, e patohwanohng Ih pweinen eh tomw. Mie soangen kapai kan me wiawi. Mahk mehlel en dihp miehla, keieu ong dipen rien Krais me keidi kan oh mwuri ong “aramas koaros.” Pwehki meirong wet, rahnwet aramas koaros me kin kasalehda koluhla mehlel ong diparail kan oh kin uhdahn idawehn Krais kak ahneki nanpwungmwahu rehn Siohwa Koht. (1 Sohn 2:2) Ia duwen met eh kin dokedoke iuk?

16. Ia duwen atail pahn kin karasahda kahrepen atail kalahnganki komourpatail me Siohwa ketikihda?

¹⁶ Kitail pahn pwuralahng karasaras me kitail koasoiapene ni tapio. Ia duwen ma toahkte me diarada wini me pahn kamwahwihala soumwahwo kohdo ni pere me irail soumwahu kan mihmi ie oh nda: Me soumwahu men me ale wini oh kapwaiada koasoandi me kileldi pahn uhdahn mwahula. Ia duwen ma pali laud en iengomw soumwahu kan kahng idawehn kaweid en toahkteo oh kin akupwungki me e nohn apwal en ale wini oh kapwaiada kaweid me kileldi? Ke pahn duwehte irail, mendahki ke ahneki mehn kadehde me winio pahn uhdahn kamwahwihiukala? Uhdahn soh! Ke uhdahn pahn kasalehda omw kalahnganki wini wet oh kapwaiada kaweid en toahkteo, mwein ke pil pahn koasoiaiong meteikan duwen omw pilipil. Emenemen kitail anahne nantihong kasalehiong Siohwa ia uwen atail kalahnganki komourpatail me e ketikihda sang ni meirong en tomw me sapwellime Ohl wiahda.—Wadek Rom 6:17, 18.

17. Ia duwen omw kak kasalehda omw kalahnganki dahme Siohwa ketin wia pwehn komouruhkala?

¹⁷ Ma kitail kalahnganki dahme Siohwa oh sapwellime Ohl ketin wiahda pwehn komour kitail sang dihp oh mehla, kitail anahne kasalehda met. (1 Sohn 5:3) Kitail pahn peiong atail ineng en wia dihp. Kitail sohte pahn mweidohng kitail en nsenki wiahda dihp oh mourki mour riau. Soangen mour wet kin duwehte atail nda me kitail sohte kesempwalki douluhl oh kalahnganki tomwo. Ahpw kitail pahn kasalehda atail kalahngan sang ni atail doadoahk laud pwehn kolokol atail nanpwungmwahu rehn Siohwa. (2 Pit. 3:14) Kitail pahn kasalehda met sang ni atail koasoiaiong meteikan atail koapworopwor kaselel me pid komourpatail pwe irail ele pahn pil ahneki nanpwungmwahu rehn Siohwa oh pil koapworopwor ong ahnsou kohkohlahte. (1 Tim. 4:16) Siohwa oh sapwellime Ohl uhdahn warohng sapwellimaniki atail ahnsou oh kehl koaros me kitail kak pwehn kapinga ira. (Mark 12:28-30) Medewehla met! Kitail kak kasikasik ahnsou me kitail pahn uhdahn mwahula sang soumwahu en dihp. Kitail kak mourki mour unsek kohkohlahte duwen me Koht kupwurki, met pwehki dahme Siohwa ketin wia pwehn komourkitailla.—Rom 8:21.

[Nting tikitik me mi pah]

Ia Duwen Omw Pahn Sapeng?

• Dahme kahrehda ke uhdahn anahne komourpomw?

• Ia duwen sapwellimen Sises wiewia en tounmetei eh kamwakid uhk?

• Ia omw pepehm duwen sapwellimen Siohwa kisakis en tomw?

• Dahme ke pahn men wia pwehki sapwellimen Siohwa koasoandi kan ong komourpomw?

[Kawehwehpen kilel kan nan ehu ehu pali 29]

Ni Rahn en Tomw, samworo lapalap en Israel kin mwete Mesaia

[Kawehwehpen kilel kan nan ehu ehu pali 30]

En Eipraam pwungki wia meirong padahkihong kitail duwen tounmetei laud me Siohwa ketin wiahda