“Direkihla Ngoang Pwehki Sapwellimen Koht Manaman”
“Kumwail dehr pohnkahke ong amwail doadoahk. Kumwail direkihla ngoang pwehki sapwellimen Koht manaman. Kumwail papah Siohwa.”—ROM 12:11, NW.
1. Dahme kahrehda mehn Israel kan kin wia meirong en mahn akan oh meirong teikan kan?
SIOHWA ketin kalahnganki meirong kan me sapwellime ladu kan kin wia pwehn kasalehda arail limpoak ong ih oh arail uhpahiong kupwure. Mahs e kin ketin ale meirong en mahn akan oh meirong teikan. Mehn Israel kan kin wia meirong pwukat nin duwen Kosonned en Moses pwehn ale mahkpen diparail kan oh kasalehda arail kalahngan. Nan mwomwohdisohn Kristian, Siohwa sohte kin kupwurki kitail en wia soangen meirong pwukat. Ahpw, nan irelaud 12 en nah kisin likou ong Kristian kan en Rom, wahnpoaron Pohl kasalehda me kitail anahne wia meirong kan. Ia duwen atail pahn wia met?
Mehn Meirong Momour
2. Nin duwen Kristian akan, soangen mour dah me kitail kin mourki? Dahme met kin pidada?
2 Wadek Rom 12:1, 2. Ni tepin nah kisinlikouo, Pohl kasalehda ni sansal me sohte lipilipil ma irail mehn Suhs de mehn liki, Kristian keidi kan kin pwungla rehn Koht sang ni ar pwoson a kaidehn wiewia kan. (Rom 1:16; 3:20-24) Nan irelaud 12, Pohl kawehwehda me Kristian akan anahne kasalehda ar kalahngan sang ni ar mourki mouren tounmetei. Pwehn kapwaiada met, kitail anahne wekidala atail madamadau. Pwehki atail sohsohki soh unsek, kitail mi pahn “kosonned en dihp oh mehla.” (Rom 8:2) Eri kitail anahne atail lamalam en “onohnsapahlda” sang ni atail pahn wekidala mehlel atail madamadau. (Ep. 4:23) Kitail kak wia soangen wekidekla wet ihte ni atail ale sawas sang rehn Koht oh sapwellime manaman. Kitail pil anahne nantihong doadoahngki atail kehl en madamadau. Met wehwehki me kitail anahne wia uwen me kitail kak en dehr “kahlemengih wiewia kan en sampah wet” me direkihla tiahk samin kan, mehn kamweit suwed, oh madamadau sapwung.—Ep. 2:1-3.
3. Dahme kahrehda kitail kin kapwaiada wiewiahn Kristian kan?
3 Pohl pil luke kitail en doadoahngki atail kehl en madamadau pwehn “esehda dahme kupwuren Koht—dahme mwahu, oh dahme e kin ketin kupwurperenki, oh dahme unsek.” Dahme kahrehda kitail kin wadek Paipel rahn koaros, doudouloale dahme kitail wadek, kapakap, towehda mihting kan, oh iang kalohki rongamwahu en Wehio? Ia duwe, met pwehki elder kan nan mwomwohdiso kin kangoange kitail en wia mepwukat? Mehlel, kitail kin kalahnganki en elder kan mehn kataman kan. Ahpw, kitail kin kapwaiada wiewia pwukat en Kristian pwehki sapwellimen Koht manaman kin kamwakid kitail en kasalehda atail limpoak ong Siohwa. Patehng met, kitail uhdahn kamehlele me en wia soangen wiewia pwukat iei kupwuren Koht ong kitail. (Sek. 4:6; Ep. 5:10) Kitail kin diar peren oh nsenamwahu ni atail ese me sang atail kin mourki mouren Kristian mehlel, kitail kak pwungla rehn Koht.
Soangsoangen Kisakis kan
4, 5. Ia duwen elder kan arail pahn doadoahngki arail kisakis kan?
4 Wadek Rom 12:6-8. Pohl kawehwehda me “pwaisatail [“atail kisakis,” NW] me wekpeseng ni soangen doadoahk kan me konehng kalahngano me Koht ketikihong kitail.” Ekei kisakis kan me Pohl koasoia iei apwalih oh kakehlaka loalen meteikan oh met kin keieu dokedoke elder kan me kin ale kaweid en “doadoahk laud” pwehn apwalih mwomwohdiso.
5 Pohl kasalehda me soangen ngoang wet anahne sansalda ni sounapwalih kan ar kin papah nin duwen sounpadahk kan oh wia “doadoahk en papah.” Iren Paipel pwukat mwomwen kasalehda me Pohl kin koasoia duwen “doadoahk en papah” ehu me kin wiawi nan mwomwohdiso, de “nan paliwarteieu.” (Rom 12:4, 5) Doadoahk wet duwehte dahme kileldi nan Wiewia 6:4, me wahnpoaron ko koasoia: “Se pahn mweidohng at ahnsou unsek ong kapakap oh doadoahk en wia padahk.” Dahme doadoahk wet kin pidada? Elder kan kin doadoahngki arail kisakis kan pwehn kakehlaka tohn mwomwohdiso kan. Irail kin kasalehda me irail “uhdahn pahn papah” ni arail kin ngoangki kihong mwomwohdiso kaweid oh padahk me poahsoankihda Mahsen en Koht. Re kin wia met sang ni ar kapakapki sawas oh wia arail onop, roporop, padahk oh apwalih sounkalohk kan en mwomwohdiso. Sounapwalih kan anahne pwerisekiong arail kin doadoahngki ar kisakis kan oh “perenki” apwalih sihpw kan.—Rom 12:7, 8; 1 Pit. 5:1-3.
6. Ia duwen atail kak idawehn kaweid en Rom 12:11 me mi ni tepin iren onop wet?
6 Pohl doula oh koasoia: “Kumwail dehr pohnkahke ong amwail doadoahk. Kumwail direkihla ngoang pwehki sapwellimen Koht manaman. Kumwail papah Siohwa.” (Rom 12:11, NW) Ma kitail diar me atail ngoang en kalohk kin tikitikla, kitail ele anahne kamwahwihala atail koasoandi kan en onop oh kalapw kapakapki sapwellimen Koht manaman ni ngidingid. Met kak sewese kitail en pelianda pepehm en solahr ngoang oh en kakehlaka kitail. (Luk 11:9, 13; Kaud. 2:4; 3:14, 15, 19) Sapwellimen Koht manaman kakehlaka tepin Kristian kan en koasoia duwen “soangen manaman kapwuriamwei kan me Koht ketin wiadahr.” (Wiewia 2:4, 11) Duwehte met, e kak kamwakid kitail en ngoangki kalohk oh “direkihla ngoang pwehki sapwellimen Koht manaman.”
Aktikitik oh Pohnese me Kitail Sohte Kak Wia Soahng Koaros
7. Dahme kahrehda kitail en papah ni aktikitik oh pohnese me mie soahng kan me kitail sohte kak wia?
7 Wadek Rom 12:3, 16. Kisakis kan me kitail ahneki kohsang sapwellimen Siohwa “kalahngan.” Pohl pil koasoia: “At koahiek kin kohsang rehn Koht.” (2 Kor. 3:5) Kahrehda kitail en dehr kapinga pein kitail. Kitail en pohnese ni aktikitik me atail pweida nan atail doadoahk en papah iei kapai ehu sang Koht ahpw kaidehn sang pein atail koahiek. (1 Kor. 3:6, 7) Me pahrekiong met, Pohl koasoia: “I ndaiong kumwail koaros: kumwail dehr medemedewe me kumwail me lapalap.” E konehng en mie wahu ong pein kitail oh diar peren oh nsenamwahu ni atail papah Siohwa. Ahpw, atail kin pohnese me mie soahng kan me kitail sohte kak wia pahn pere kitail sang ahneki lamalam me kitail ese soahng koaros. Kitail men ‘mehlel ni atail medemedewe pein kitail.’
8. Ia duwen atail kak pere kitail sang “akloalokong”?
8 E pahn wia elen soaloalokong en suweiki atail pweida kan pwehki Koht “me kin ketin kakairada tuhkeo.” (1 Kor. 3:7) Pohl koasoia me Koht ketikihong emenemen tohnmwomwohdiso “uwen pwoson” ehu. Kitail en dehr medemedewe me kitail mwahusang meteikan ahpw kitail en pohnese ar pweida kan me kin kohsang ni uwen pwoson me re ahneki. Pohl pil koasoia: “Kumwail kesempwalki aramas koaros.” Nan pil ehu nah kisinlikou, e padahkihong kitail en “dehr wia mehkot sang ni amwail ineng en roporop ong pein kumwail de suwei mwahl; ahpw kumwail mpahipene nanpwungamwail, oh dehr wiahki me kumwail mwahusang aramas teikan.” (Pil. 2:3) Kitail anahne aktikitik mehlel oh nantihong pohnese me emenemen riatail kan kin mwahusang kitail ni ahl tohto. Aktikitik pahn pere kitail sang “akloalokong.” Mendahki atail pwukoa kan nan mwomwohdiso kak kahrehiong meteikan en tehk kitail, kitail koaros pahn diar peren mehlel ni atail wia “aramas tikitik kan” oh wia kisin doadoahk kan me aramas sohte kin tehk.—1 Pit. 5:5.
Minimin nan Mwomwohdiso
9. Dahme kahrehda Pohl kapahrekihong Kristian keidi kan duwehte kakon kan nan paliwarteieu?
9 Wadek Rom 12:4, 5, 9, 10. Pohl kapahrekihong Kristian keidi kan duwehte kakon kan nan paliwarteieu me kin miniminpene oh papah arail Tapwi, Krais. (Kol. 1:18) E katamankin Kristian keidi kan me paliwar ehu kin mie kakon tohto me kin wiewia pwaise kan oh e nda: “Mehnda ma kitail me tohto, ahpw kitail wia warteieu rehn Krais.” Pil duwehte met, Pohl kangoange Kristian keidi kan nan Episos: “Ni atail pahn momourki me mehlel oh limpoak, kitail pahn keirda ni mehkoaros rehn Krais, me iei moangatail. Eri, pahn sapwellime manaman, kakon akan en paliwar wet kin sonamwahupene, oh paliwaro unsek kin tengetengkipene kakon koaros. Eri, ni ehuehu kakon eh kin wiewia pwaise, paliwar unsek kin keirda oh laudla ni limpoak.”—Ep. 4:15, 16.
10. Ihs irail kan me ahneki manaman me “sihpw teikan” anahne pohnese?
10 Mendahki “sihpw teikan” sohte kin iang wia kisehn paliwar en Krais wet, irail kak sukuhlki sang karasaraso. (Sohn 10:16, NW) Pohl koasoia me Siohwa “ketikihong pahn aluweluwen Krais mehkoaros, oh ketin kasapwilada en wiahla Kaunen mehkoaros oh tapwin mwomwohdiso.” (Ep. 1:22) Rahnwet, sihpw teikan kin wia kisehn “mehkoaros” me Siohwa ketikihong Sapwellimeo pwehn wia arail tapwi. Irail pil iang kisehn “dipwisou kan” me Krais ketikihong sapwellime “ladu lelepek oh loalokong.” (Luk 12:42-44) Eri, irail kan me ahneki koapworopwor en mour nin sampah anahne pohnese Krais nin duwen arail Tapwi oh uhpahiong ladu lelepek oh loalokong oh wiliepe, Pwihn me kin apwalih mwomwohdiso nan sampah pwon, oh pil ohl kan me idihdda pwehn apwalih mwomwohdiso. (Ipru 13:7, 17) Met kin sewese miniminpenehn mwomwohdiso en Kristian.
11. Atail miniminpene kin poahsoankihda dah? Kaweid dahieu me Pohl pil kihda?
11 Soangen miniminpene wet kin poahsoankihda limpoak, “me kin kapatapene oh oarepene mehkoaros pwe en wiahla ehu ni mehlel.” (Kol. 3:14) Nan Rom irelaud 12, Pohl kasalehda kesempwalpen met ni eh koasoia me atail limpoak anahne “uhdahn mehlel” oh kitail anahne “limpoakpene” nin duwen “limpoak en [“riatail,” NW].” Met kin kahrehda wahupene duwehte me e nda: “Kumwail wahupene nanpwungamwail.” Kitail en dehr wiahki me limpoak iei en pohnsehsehla dahme uhdahn anahne kapwungpwungla. Kitail anahne wia uwen me kitail kak pwehn kolokol mwakelekel en mwomwohdiso. Ni eh kihda kaweid duwen limpoak, Pohl pil nda: “Kumwail tatki me suwed kan, oh tengeteng ni me mwahu kan.”
Kasamwo ni Kadek
12. Dahme kitail kak sukuhlki sang Kristian kan en Masedonia me pid duwen sewese meteikan?
12 Wadek Rom 12:13. Atail limpoak ong riatail kan pahn kamwakid kitail en wia uwen atail kak pwehn ‘kisekisehki riatail Kristian semwehmwe kan atail dipwisou kan.’ Mehnda ma kitail semwehmwe, kitail kak ehukihong meteikan dahme kitail ahneki. Pohl koasoia duwen Kristian kan en Masedonia: “Irail inenen tihwohkihla lokolok laud kei me lelohng irail, ahpw arail peren me laud mehlel. Ihme nan arail semwehmwe, re kasalehda ar kupwur sapan ni meirong me re wiahda. Pwehki ngehi I pein kadehde duwen ar kihda uwen me re kak oh pil laudsang. Sang ni pein nsenarail re ngidingidkihong kiht se en ale ar kisakis kan oh re en iang wia sawas ong [“aramas sarawi,” NW] en Sudia kan.” (2 Kor. 8:2-4) Mendahki Kristian akan en Masedonia semwehmwe, irail uhdahn kadek. Re kin kilangwohng met nin duwen pwais kaselel ehu en sewese riarail kan nan Sudia me anahne sawas.
13. Ia wehwehn en “kasamwo mehn keiru kan”?
13 Lepin lokaia pwukat “kasamwo mehn keiru kan” kin pid tiengla mwowe ni lokaiahn Krihk. Ehu kawehwehn Paipel kawehwe nin duwen met: “Rapahki ahnsou mwahu en kasamwo ni kadek.” (The New Jerusalem Bible) Irair wet kin ekei pak sansalda sang ni emen eh kin luke meteikan en iang ih mwenge, oh e mwahu ma met kin wiawi ni limpoak. Ahpw ma kitail kin tiengla mwowe, kitail pahn diar ahl tohto en kasalehda kadek. Ma atail irair kahrehiong atail sohte kak luke meteikan en iang kitail mwenge, en luke irail en iang kitail nim koahpi de uhpw ape. Met pil wia elen kasamwo ni kadek.
14. (a) Lepin lokaia kan en Krihk me kin wehwehki kasamwo ni kadek kin wiawihkihda mehnia lepin lokaia kan? (b) Ia duwen atail kak nsenohki aramas en sahpw teikan nan atail kalohk?
14 Kasamwo ni kadek kin pidada mwomwen atail madamadau. Ni lokaiahn Krihk, lepin lokaia kan me kin kasalehda irair wet kin wiawihkihda lepin lokaia kan me iei “limpoak” oh “mehn keiru men.” Ia atail pepehm ong mehn keiru kan? Ehu ahl en kasalehda kadek iei ni atail kin nantihong skuhlki ehu lokaia tohrohr pwehn kalohki rongamwahwo ong aramas en sahpw teikan me kasaudo nan atail wasahn kalohk. Ei, me tohto rehtail sohte kak sukuhlki ehu lokaia tohrohr pwehki atail irair. Ahpw, kitail koaros kak sewese aramas en sahpw teikan ni atail doadoahngki neitail pwuhk me oaralap koasoia, Rongamwahu ong Aramas en Wehi Koaros (Good News for People of All Nations), me kin audaudki padahk en Paipel ni lokaia tohto. Ke kin pweida ni omw doadoahngki pwuhk wet nan kalohk?
Pehm Dahme Meteikan Kin Pehm
15. Ia duwen Sises eh ketin kasalehda mouren kaweid en Rom 12:15?
15 Wadek Rom 12:15. Mour en kaweid en Pohl kin kasalehda me kitail en pehm dahme meteikan kin pehm sohte lipilipil ma re peren de pahtou. Ma kitail en direkihla ngoang pwehki sapwellimen Koht manaman, atail pepehm en iang irail peren oh poakehla pahn sansalda. Ni ahnsou me sapwellimen Krais tohnpadahk isiakan ko pwurodo ni peren oh koasoia duwen pweida mwahu en arail doadoahk en kalohk, Sises “ketin direkihla peren laud en nan kupwure.” (Luk 10:17-21) E ketin iang irail peren. Ni pali teio, Sises ketin “iang sengiseng rehn me kin sengiseng kan” ni ahnsou me kompoakepah Lasarus mehla.—Sohn 11:32-35.
16. Ia duwen atail kak pehm dahme meteikan kin pehm? Ihs me uhdahn anahne wia met?
16 Kitail men kahlemengih Sises ni atail kin pehm dahme meteikan kin pehm. Ni ahnsou me riatail kan perenda, kitail men kasalehda ni sansal me kitail pehm duwehte irail. Kitail pil anahne pehmitikiong arail lokolok oh pahtou. Kitail kak kalapw kansenamwahwihala riatail kan me kin pahtoula ma kitail kin rong kanahieng arail koasoi oh song en wehwehki arail pepehm. Oh ekei pak, mohngiongitail kin mwekidki arail pepehm oh kakete sansalda ni pilen mesatail kin keredi. (1 Pit. 1:22) Mehlel, elder kan anahne kapwaiada kaweid en Pohl me pid en pehm dahme meteikan kin pehm.
17. Dahme kitail sukuhlki sang pwuhken Rom irelaud 12? Dahme kitail pahn tehkpene nan iren onop en mwuhr?
17 Iretikitik kan me kitail tehkpene nan pwuhken Rom irelaud 12 kin kihong kitail kaweid kan me kak kadoadoahk nan atail mour nin duwen Kristian akan oh atail nanpwungmwahu rehn riatail kan. Nan iren onop en mwuhr, kitail pahn kasawih iretikitik teikan en irelaud wet, me koasoia duwen ia pahn atail pepehm oh wiewia ong aramas akan likin mwomwohdisohn Kristian iangahki me kin uhwong oh kaloke kitail.
Kousapahl
• Ia duwen atail kasalehda me kitail “direkihla ngoang pwehki sapwellimen Koht manaman”?
• Dahme kahrehda kitail anahne aktikitik oh pohnese uwen atail kak ni atail kin papah Koht?
• Ia duwen atail pahn poakehla riatail kan oh pehm arail pepehm?
[Kawehwehpen kilel kan nan ehu ehu pali 10]
Dahme kahrehda kitail kin kapwaiada wiewia pwukat en Kristian?
[Kawehwehpen kilel kan nan ehu ehu pali 12]
Ia duwen emenemen kitail eh kak sewese aramas en sahpw teikan en sukuhlki duwen Wehio?