Dahme Mehlel Duwen Armakedon

“Ngehn suwed kan . . . pwarala rehn nanmwarki kan en sampah pwon, . . . ngehn ko eri kapokonepene nanmwarki kan wasa me adaneki ni mahsen en Ipru Armakedon.”​—KAUDIAHL 16:14, 16.

ARMAKEDON iei eden wasa ehu. Ahpw wasa kiset sohte uhdahn mie nin sampah.

Eri, dahme kahrehda lepin lokaia wet “Armakedon” kin kalapw pidada mehkot me kin wiawi me duwehte mahwen?

Pokonpene nan Wasa me Adaneki Armakedon

Uhdahn lepin lokaiahn Ipru Armakedon wehwehki “Nahnahn Mekiddo.” Mendahki sohte nahna ieu me adaneki met, mie wasa ehu me adaneki Mekiddo. E kin mi wasa kesempwal ehu, wasa me ahllap pahieu tuhpene ie ni paliepeng en palikapi en wasa me mehn Israel en mahs ko kin kousoan ie. Mahwen kesempwal tohto kin wiawi karanih wasao. Ihme kahrehda, Mekiddo wiahla ahd ehu me kin pidada mahwen.a

Ahpw ire kesempwal duwen Mekiddo iei kaidehn mahwen dah me wiawi wasao, ahpw ia kahrepen arail kin wiawi. Mekiddo iei ehu wasa me mi nan Sapwen Inowo me Siohwa Koht ketikihong mehn Israel kan. (Eksodus 33:1; Sosua 12:7, 21) E ketin inoukihong irail me e pahn ketin mahwenkin irail oh e ketin wia met. (Deuderonomi 6:18, 19) Karasepe, Mekiddo iei wasao me Siohwa ketin wiahda manaman pwehn doarehla mehn Israel kan oh mahweniong nein Nanmwarkien Kenan Sapin sounpei kan oh nah kaunen sounpei Sisera.​—Sounkopwung 4:14-16.

Ihme kahrehda lepin lokaia “Armakedon” kin karasahiong mehkot kesempwal. E kin pidada mahwen ehu me pwihn kehlail riau kin uhpene.

Kokohp nan pwuhken Kaudiahl kin koasoia ehu ahnsou me kerendohr ni Sehdan oh ngehn saut akan arail pahn kamwakid palien koperment ren kapokonepene neirail sounpei kan, oh pelianda sapwellimen Koht aramas akan oh arail doadoahk. Pelian wet pahn imwikihla aramas rar kei ar mehla ni Koht eh pahn ketin poweiraildi.​—Kaudiahl 19:11-18.

Dahme kahrehda Koht me Paipel kin mahsanih “me kin kupwur mahk; me kin kupwurkalahngan oh limpoak, me sohte kin mwadang engiengda,” pahn ketin kahrehda aramas tohto en mehla? (Nehmaia 9:17) Pwehn wehwehki sapwellimen Koht wiewia kan, kitail anahne sapengala peidek siluh pwukat: (1) Ihs me pahn tapihada mahwen wet? (2) Dahme kahrehda Koht eh pahn ketin pidada? (3) Dahme mahwen wet pahn wiahiong sampah oh towe kan kohkohlahte?

1. IHS ME PAHN TAPIHADA MAHWENO?

Kaidehn Koht me pahn tapihada mahwen en Armakedon. Ahpw, Koht pahn ketin doarehla aramas mwahu kan sang irail kan me pahn kauweirailla. Irail me pahn tapihada mahweno iei “nanmwarki kan en sampah pwon,” me wehwehki kaunen sampah kan. Dahme kahrehda re pahn wia met? Pwehki Sehdan pahn kamwakid palien koperment oh sounpei kan pwehn peiong irail koaros me kin kaudokiong Siohwa Koht.​—Kaudiahl 16:13, 14; 19:17, 18.

Pwehki rahnpwukat aramas akan nan ekei sahpw kin kesempwalki saledek en koasoi oh saledek en pelien lamalam, madamadau me koperment pahn irehdi de kihsang wiewia kan en pelien lamalam mwomwen sohte pahn wiawi. Ahpw soahng wet wiawiher erein sounpar 100 samwalahro oh e pil wiewiawi met.b Ahpw mie wekpeseng laud riau nanpwungen soangen uhwong pwukat oh me pahn wiawi ni Armakedon. Keieu, uhwong wet pahn wiawi nan sampah pwon. Keriau, Siohwa pahn ketin pelianda uhwong wet laud sang mahs. (Seremaia 25:32, 33) Paipel kawehwehda mahwen wet nin duwen “mahwen me pahn wiawi ni Rahn Lapalap en Koht, Wasa Lapalahpie.”

2. DAHME KAHREHDA KOHT EH PAHN KETIN PIDADA?

Siohwa ketin kaweidkin irail me kin kaudokiong ren kin wia aramas meleilei oh poakohng arail imwintihti kan. (Maika 4:1-3; Madiu 5:43, 44; 26:52) Eri, re sohte pahn pei ni ahnsou me uhwong laud pahn wiawihong irail. Ma Koht sohte pahn ketin mwekid en doarehla sapwellime aramas akan, irail koaros pahn kasohrala. Ihme kahrehda mwaren Siohwa Koht de dahme aramas pahn medewehki ih pahn iang pidada. Ma imwintihti en sapwellimen Koht aramas akan pahn kak kasohrehla irail koaros, e pahn kahrehda Siohwa eh pahn mwomwen sempoak, sapahrek, oh luwet. Met uhdahn sohte kak wiawi!​—Melkahka 37:28, 29.

Koht sohte ketin kupwurki kasohrehla emen, kahrehda e ketin kairehkin koaros dahme e pahn ketin wia. (2 Piter 3:9) Sang dahme kileldi nan Paipel, e kin ketin katamanki koaros me mahs e ketin kaloke irail akan me kin uhwong sapwellime aramas akan. (2 Nanmwarki 19:35) Paipel pil kin katamanki me ni ahnsou kohkohdo ni Sehdan oh nah pelien koperment oh pelien sounpei kan arail pahn uhwongada sapwellimen Koht aramas akan, Siohwa pahn pil ketin peiong irail. Ni mehlel, Mahsen en Koht kohpadahr me Siohwa pahn ketin kasohrehla me suwed akan. (Lepin Padahk 2:21, 22; 2 Deselonika 1:6-9) Ni ahnsou me met pahn wiawi, sohte emen rehn soun uhwong pwukat pahn peikasalki me re peiongadahr Koht Wasa Lapalahpie.​—Esekiel 38:21-23.

3. IA PAHN IMWILAHN MAHWEN WET?

Mahwen en Armakedon pahn doarehla mour en aramas rar kei. Ni mehlel, e pahn uhdahn kahrehda popohl nin sampah.​—Kaudiahl 21:3, 4.

Pwuhken Kaudiahl kin koasoia duwen “pokon ehu me inenen kalaimwuhnie” me sohte aramas kak wadekedi me pahn pitsang mahwen wet. (Kaudiahl 7:9, 14) Koht pahn ketin kaweid irail pwukat pwe ren wiahiong sampah en wiahla Paradais nin duwen Siohwa eh ketin kupwurki sangete mahs.

Kitail ese iahd me mahwen ong sapwellimen Koht aramas akan pahn wiawi?

[Nting tikitik kan me mi pah]

[Kilel nan pali 6]

Siohwa Koht ketin doarehla sapwellime aramas akan mahs

[Kilel nan pali 7]

Siohwa pahn ketin pwurehng doarehla sapwellime aramas akan ni mahwen en Armakedon