Dahme Kahrehda Sounkaronge Kapakapo Ketin Mweidohng Lokolok en Mie?
MENDAHKI ekei aramas kin kapakap, ahpw re kin peikasalki me mie Koht. Dahme kahrehda? Ele pwehki re kin kilang lokolok laud wiewiawi nin sampah. Mie pak me ke medewe dahme kahrehda Koht ketin mweidohng lokolok en mie?
Ia duwe, Koht uhdahn ketin kapikada aramas ren ahneki soh unsek oh lokolok? Kitail sohte kak wauneki koht emen me kin men aramas akan ren lokolok. Medewehla met: Ke alu pidakih oh kilikilang sidohsa kapw ehu ahpw ni omw lel apali sidohsao, ke diarada ni imwio me mie ohla ieu wasao. Ke pahn medewe me me wiahda sidohsao me kihong ohlao en mi mwo? Soh! Ke pahn uhdahn medewe me me wiahda sidohsao wiahda sidohsao ni “unsek” ahpw mie emen de mehkot me kauwehla.
Pil duwehte, ni atail kin kapinga soandi mwahu oh wiawihda en sampah wet oh eri kilang pingiping oh mwersuwed me kahrehiong aramas akan lokolok, dahme kitail anahne medewe? Paipel padahkihong kitail me Koht ketin kapikada tepin pwopwoudo unsek, ahpw mwuhr ira me kahrehda ara sohla unsek. (Eklesiasdes 7:29; Rom 5:12) E kin wia rohng mwahu ehu me Koht ketin inoukihda me e pahn ketin kamwahwihala kahpwal wet, me iei en kahrehiong aramas akan ren pwurehng unsekla. Ahpw dahme kahrehda e ketin kanengamahki ahnsou werei?
Dahme Kahrehda E Nohn Wereiki?
Kahrepeo kin pidada peidek duwen ihs me pahn kaunda aramas. Siohwa sohte ketin kupwurki aramas en pein kaunda irail. Ahpw ih me pahn ketin wia arail Kaun. Paipel mahsanih: “Sohte mehmen me kaunda pein imwilahn eh mour; sohte aramas emen me kaunda pein eh mour.” (Seremaia 10:23) E kansensuwed me tepin pwopwoudo pilada ira en uhwongada sapwellimen Koht kaunda. Ara pelianda kosonned kahrehiong ira en wiahla aramas dipan kei. (1 Sohn 3:4) Imwilahn met, re sohla unsek oh kahrehda kahpwal ong ira oh kadaudokara kan.
Erein sounpar kid kei, Siohwa ketin mweidohng aramas en kaunda pein irail, ahpw poadopoad kasalehda me aramas sohte ahneki koahiek en wia met. E kasalehda me koperment kan koaros en aramas kin kahrehda lokolok. Sohte emen rehrail me kihsangehr mahwen, tiahk lemei, kopwung sapahrek, de soumwahu.
Ia Duwen Koht Eh Pahn Ketin Kamwahwihala Kahpwalo?
Paipel inoukihda me ahnsou keren Koht pahn ketin wiahda sampah kapw ehu. (2 Piter 3:13) Irail kante me pein pilada ren kasalehda limpoak ong emenemen oh pil ong Koht me pahn kousoan wasao.—Deuderonomi 30:15, 16, 19, 20.
Paipel pil mahsanih me ni “rahnen kadeik” me pahn kereniong wiawi, Koht pahn ketikihsang lokolok oh pil irail kan me kin kahrehda. (2 Piter 3:7) Mwurin mwo, Kaun me Koht ketin idihada, Sises Krais, pahn kaunda aramas peik kan. (Daniel 7:13, 14) Dahme kaundahn Sises pahn kapwaiada? Paipel mahsanih: “Me aktikitik kan pahn sapwenikihla sahpwo oh re pahn paiamwahu oh popohl.”—Melkahka 37:11.
Nin duwen Nanmwarki en nanleng, Sises pahn ketin kamwahwihala kahpwal, me iangahki soumwahu, mahla, oh mehla me kohsang aramas ara pelianda Siohwa, me wia “poahsoan en mour koaros.” (Melkahka 36:9) Sises pahn ketin kamwahwihala koaros me kin pwungki sapwellime kaunda limpoak. Pahn sapwellime kaunda, inou en Paipel pwukat pahn pweida:
◼ “Sohte emen me kin kousoan nan sahpwo pahn kaulimkihla eh soumwahu, oh koaruhsie pahn ale lapwepen diparail kan koaros.”—Aiseia 33:24.
◼ “[Koht] pahn kin ketin limwihasang pilen masarail koaros. Mehla solahr pahn wiawi, solahr mwahiei, solahr nsensuwed, solahr medek. Soahng mering kan sohralahr.”—Kaudiahl 21:4.
E sou kaperen en ese me ahnsou keren Koht pahn ketin kapwaiada sapwellime inou en ketikihsang lokolok koaros? Ahpw ahnsou wet, kitail kak kamehlele me e pahn ketin karonge atail kapakap mehnda ma e ketin mweidohng lokolok en mie ahnsoukis.
Koht ketin karonge iuk mehnda ma omw kapakap kan kin kasalehda omw pahtou oh medek. E pil ketin kupwurki ken mour lel ahnsou me omw pepehm en peikasal oh medek koaros pahn sohrala.