Karanihala Kohto me Kin Ketin Karonge Kapakap

ME TOHTO kin kose me re kamehlele Koht ahpw re sohte kak kawehwehda dahme kahrehda re kamehlele. Re pil sohte kak kawehwehda dahme kahrehda pelien lamalam kin kalapw suwed oh dahme kahrehda Koht ketin mweidohng lokolok en mie. Ihte me re kak wia iei kapakap ong Koht emen me re sohte wehwehki.

Ahpw ke kak karanihala Koht. Ke kak kakehlakahla omw pwoson sang omw wehwehkihla duwen Koht me kin kahrehiong uhk ken poakohng oh kesempwalki ih. Pwoson mehlel kin poahsoankihda mehn kadehde kan. (Ipru 11:1) Ma ke sukuhlki dahme mehlel duwen Koht, ke kak esehla ih oh koasoiong duwehte kompoakepahmw men. Tehk dahme wiawihong ekei me kin kapakap mendahki ar kin peikasalki me mie Koht.

◼ Patricia, me kitail wadek mwoweo nan pwuhk wet, nda: “Ehu rahno, I mihmi rehn kompoakepahi kei ni ar tepida koasoia duwen pelien lamalam kan. I ndaiong irail duwen ei pedoisang nan imwato ahnsou me ei pahpao, me sohte kin kamehlele Koht, koasoakoasoiong emen Sounkadehdehn Siohwa me kalohkla ni imwato. Emen irail eri nda, ‘Mwein Sounkadehdehn Siohwa kan pwung.’

“Emen irail pil nda,‘Kitail sou kohla iang arail mihting oh kilang ma met mehlel?’ Ih met me se wia. Mendahki miehte at peikasal, ekei kiht doulahte iang mihting kan pwehki Sounkadehde ko uhdahn kadek.

“Ahpw, Rahn Sarawi ehu I rongada mehkot me wekidala ei madamadau. Me wia padahko kawehwehda dahme kahrehda aramas kin lokolok. I sohte kin nohn kamehlele me aramas wiawihda unsek oh me dihp oh mehla tepisang aramas tehmen oh uhd lelohng aramas koaros. E pil kawehwehda dahme kahrehda pwoulahn Sises anahn pwehn kapwurehdo dahme tepin aramas kasalongehla.a (Rom 5:12, 18, 19) I mwadangete wehwehkihda soahng koaros. I kin medewe, ‘Uhdahn mie Koht men me kin nsenohkin kitail.’ I pousehlahte onopki Paipel oh mwuhr, I diarada nan ei mour me I kak kapakap ong emen me uhdahn mie.”

◼ Allan, me kitail pil koasoiapenehr ni tapio, nda: “Ehu rahno, Sounkadehdehn Siohwa kan kalohkdo ni imwato oh ei pwoudo luke ira en pedolong pwehki e men ese dahme re kin koasoiahki duwen mour kohkohlahte nin sampah. I pwunodikihda met. Eri, ni ara awiawih, I kahrehla ei pwoudo at wasahn mwengeo oh ndaiong, ‘Ke dehr pweipwei. Ke sohte kak kamehlele soangen padahk ko!’

“E sapengkin ie, ‘Nna kohla kawehwehiong ira me ira sapwung.’

“Ni mehlel, I sohte kak kasalehda me ira sapwung. Ahpw ira uhdahn kadek oh kihong ie pwuhk ehu me koasoia ma mour kapikipikda de e pein miehla. Dahme pwuhko koasoia oh dahme e doadoahngki pwehn utungada padahk kan loale uhdahn sansal kahrehda I pilada ien kalaudehla ei esehla duwen Koht. I tepida onopki Paipel rehn Sounkadehde ko oh mwuhr diarada me dahme Paipel koasoia uhdahn weksang soahng koaros me I kin medewehiong pelien lamalam. Ni ei sukuhlki duwen Siohwa, I tepida kapakap ni oaritik. Mie soahng kei rehi me sohte mwahu kahrehda I kapakapki sawas. I kamehlele me Siohwa ketin sapengala ei kapakap kan.”

◼ Andrew me kin kousoan England nda: “Mendahki I kin kehlailki dahme I kamehlele oh perenki pelian sains, ahpw ihte kahrepen ei kamehlele padahk me dene mehkan pein miehla iei pwehki meteikan kin nda me padahk wet mehlel. I sohte kin kamehlele Koht pwehki soahng suwed koaros me wiawi.

“Ahpw ekei pak I kin medewe: ‘Ma mie Koht men nanleng, eri I men esehla wehwehn mour. Dahme kahrehda tiahk lemei oh mahwen uhdahn tohto?’ Ni ei kin lelohng apwal, ekei pak I kin kapakapki sawas, ahpw I sehse ihs me I kin kapakap ong.

“Mwuhr, mie emen me kihong ei pwoud kisin doaropwe me oaralap koasoia Will This World Survive? (lokaiahn wai) me Sounkadehdehn Siohwa kan wiahda. Ih peidek wet me I kin kalapw medemedewe. Kisin doaropwe wet kahrehda ien medewe duwen Paipel, ‘Mie katepen ei pahn tehk pasapeng kan sang Paipel?’ Mwuhr, ahnsou ehu me I mwemweitla ekis wasa, mie me kihdo nei pwuhk me oaralap koasoia The Bible—God’s Word or Man’s? (lokaiahn wai)b Ni ei diarada me Paipel kin pwungiong palien sains, I pehm me I anahne kalaudehla ei sukuhlki. Eri, ni emen Sounkadehdehn Siohwa eh idek ma I men onopki Paipel, I pwungki. Ni ei wehwehkihla dahme Siohwa ketin kupwurki, I pehm me I esehla ih duwehte ei esehla emen me I kak koasoiong ni saledek nan kapakap.”

◼ Jan, emen me tikida nan pelien lamalam en Prohs nan London nda: “Mwalaun en pelien lamalam oh lokolok me kalapw wiawi kahrehda ei sohla iang sarawi. I pil sohla iang sukuhl laud oh I tepida kin koul oh kesengki kida pwe ien ale mwohni. I ahnsowo me I tuhwong Pat. E tikida nan pelien lamalam en Kadolik oh e duwehte ngehi me sohla kamehlele pelien lamalam.

“Se kin kousoan nan ihmw ehu me aramas sohla kin mi loale pil iangahki ekei me sohla iang sukuhl oh kin men ese duwen pelien lamalam kan nan sapwen Eisia. Ni pwong kan, se kin koasoakoasoiki awa tohto duwen kahrepen mour. Mendahki ngehi oh Pat sohte kamehlele Koht, se pehm me mie ‘kehl me kin kolokol mour.’

“Mwurin at keseula paliepeng en England pwehn rapahki doadoahk nin duwen sounkoul kei, se nainekihda pwutak emen. Ehu pwongo nait pwutako soumwahuda. I tepida kapakap ong Kohto me I sohte kamehlele. Mwurinte mwo, ngehi oh Pat nanpwungsuweda, ngehi eri wahda nait serio kohkohla. I pil pwurehng kapakapki sawas, ele mwein mie me pahn rongorong. I sehse me Pat pil wia soahngohte.

“Rahnohte, Sounkadehdehn Siohwa riemen letelet ni imwen Pat oh kasalehiong iren sawas kei sang nan Paipel. Pat telepwohndo rehi oh idek ma I men iang ih onop Paipel rehn Sounkadehde ko. Mwuhr se sukuhlki me ma se men kaperenda Koht, se anahne kapwopwoudla nin duwen kosonned. E mwomwen wia mehkot uhdahn apwal pwehki at nanpwungsuwed.

“Se men kalaudehla at esehla pweidahn kokohp kan en Paipel, kahrepen lokolok eh kin wiawi, oh pil dahkot Wehin Koht. Ekisekis, se esehla me Koht kin ketin nsenohki aramas oh se men wia dahme e kin ketin mahsanih. Se pwopwoudla. Erpit en Mahsen en Koht sewese kiht sen apwalihada nait seri silimeno. Se uhdahn kamehlele me Siohwa ketin karonge at kapakap kan.”

Pein Kasawih Mehn Kadehde kan

Duwehte me tohto teikan, irail kan me kitail koasoiapenehr kilangehr widing en pelien lamalam likamw kan oh esehda dahme kahrehda Koht ketin mweidohng lokolok en mie. Ke tehk me arail wehwehkihda loalokong pwung en Paipel me kahrehda ar kamehlele me Siohwa uhdahn kin ketin karonge kapakap kan?

Ke sou men kasawih mehn kadehde kan me mie Koht? Sounkadehdehn Siohwa kan pahn perenki sewese iuk ken sukuhlki duwen dahme mehlel duwen Siohwa oh ia duwen omw kak karanihala Kohto me kin ketin karonge kapakap.​—Melkahka 65:2.

[Nting tikitik kan me kileldi pah]

[Kilel nan pali 10]

“Ni ei wehwehkihla dahme Siohwa ketin kupwurki, I pehm me I ese ih nin duwen emen me I kak koasoiong ni saledek nan kapakap”

[Kilel nan pali 9]

Pwoson mehlel kin poahsoankihda mehn kadehde kan oh pil ineng en esehla me mehlel duwen Koht