Pahpa Nohno kan Apwalih Noumwail Seri kan

1, 2. (a) Ia ekei pwukoahn sounsilepen sihpw men nan Israel? (b) Ia duwen pahpa nohno kan ar duwehte sounsilepen sihpw kan?

NI MWEHIN mehn Israel kan mahs, mouren sounsilepen sihpw kan kin uhdahn apwal. Re kin anahne doadoahk likin ihmw ni ahnsoun karakar oh lemwulemwur. Re pil kin anahne doare neirail sihpw kan sang mahn lawalo kan oh lipirap akan. Sounsilepen sihpw kan kin ahnsou koaros tehk mwahu emenemen sihpw ko oh apwalih me kin soumwahu de ohla. Re kin kesempwalki sihmpwul kan pwehki irail luwet sang sihpw laud kan.​—Sen. 33:13.

² Kristian pahpa nohno kan anahne kasalehda irair kan me duwehte sounsilepen sihpw kan. Pahpa nohno kan ahneki pwukoa en kakairada neirail seri kan ni ahl me pahrekiong sapwellimen Siohwa koasoandi kan. (Ep. 6:4) Ia duwe, met kin ahnsou koaros mengei? Soh! Seri kan kin kalapw lelohng kasongosong kan me Sehdan kin kihda. Patehng met, mie pein arail luwet kan. (2 Tim. 2:22; 1 Sohn 2:16) Ia duwen omw kak sewese noumw seri kan? Kitail pahn koasoiapene ire siluh me ke kak wia pwehn apwalih irail: (1) esehla irail, (2) kamwenge irail, oh (3) kaweid irail.

ESEHLA NOUMW SERI KAN

3. Ia duwen pahpa nohno kan ar kak esehla mwahu neirail seri kan?

³ Sounsilepen sihpw mwahu men kin tehk kanahieng emenemen nah sihpw ko pwehki e men tehk mwahu me re sohte soumwahu. Ni elen karasaras, ke kak wia soahngohte ong noumw seri kan. Paipel mahsanih: “Ke anahne esehla mwahu mwomwen noumw pelin mahn.” (Lep. Pad. 27:23, NW) Pwehn wia met, ke anahne tehk mwahu mwomwen mwekid en noumw seri kan oh esehla arail madamadau oh pepehm kan. Ia duwen omw kak wia met? Ni omw pahn kin kalapw koasoiong noumw seri kan.

4, 5. (a) Kaweid mwahu dah kan me kak sewese seri kan ren koasoia ni saledek arail madamadau oh pepehm? (Menlau kilang tepin kilel.) (b) Dahme ke wiahier pwehn kamengeiong noumw seri kan en koasoiong uhk?

⁴ Ekei pahpa nohno kan diarada me e kin apwal en koasoiong neirail seri kan ni ahnsou me seri ko ekis laudla duwehte sounpar 13 kohda. Me pwulopwul pwukat ele sohte kin men koasoia arail madamadau oh pepehm kan. Ma noumw seri kan kin wia met, dahme ke kak wia? Dehr medewe me ke anahne koasoiaiong irail duwen ire kesempwal kan ni ahnsou reirei. Ahpw, song en koasoiong irail ni ahnsou me kumwail kin koasoakoasoipene ni saledek. (Deud. 6:6, 7) Kihong ahnsou kumwail en ehupene. Iang irail mwemweit. Luke irail kumwail en mwadong de wia soangsoangen doadoahk kan nan imwamwail. Ahnsou me noumw seri kan kin nsenamwahu, ele e mengei ong irail en koasoia arail madamadau oh pepehm kan.

⁵ Ia duwen ma noumw serio kahngete koasoiong uhk? Song ehu wiepe tohrohr. Karasepe, dehr idek rehn noumw serepeino “Dahme wiawiong uhk? Dahme ke wia rahnwet?” Ahpw ndaiong ih dahme wiawiong uhk de dahme ke wia rahno. Eri e pahn mengei ong ih en koasoia dahme wiawiong ih de dahme e wia rahno. De pwehn diarada ia eh pepehm duwen irair ehu, idek reh soangen peidek me duwehte “Mie pak ke kilang aramas wia soanget?” Ahpw dehr idek, “Ke wiahier soanget?” Ke kak idek reh ia pepehm en ienge kan duwen irairo. Mwuhr ke kak idek reh soangen kaweid dah me e kak padahkihong irail.

6. Ia duwen noumw seri kan ar kak ese me ahnsou koaros kin mie omw ahnsou ong irail oh re sohte pahn apwalki koasoiong uhk?

⁶ Noumw seri kan pahn men koasoiong uhk ma re ese me ahnsou koaros kin mie omw ahnsou ong irail oh re sohte pahn apwalki koasoiong uhk. Ma ke kin ahnsou koaros mwomwen nohn kedirepw oh sohte kalapw koasoiong irail, re sohte pahn men padahkihong uhk duwen arail kahpwal kan. Ia duwen omw kak ese me e sohte apwal ong irail en koasoiong uhk? Wia laudsang ndahte, “Ke kak koasoiong ie ahnsou koaros.” Noumw seri pwulopwul kan anahne ese me ke sohte pahn nsensuwedkihla de lingeringerkihda dahme re nda. Re pil anahne ese me arail kahpwal kan kin kesempwal ong uhk. Kayla, me sounpar eisek duwau, koasoia: “I kak koasoiaiong ei pahpao duwen soahng koaros. E sohte kin sopuk, oh e sohte kin kadeik; ihte me e kin wia iei rongorong. Mwuhr, e kin ahnsou koaros kihdo kaweid me keieu mwahu.”

7. (a) Ia duwen pahpa de nohno men eh kak toupahrek ni eh kin koasoia duwen ire ieu duwehte dating? (b) Ia duwen pahpa nohno ara kak kamwakara mwahl neira seri kan?

⁷ Ekei pak, mie ire apwal kan me ke pahn anahne koasoiaiong noumw seri kan, soahng kan duwehte iang pwutak de serepein (dating). Ni ahnsou me ke wia met, tehk mwahu pwe ken padahkihong irail ia mwomwen arail en wia met ni ahl pwung. Karasepe, medewehla ke kohla ni wasahn mwenge ehu oh ke diarada me doaropwehn pilada mwengeo kin ihte padahkihong uhk duwen mwenge kan me pahn kahrehda soumwahu. Ele ke pahn kohkohsang wasao oh kohla ni ehu wasahn mwenge tohrohr. Soahngohte pil kak wiawihong noumw seri kan. Ma omw kaweid kan ong irail kin audaudkihte peneu, ele noumw seri ko pahn lidorda oh sohla peki rehmw omw kaweid. (Wadek Kolose 3:21.) Ahpw, song en toupahrek. Sister pwulopwul men me adaneki Emily koasoia: “Ni ahnsou me ei pahpa oh nohno kin koasoiaiong ie duwen dating, re sohte kin ngilen kauwe ni ara koasoia ireo. Re kin koasoia ia uwen kaperen en esehla emen oh duwen rapahkihda emen me mwahu en pwoudikihda. Met sewese ien mengeiki koasoiaiong ira duwen ireo. I uhdahn men ira en ese ihs pwutak me I kin werekiong ahpw ien dehr ekihsang ira.”

8, 9. (a) Kapai dah kan me kohsang omw kin kanengamah, rong mwahu oh sohte sopuk? (b) Soangen pweida mwahu dah me pein kowe ahneki ni omw kin rong mwahu noumw seri kan?

⁸ Ken kanengamah oh ni kadek rong mwahu noumw serio. Met pahn kasalehda me e mengei en koasoiong uhk. (Wadek Seims 1:19.) Nohno kiripw men me adaneki Katia koasoia: “Mahs I uhdahn sohte kin kanengamahiong nei serepeino. I kin kalapw sopuk eh koasoi kan. I kin nohn pwang oh sohte kin rong ih de sohte men emen en kedirepwe ie. Ahpw met ni ei wekidala mwomwen ei wiewia, nei serepeino pil wia duwehte. Eh wiewia kan mwahula oh e kin men koasoia duwen eh pepehm kan laudsang mahs.”

⁹ Pahpa men me adaneki Ronald pil ahneki soangen irairohte rehn nah serepeino. E koasoia: “Ni ahnsou me e padahkihong ie me e poakepoake pwutak men ni eh wasahn sukuhlo, nin tapio I uhdahn lingeringerda. Ahpw ahnsou me I kin medewehla ia uwen Siohwa eh kin ketin kanengamah oh toupahrek ong sapwellime ladu kan, I medewe me e pahn mwahu ien mweidohng nei serepeino en kasalehda mahs eh pepehm kan mwohn ei pahn kapwungala ih. I perenkihda ei wia met! I ahpwtehn wehwehkihda pepehm en nei serepeino. Ni ahnsou me e nek eh koasoio, I diarada me e mengei en koasoiong ih ni elen limpoak. E kapwuriamwei me e uhdahn pwungki ei kaweido. E kasalehda ni mehlel eh men wekidala mwomwen eh wiewia kan.” Ni omw kin kaukaule koasoiong noumw seri kan, e pahn sewese iuk ken uhdahn ese dahme re kin medewe oh pehm. Imwilahn met, ke pahn iang pidada laud nan pilipil kan me re kin wiahda.a

KAMWENGE NOUMW SERI KAN

10, 11. Ia duwen omw kak sewese noumw seri kan ren mihmihte nan padahk mehlel?

¹⁰ Sounsilepe mwahu men kin ese me sihpw kan kak salongala. Sihpw men ele kak tepida kang dihpw ekis dohsang pelin sihpwo. Ekisekis e kin dohlahsang pelin sihpwo oh tohrohrala. Soahngohte pil kak wiawihong seri kan. Re kak ekisekis dohlahsang padahk mehlel. Mwein re kin ale kasongosong kan sang werek suwed de mehn kamweit keper kan. (Lep. Pad. 13:20) Ia duwen omw kak sewese kauhdi soangen irair wet en dehr wiawi?

¹¹ Ni omw kin padahki noumw seri kan, mwadang sewese irail ahnsou me ke diarada soahng kan me re anahne kamwahwihala. Pil sewese irail en kakehlakahda irair mwahu kan me re ahneki. (2 Pit. 1:5-8) Kaudok en Peneinei wia ahnsou mwahu ken wia met. Atail Doadoahk ong Wehio en October 2008 koasoia: “Tapwin peneinei kan ahneki pwukoa mwohn silangin Siohwa pwehn wia koasoandi en onop en Paipel kaukaule nin duwen peneinei ehu me katapan.” Ke kin doadoahngki soangen ahnsowo ni elen loalokong pwehn apwalih noumw seri kan? Kamehlele me noumw seri kan kin uhdahn kalahnganki omw nannanti en sewese irail.​—Mad. 5:3; Pil. 1:10.

12. (a) Ia duwen me pwulopwul kan ar paiekihda arail kin kaukaule wia kaudok en peneinei? (Pil menlau kilang koakon “Ira Kin Kalahnganki.”) (b) Ia duwen omw kin paiekihda pein omw kaudok en peneinei?

¹² Serepein pwulopwul men me adaneki Carissa oh eh peneineio kin paiekihda arail Kaudok en Peneinei. E koasoia: “I perenki me kiht koaros kak mwohndi oh koasoipene. Ni at wia met, e kin sewese kiht en ehupene oh sohte manokehla soangen ahnsou pwukat. Ei pahpao kin kaukaule wia at Kaudok en Peneinei. E kin kangoange ie ni ei kilang me e kesempwalki oh met kahrehiong ien pil iang kesempwalki. E pil kalaudehla kahrepen ei wauneki ih nin duwen ei pahpa oh tapwin peneinei nan at kaudok.” Sister pwulopwul men me adaneki Brittney koasoia: “Kaudok en peneinei kin kahrehiong ien karanihala ei pahpa nohno. E kin kasalehiong ie me ira men rong duwen ei kahpwal kan oh ira uhdahn nsenohkin ie. E kin sewese at peneineio en kehlail oh ehupene.” Mehn akadei me keieu kesempwal ong pahpa nohno kan iei en padahkihong neirail seri kan en poakohng Siohwa. Kaudok en peneinei iei ehu ahl me keieu mwahu en wia met.b

KAWEID NOUMW SERI KAN

13. Dahme kak kamwakid seri men en papah Siohwa?

¹³ Sounsilepe mwahu men kin doadoahngki nah sokon pwehn kaweid oh pere nah pelin sihpwo. Eh mehn akadei iei en kahluwahla nah sihpw ko nan ehu mohs mwahu. (Esek. 34:13, 14) Nin duwen pahpa de nohno men, ke pil ahneki soangen mehn akadeiohte. Ke men kaweid noumw seri kan ren papah Siohwa. Ke men noumw seri kan en ahneki pepehmohte me sounmelkahkao ntingihedi: “Maing ei Koht, ia uwen ei kin ngoangki kapwaiada kupwuromwien! I kin kolokol sapwellimomwi padahk kan nan mohngiongiet.” (Mel. 40:8) Ahnsou me noumw seri kan uhdahn ahneki pepehm wet, re pahn men inoukihong Siohwa arail mour oh papidaisla. Re anahne ahneki koahiek me itar pwehn wiahda pilipil kesempwal wet, oh re anahne uhdahn men papah Siohwa.

14, 15. (a) Ia mehn akadei en pahpa nohno kan? (b) Dahme kahrehda me pwulopwul men kakete peikasalki padahk mehlel?

¹⁴ Mwein noumw seri kan sohte mwomwen kekeirda nan arail nanpwungmwahu rehn Siohwa. Ele re peikasalki me dahme Sounkadehdehn Siohwa kan kamehlele iei me uhdahn mehlel. Dahme ke pahn wia? Nantihong kawehwe mwahu ong noumw seri kan, oh sewese ren poakohng Siohwa sang nan mohngiongirail. Padahkihong irail en kalahnganki soahng koaros me Koht ketin wiahiong irail. (Kaud. 4:11) Mwuhr, ahnsou me re onopadahr, re kak pein pilada ren kaudokiong Siohwa.

¹⁵ Ma noumw seri kan peikasalki padahk mehlel, ken kanengamah oh song en kaweid irail. Sewese irail en wehwehki me papah Siohwa iei ahl me keieu mwahu nan mour oh mie kamwahu kan me re kak paieki kohkohlahte. Pil ehu, song diarada uhdahn kahrepen arail kin peikasal. Karasepe, noumw pwutako uhdahn sapwungki dahme Paipel mahsanih, de e kin ihte masak en kalohk ong seri teikan? Ia duwe, noumw serepeino kin uhdahn peikasalki erpit en sapwellimen Koht kosonned kan, de e kin ihte pehm me e kelekelehpw oh sohte me men iang ih?

16, 17. Ia duwen pahpa nohno kan ar kak sewese neirail seri kan en ahneki nanpwungmwahu rehn Siohwa?

¹⁶ Ia duwen omw kak sewese noumw seri kan en powehdi arail peikasalki padahk mehlel? Pahpa nohno tohto kin pweida mwahu ni arail sewese neirail seri kan oh idek soangen peidek pwukat: “Ke medewe e mengei de e apwal en wia Kristian men? Ia kamwahu kan en wia Kristian men? Dahme ke pahn luhssang ma ke papah Siohwa? Ia omw pepehm ong kapai kan me kitail kin ale met oh pahn ale ni ahnsou kohkohdo? Kapai pwukat kesempwalsang dahme ke pahn luhssang?” Tehk mwahu pwe ken idek peidek pwukat ni pein omw lokaia oh kasalehda ni ahl kadek me ke uhdahn nsenohki ih. Dehr kahrehiong noumw seri kan ren pehm me ke kadekadeik irail. Erein omw koasoakoasoiong ih, ele ke pahn men koasoia Mark 10:29, 30. Ekei me pwulopwul kan ele men ntingihdi kamwahupen wia Kristian men oh pil soahng kan me re pahn luhssang. Met ele pahn sewese kowe oh noumw seri kan en kasawihada kahpwal kan me re ahneki oh diarada dahme pahn kamwahwihala kahpwal pwukat. Ma kitail anahne onopki pwuhken Paipel Padahngki oh pwuhken “Limpoak en Koht” rehn irail kan me kin men rong, ia uwen laud atail en wia met ong neitail seri kan! Ke kin wia met?

¹⁷ Ni arail kekeirda, noumw seri kan anahne pein pilada ma re pahn papah Siohwa de soh. Re sohte pahn wiahte met pwehki kowe me wiahda pilipilo ong pein kowe. Noumw seri kan anahne en mie pein arail nanpwungmwahu rehn Siohwa. (Lep. Pad. 3:1, 2) Ia duwen ma noumw serio apwalki karanihala Koht? Kangoange ih en kasawih dahme e kamehlele sang ni eh idek soangen peidek pwukat: ‘Ia duwen ahi ese me Koht ketin mie? Ia duwen ahi ese me Siohwa uhdahn ketin nsenohkin ie? I uhdahn kamehlele me ahi peikihong sapwellimen Koht kosonned kan pahn wia kamwahu ong ie?’ Pahpa nohno kan, wia sounsilepe mwahu kei oh kaweid noumwail seri kan ni kanengamah. Sewese irail en kamehlelehiong pein irail me en papah Siohwa iei ahl me keieu mwahu nan mour.c​—Rom 12:2.

18. Ia duwen pahpa nohno kan ar kak kahlemengih Siohwa, Sounsilepen Sihpw Lapalapo?

¹⁸ Kristian mehlel koaros men kahlemengih Sounsilepen Sihpw Lapalapo, Siohwa. (Ep. 5:1; 1 Pit. 2:25) Pahpa nohno kan anahne keieu esehla neirail pelin sihpw kan, me iei neirail seri kan me kesempwal. Pahpa nohno kan anahne kaweid neirail seri kan pwe ren kak ahneki kapai kan me sohte imwi me Koht ketin inoukihda. Ei, wia uwen amwail kak en apwalih noumwail seri kan oh kakairada irail en poakohng Siohwa!