Kesempwalki Omw Pwais en Iang Siohwa Doadoahk!

1. Ia duwen Siohwa eh kin ketin kilangwohng doadoahk, oh dahme e kin ketin wia me pid duwen doadoahk?

SIOHWA kin ketin perenki sapwellime doadoahk. (Mel. 135:6; Sohn 5:17) E ketin kupwurki tohnleng kan oh aramas akan en pil perenki arail doadoahk, eri e ketikihong irail doadoahk me kaperen oh katapan. Siohwa ketin mweidohng sapwellime Iehroso en iang pidada nan sapwellime doadoahk en kepikipik kan. (Wadek Kolose 1:15, 16.) Paipel padahkihong kitail me mwohn Sises eh ketido nin sampah, e kin ketiket rehn Koht nanleng nin duwen “sounsawas emen.”​—Lep. Pad. 8:30.

2. Ia duwen atail ese me tohnleng kan ahnsou koaros ahneki pwukoa kesempwal oh katapan?

² Sangete Senesis lel Kaudiahl, Paipel kin kawehwehda me Siohwa kin ketin ahnsou koaros ketikihong tohnleng kan doadoahk. Ni ahnsou me Adam oh Ihp dipada oh anahne pedoisang nan Paradaiso, Koht ketikihong tohnleng kan pwukoa ehu. Nan Senesis, kitail wadek me Koht “ketikihong ni palimesehn mwetuwel en Ihden kerup kei, oh kedlahs kisiniei pwoat me mpwul sirangarang pali koaros, pwe en silehsang aramas koaros tuhkehn komouro.” (Sen. 3:24) Nan Kaudiahl, kitail sukuhlki me Siohwa ketin “poaronedohr sapwellime tohnleng pwe en patohwanohng sapwellime ladu kan dahme pahn wiawi ahnsou keren.”​—Kaud. 22:6.

PWUKOA KAN ONG ARAMAS

3. Ni eh ketiket sampah, ia duwen Sises eh ketin alasang Semeo?

³ Ni Sises eh ketiket sampah, e kin kupwurperenki wia doadoahk me Siohwa ketikihong ih. E ketin alasang Semeo ni eh pil ketikihong pwukoa kesempwal ong sapwellime tohnpadahk ko. E kahrehiong irail en perenki arail pwukoa sang ni eh mahsanihong irail: “I ndaiong kumwail ni mehlel: mehmen me pwoson ie pahn wia doadoahk kan me I kin wia. Ei, e pahn wia me lapasang, pwehki I kohkolahng pahn kupwur en Sahmo.” (Sohn 14:12) Sises ketin sewese sapwellime tohnpadahk ko ren kilang me arail doadoahk karuwaru ni eh mahsanih: “Kitail uhdahn pahn nantihong wiewia doadoahk en ih me ketin kadariehdo isaneki eh rarahnte; pwe pwohng kerendohr, ahnsou me sohte emen kak wia doadoahk.”​—Sohn 9:4.

4-6. (a) Dahme kahrehda kitail kalahnganki me Noha oh Moses kapwaiada dahme Siohwa mahsanihong ira en wia? (b) Soahng riau dah me imwikihla doadoahk me Koht ketikihong aramas akan?

⁴ Mwohn Sises eh ketidihdo nin sampah, Siohwa kin ketikihong aramas akan doadoahk me kaperen oh kansenamwahu. Mendahki Adam oh Ihp ara sohte kanekehla ara pwukoa, aramas tohto kanekehla arail pwukoa me Koht ketikihong irail en wia. (Sen. 1:28) Siohwa ketikihong Noha kaweid kan ni oaritik ong ia duwen eh pahn kauwada warihmw ehu pwe ih oh eh peneineio en kak pitsang Nohliko. Noha wiahda soahng koaros me Siohwa ketin mahsanihong. Kitail momour rahnwet pwehki Noha kin kanahieng eh idawehn sapwellimen Siohwa kaweid kan.​—Sen. 6:14-16, 22; 2 Pit. 2:5.

⁵ Siohwa ketikihong Moses ni oaritik kaweid kan ong ia duwen eh pahn kauwada impwalo oh ia duwen eh pahn koasoanehdi pwihn en samworo kan. Moses wiahda soahng koaros me Siohwa ketin mahsanihong. (Eks. 39:32; 40:12-16) Dahme kitail sukuhlki rahnwet sang en Moses eh doadoahk laud oh eh peik? Nin duwen me Pohl kawehwehda, impwalo oh pwihn en samworo ko kin wia kilelepen “kamwahu kan me pahn kohdo.”​—Ipru 9:1-5, 9; 10:1.

⁶ Doadoahk me Koht ketikihong sapwellime ladu kan kin wekila ekei ahnsou pwehn pahrekiong pweidahn kupwureo. Ahpw mendahki doadoahk kan ele pahn wekila, doadoahk pwukat kin ahnsou koaros kalinganahla Siohwa oh wahdo kamwahu ong aramas akan. Met duwehte doadoahk me Sises ketin wia mwohn e ketido sampah oh erein e ketiket sampah. (Sohn 4:34; 17:4) Rahnwet, ni atail kin wia doadoahk me Siohwa ketikihong kitail, atail doadoahk kin kalinganahla ih. (Mad. 5:16; wadek 1 Korint 15:58.) Dahme kahrehda kitail kak ndahki met?

EN AHNEKI MADAMADAU PWUNG ONG PWUKOA KAN

7, 8. (a) Menlau kawehwehda doadoahk me Kristian kan rahnwet kin paieki wia. (b) Ia duwen atail pahn mwekidki sapwellimen Siohwa kaweid?

⁷ E wia pwais kaselel ehu me Siohwa ketin luke aramas soh unsek kan ren papah ih nin duwen ienge tohndoadoahk kei. (1 Kor. 3:9) Ekei Kristian ahneki pwais kaselel en iang wia doadoahk en kauwada ihmw, duwehte Noha oh Moses. Ekei ele sewese kauwada Wasahn Mihting Tohrohr kan, Wasahn Kaudok kan, oh ohpis en Sounkadehdehn Siohwa kan. Mehnda ma ke iang wia doadoahk en onohnsapahlda Wasahn Kaudok ehu de iang doadoahk en kauwada poasen kaun me mi Warwick, New York, ken kesempwalki omw pwukoa. (Menlau kilang tepin kilel me soun mahlen wiahda.) E wia kisehn atail kaudok ong Siohwa. Mehnda ekeite ele kak wia soangen doadoahk pwukat, Kristian kan koaros kin iang doadoahk ong Siohwa. Doadoahk wet iei doadoahk en kalohk me kin kalinganahla Siohwa oh wahdo kamwahu ong aramas akan. (Wiewia 13:47-49) Sapwellimen Koht pwihn kin kaukaweid doadoahk en kalohk. Ekei pak, met kin wehwehki me kitail kakete alehdi pwukoa kapw ehu.

⁸ Sapwellimen Siohwa ladu lelepek kan kin ahnsou koaros ngoangki idawehn sapwellime kaweid. (Wadek Ipru 13:7, 17.) Mwein kitail sohte wehwehki dahme kahrehda kitail kin alehdi pwukoa de kaweid kapw ehu. Ahpw kitail kin perenki wia mepwukat pwe kitail ese me wekidekla pwukat kohsang rehn Siohwa oh re pahn imwila mwahu.

9. Mehn kahlemeng mwahu dah me elder kan kihda ong mwomwohdiso?

⁹ Elder kan kin kasalehda arail uhdahn men wia kupwuren Koht sang mwomwen arail kin tiengla mwowe nan mwomwohdiso. (2 Kor. 1:24; 1 Des. 5:12, 13) Elder kan kin ngoangki doadoahk laud oh idawehn kaweid kan, oh re pil kin mwadang en sukuhlki wiepe kapw kan nan doadoahk en kalohk. Re kilang imwila mwahu ni arail koasoanehdi en mie kalohk doadoahngki delepwohn, kalohk wasahn sohp kan, de kalohk nan wehi pokon, mendahki ekei ele pahn medewe ia duwen wiepe kapw pwukat ar kak doadoahk. Karasepe, mie pioneer pahmen nan Sehmen me koasoanehdi en kalohk nan wasahn pesines kan me ahnsou reirei kalohk sohte kin wiawi. Emen irail, me adaneki Michael nda me irail uhdahn saloh pwehki erein sounpar tohto re saikinte song soangen kalohk wet. E pil kapatahiong: “Siohwa ketin mwahngih met, pwehki e ketikihda menseng ehu me uhdahn kaperen ong kiht nan kalohk me se sohte kak manokehla. Se uhdahn perenkihda at idawehn kaweid me Atail Doadoahk ong Wehio kihda oh at likih Siohwa en ketin sewese kiht!” Ia duwe, ke kin ngoangki song doadoahngki wiepe kapw kan en kalohk nan omw wasahn kalohk?

10. Soangen wekidekla dah kan me wiawi nan sapwellimen Siohwa pwihn nan sounpar me neklahr ko?

¹⁰ Ekei pak wekidekla kan kin wiawi nan Pedel. Karasepe, nan sounpar me neklahr ko, ekei ohpis en Sounkadehdehn Siohwa kan me tikitik solahr kadoadoahk oh arail doadoahk uhd keseula nan ohpis en Sounkadehdehn Siohwa kan me laudsang. Met kamwakid laud irail kan me wia papah ni ohpis pwukat. Re anahne wiahda wekidekla kan, ahpw mwuhr re kilang kamwahupen met. (Ekl. 7:8) Irail tohndoadoahk ngoang pwukat kin perenki iang pidada doadoahk me sapwellimen Siohwa aramas akan rahnwet kin wiewia.

11-13. Soangen kahpwal dah kan me ekei lelohng pwehki wekidekla kan me wiawi nan sapwellimen Koht pwihn?

¹¹ Kitail kak sukuhlki ekei ire kesempwal kan sang irail ko me kin papah nan ohpis en Sounkadehdehn Siohwa kan me kin kohpene wiahla ehu. Pali laud en riatail Kristian pwukat kin doadoahk nan ohpis pwukat sounpar tohto. Ehu pwopwoud me iang papah nan ehu Pedel tikitik anahne keseula Mexico, wasa me tohn Pedel ko uhdahn tohtohsang tohn Pedel en wasa me re kohsang ie. Ohlo, me adaneki Rogelio, nda: “E uhdahn apwal en kohkohsang peneinei oh kompoakepaht kan.” Emen tohn Pedel me adaneki Juan, me anahne keseula Mexico, kin pehm me e anahne pwurehng tepida eh mour. E nda: “Ke anahne wiahda kompoakepah kapw kan. Ke anahne ahnla tiahk oh mwomwen madamadau en wasao.”

¹² Ni ahnsou me ekei ohpis en Sounkadehdehn Siohwa kan nan Iurop kohpene wiahla ehu, tohn Pedel tohto anahne keseula nan ohpis me mihmi nan Sehmen. Irail pil lelohng wekidekla apwal kan, pwehki e sohte kin ahnsou koaros mengei en keseu sang omw wasa. Ekei me keseu sang Switzerland kin loaleidkihda nahna kaselel kan en arail wasao, oh ekei me keseu sang Austria loaleidkihda arail wia kisehn tohn peneinei en Pedel tikitik ehu.

¹³ Riatail Kristian kan me keseu sang ehu ohpis ong ehu sahpw tohrohr anahne wiahda wekidekla tohto. Re anahne ahnla wasahn kousoan kapw, tohndoadoahk kapw, oh mwein pwukoa kapw me re alehdi. Re pil anahne ahnla mwomwohdiso kapw, wasahn kalohk kapw, oh mwein pil esehla ehu lokaia tohrohr. E kak uhdahn apwal en wiahda wekidekla pwukat, ahpw tohn Pedel tohto kin perenki wiahda met. Dahme kahrehda? Kitail tehk dahme ekei irail nda.

14, 15. (a) Ia duwen me tohto ar kasalehda me re kin kesempwalki arail pwais en iang Siohwa doadoahk, sohte lipilipil soangen doadoahk dah? (b) Ia duwen arail wia mehn kahlemeng mwahu ong kitail?

¹⁴ Grethel nda: “I alehdi luhk wet pwehki ih ahl wet me ien kasalehiong Siohwa me ei poakohng ih sohte kin poahsoankihda sahpw de ihmw me I kin mihmi ie, de soangen pwukoa me I kin ahneki.” Dayska nda: “Ni ei tamanda me luhk wet kohsang rehn Siohwa, I uhdahn perenki ale.” André oh Gabriela pil pwungki met oh nda: “Pwehki met, se kak kilang ahnsou mwahu en kalaudehla at papah Siohwa sang ni at pwilikihdi dahme pein kiht kin perenki.” Re pehm me ni sapwellimen Siohwa pwihn eh kin wiahda wekidekla kan, e mwahu en utungada ahpw dehr pelian.

¹⁵ Pwehki ohpis en Sounkadehdehn Siohwa kan kin kohpene wiahla ehu, ekei sohla wia tohn Pedel ahpw uhd alehdi doadoahk en pioneer. Met wiawihong tohn Pedel tohto ni ahnsou me ohpis kan en Denmark, Norway, oh Sweden kohpene wiahla ohpis en Sounkadehdehn Siohwa kan nan Scandinavia. Pwopwoud ehu me adaneki Florian oh Anja nda: “Se kin kilangwohng at pwukoa kapw nin duwen mehkot me kaperen mendahki e apwal. Ong kiht, e wia mehkot kaperen me Siohwa ketin doadoahngki kiht en papah ih sohte lipilipil wasa me se mi ie. Se kak ni mehlel nda me Siohwa uhdahn ketin kapaiahda kiht.” Mehnda ma pali laud en kitail sohte mi nan irair wet, kitail kak alasang ngoang en riatail Kristian pwukat oh mwohneki mahs Wehio. (Ais. 6:8) Kitail kak uhdahn kamehlele me Siohwa pahn ahnsou koaros ketin kapaiahda irail kan me kin kesempwalki arail pwais en iang ih doadoahk, sohte lipilipil wasa me doadoahko mi ie.

PEREPERENKIHTE OMW PWAIS KASELEL EN IANG SIOHWA DOADOAHK!

16. (a) Dahme Kalesia 6:4 padahkihong kitail en wia? (b) Mehnia pwais me keieu kesempwal me kitail kak ahneki?

¹⁶ Pwehki kitail soh unsek, kitail kin kalapw kapahrekiong kitail meteikan, ahpw Mahsen en Koht padahkihong kitail en kilangwohng dahme pein kitail kak wia. (Wadek Kalesia 6:4.) Kaidehn kitail koaros kak wia elder kei, pioneer kei, misineri kei, de tohn Pedel kei. Mendahki mepwukat wia pwais kaselel kei, pwais me keieu kesempwal iei ehu me kitail koaros ahneki. Iei en wiahla emen sounkalohk en rongamwahwo, emen me kin iang Siohwa doadoahk. Kitail en kesempwalki pwais kaselel wet!

17. Nan koasoandi wet, dahme kin uhdahn wiawi? Ahpw dahme kahrehda kitail en dehr mworusala?

¹⁷ Nan koasoandi wet, kitail ele sohte kak papah Siohwa ni ahl me kitail men wia. Ele mie irair kan me kitail ahneki me sohte mehkot kitail kak wiahiong, duwehte pwukoahn peneinei de kahpwal en roson. Ahpw, kitail en dehr mworusala. Sohte lipilipil soangen kahpwal dah me kitail ahneki, kitail kak ahnsou koaros kalohki duwen mwaren Siohwa oh sapwellime Wehi. Me keieu kesempwal iei kitail en wia uwen atail kak ong Siohwa, ni atail kapakapki en ketin sewese irail kan me kak wia laudsang kitail. Tamataman, koaros me kin kapinga mwaren Siohwa kin kesempwal mwohn silangih!

18. Dahme kitail kak kilangwohng ni ahnsou kohkohdo, ahpw pwais kaselel dahieu me kitail ahnekiher?

¹⁸ Siohwa kin ketin mweidohng kitail en iang ih doadoahk mendahki kitail soh unsek. Ia uwen eh wia pwais kaselel en iang Koht doadoahk ni imwin rahn pwukat! Kitail kin kilangwohng ahnsou kohkohdo ong “mouro me uhdahn mour mehlel,” ni ahnsou me kitail pahn kak perenki mour ni ahl akan me sohte kak wiawi rahn pwukat. Ahnsou keren, nan sapwellime sampah kapw, Siohwa pahn ketikihong kitail mour soutuk me nsenamwahu oh popohl mi ie.​—1 Tim. 6:18, 19.

19. Soangen mour dah ong ahnsou kohkohdo me Siohwa ketin inoukihong kitail?

¹⁹ Sapwellimen Koht sampah kapw me e ketin inoukihda pahn kereniong leledo. Kitail medewe duwen dahme Moses padahkihong mehn Israel ko mwohnte arail pedolong nan Sapwen Inowo. E nda: “E [Siohwa] pahn ketikihong kumwail soangen kamwahu koaros.” (Deud. 30:9) Mwurin Armakedon, Siohwa pahn ketikihong irail kan me kin ieiang ih doadoahk sampah, nin duwen me e ketin inoukidahr. Eri, pwukoa kapw me kitail pahn wia iei en wiahiong sampah wet en wiahla paradais kaselel ehu.