Kitail Kin Kesempwalki Atail Pwais kan!
1 Sang ahnsou me aramas wiawihda, Siohwa kin ketikihong sapwellime ladu kan soangsoangen pwais kan. E kin ketikihong irail pwais kan, sohte lipilipil ma irail ohl de lih, pwulopwul de mah, de soangen irair dah re kin mih loale. (Luk 1:41, 42; Wiewia 7:46; Pilipai 1:29) Soangen pwais dah kan e kin ketikihong kitail rahnwet?
2 Ekei Atail Pwais kan: Kitail ahneki pwais en ale kasukuhl sang rehn Siohwa. (Madiu 13:11, 15) En kapinga Siohwa ki atail pasapeng kan ni ahnsoun mihding kan kin wia pil ehu pwais me kitail kin kesempwaliki. (Melkahka 35:18) Ni ahnsou me kitail iang pasapeng kan, kitail kin ngoangki wia met. Duwehte met, ma kitail kin wiahki ehu ehu pwais en padahk nan mwomwohdiso mehkot kesempwal, kitail pahn wia uwen me kitail kak pwehn wia atail padahk. Kitail kin kaukaule iang pwais en kamwakele Kingdom Hall oh wia doadoahk kan pwehn kamwahuiala wasa kan me ohla?
3 Mendahki aramas rar kei kin peikasalki ma Koht kin ketin karonge arail kapakap kan, kitail kin ahneki pwais tohrohr me Meno me keieu lapalap nan audepen lahng oh sampah kin ketin karonge atail kapakap kan. (Lepin Padahk 15:29) Siohwa kin ketin pein karonge kapakap en sapwellime ladu kan. (1 Piter 3:12) E sohte kin ketin koasoanehdi ia uwen dod kitail kak kapakapohng ih. Ia uwen kesempwal en kisakis me kitail ahneki, me kitail kak kapakap “ahnsou koaros”!—Episos 6:18.
4 “Tohndoadoahk kei me Kin Iang Koht”: Ehu atail pwais me keieu kesempwal iei en pakpakairki rongamwahu en Wehin Koht nin duwen “tohndoadoahk kei me kin iang Koht.” (1 Korint 3:9) Doadoahk wet kin wahdo kansenamwahu oh peren. (Sohn 4:34) Siohwa sohte ketin anahne kitail aramas en wia doadoahk wet, ahpw e ketikihong kitail pwukoa wet pwehki e ketin poakohng kitail. (Luk 19:39, 40) Ni ah ketin wia met, Siohwa sohte ketikihong aramas soh lipilipil pwais wet. Irail akan me kin iang kalohk ni wehi pokon anahne kaukaule kapwaiada sapwellime koasoandi kan. (Aiseia 52:11) Kitail kin kasalehda me kitail kin kesempwalki pwais wet sang ni atail kin wiahki doadoahk en kalohk wiewia kesempwal nan atail koasoandi nan ehu ehu wihk?
5 Pwais kan sang rehn Siohwa kin kahrehda atail mour katapan. (Lepin Padahk 10:22) Kitail en dehr wiahki pwais pwukat mehkan me sohte kesempwal! Sang ni atail kin kasalehda me kitail kin uhdahn kesempwalki atail pwais kan en papah ih, kitail kak kaperenda Samatail nanleng, Emen me ketikihong kitail “soangen wiawi sapan koaros oh kisakis mwahu koaros.”—Seims 1:17.