Kaudokiong Siohwa nin Duwen Peneinei Ehu
1 Nan mwehin Paipel, tohnpeneinei kan kin doadoahkpene oh wia soahng tohto. Irail kin wia arail doadoahk nan imwarail ehu ehu rahn, oh me keieu kesempwal, re kin kaudokiong Siohwa nin duwen peneinei ehu. (Lipai 10:12-14; Deuderonomi 31:12) Rahnwet, nan wasa tohto, tohnpeneinei kan sohlahr kin kalapw doadoahkpene. Ahpw, Kristian akan kin pohnese kesempwalpen doadoahkpene nin duwen peneinei ehu, keieu, me pid duwen kaudok. Ia uwen met kin kaperenda Meno me ketin koasoanehdi koasoandi en peneinei ni ahnsou me e ketin mahsanihada peneinei kan me kin miniminpene oh kaudokiong ih!
2 Doadoahkpene nan Kalohk nin Duwen Peneinei Ehu: En doadoahkpene en kalohki rongamwahu kin kaminiminpene peneinei. Kahrehda, elder men me kin iang meteikan nan mwomwohdiso en kalohk pil pahn kaukaule iang ah pwoud oh nah seri kan. (1 Timoty 3:4, 5) Mendahki e kin soupisek, sounapwalih en mwemweit kan pil kin koasoanehdi ahnsou en iang arail pwoud nan doadoahk en kalohk.
3 Pahpa oh nohno kan me kin iang neirail seri kan nan doadoahk en kalohk kak sewese irail en koahiekla nin duwen sounkalohk kan. Seri kan pahn kilang kaidehn ihte peren oh nsenamwahu me arail pahpa oh nohno kin ahneki nan doadoahk en kalohk, ahpw re pil pahn kilang limpoak me arail pahpa oh nohno kin kasalehiong Siohwa oh aramas teikan. (Deuderonomi 6:5-7) Kesempwalpen wia met sohte pahn tikitikla ni ahnsou me seri kan me mihmi rehn arail pahpa oh nohno pahn laudla. Ehu pwopwoud mie neira pwutak silimen me nanpwungen sounpahr 15 oh 21 kin kaukaule iang irail nan doadoahk en kalohk. Arail pahpa koasoia: “Se kin padahkiong irail mehkot ni ehu ehu ahnsou. Oh se kin wiahki met ahnsou kaperen oh kangoang.”
4 Kaunopada nin Duwen Peneinei Ehu: Peneinei tohto kin diarada me e mwahu en kaunopada ong kalohk nin duwen peneinei ehu. Seri kan kin kalapw perenki kamwomwada kalohk ong tohnpeneinei teikan, emen wia padahk oh emen wia tohnihmw. Ekei kin doadoahngki minit kei ni kaimwiseklahn onop en peneinei en wia praktis wet.
5 Atail peren pahn laudla ni ahnsou me kitail kin iang irail me kitail poakohng oh wia doadoahk kesempwal oh kaperen kan. Ia uwen kaperen ong tohnpeneinei kan en doadoahkpene nan doadoahk en kalohk en ihmw lel ihmw oh pil wia return visit kan oh onop en Paipel kan! Sang ni ahmw kin iang ahmw peneinei oh kaudokiong Siohwa, ke kak koasoiahki ni peren: “Ngehi oh ei peneinei, se pahn papah KAUN-O.”—Sosua 24:15.