Iaduwen Tohn Peneinei Koaros Kak Miniminpene—Nan Kalohk
1 Dahme pahn wahdo peren laudsang en kilang ohl pwopwoud kan oh lih pwopwoud kan, pahpa oh nohno kan oh seri kan ehupene nan doadoahk en kalohk, kapkapinga mwaren Siohwa ong wehi pokon? (Melkahka 148:12, 13) Peneinei koaros anahne wiahda arail koasoandi mwahu pwehn kaukaule iang kalohk. Ahmw peneinei koasoanehdier ehu rahn nan ehu wihk pwehn kalohk? Ma iei, koaros pahn ese dahme ren kaunopada ong rahno oh pahn iang kalohk rahno.—Lepin Padahk 21:5a.
2 Pwehn kaunopada ong rahno me ahmw peneinei koasoanehdi pwehn iang kalohk, dahme kumwail koaros soh kaunopada amwail padahk kan? E kesempwal en praktis amwail padahk kan, oh ahnsoun praktis kak wiahla ahnsoun miniminpene nin duwen peneinei ehu. Ia uwen kansenamwahu en miniminpene nan kalohk nin duwen peneinei ehu oh koaros en kaunopada mwahu ong kalohk!
3 Emen soundoulik iang ehu peneinei nan kalohk ahnsoun kihseli makasihn. Ni ahnsou me soundouliko iang emen serepein en peneineio kohla ihmw lel ihmw, serepeino idek reh: “Ia uwen werei ke pahn iang ie kalohk?” Serepeino kawehwe ong soundouliko me mwurin e pahn iang soundouliko, e pahn iang ah pahpa. E sansal me e perenki iang ah pahpa kalohk. Ia uwen kaselel en kilang peneinei wet miniminpene!
4 Ekei peneinei kan kin auxiliary pioneer nin duwen peneinei ehu sounpwong ehu nan sounpahr ehu. De emen sang peneinei ehu kak regular auxiliary pioneer de regular pioneer. Ma koaros tohnpeneinei pahn miniminpene oh sawaspene ni arail koasoanehdi arail ahnsou, mwein koaros kak kalaudehla arail ahnsoun kalohk pwehn sewese meno me pioneer. Tohnpeneinei koaros pahn paiekihda arail kalaudehla arail ahnsoun kalohk oh pahn perenki ekspiriens kan nan kalohk.—Mal. 3:10.
5 Ma kitail koaros wia uwen me kitail kak en kalaudehla atail ahnsoun kalohk, e pahn sewese peneinei kan en miniminpene, ngoangki kalohk, oh perenki sewese aramas kekeirada ni pali ngehn, oh ahneki peren sang papah Siohwa!—Pil tehk Pilipai 2:1, 2.