PEIDEK KAN EN PAIPEL PASAPENGLA

Kitail kak esehla dahme mehlel duwen Koht?

Koht ketin mahsaniong aramas. E ketin doadoahngki sapwellime manaman pwehn kasalehiong sounnting kan en Paipel duwen kupwure. (2 Piter 1:20, 21) Kitail kak esehla dahme mehlel duwen Koht sang ni atail wadek Paipel.​—Wadek Sohn 17:17; 2 Timoty 3:16.

Koht ketin kasalehda soahng tohto duwen ih nan Paipel. E ketin kasalehda dahme kahrehda e ketin kapikada aramas, dahme e pahn ketin wiahiong irail, oh soangen mour dah me e ketin kupwurki irail en ahneki. (Wiewia 17:24-27) Siohwa Koht ketin kupwurki kitail en esehla dahme mehlel duwen ih.​—Wadek 1 Timoty 2:3, 4.

Dahme kahrehda Koht ketin kupwurperenki irail kan me kin poakohng me mehlel?

Siohwa iei Koht en mehlel oh e ketin poaronehdo sapwellime Ohl, Sises, pwehn padahkihong aramas akan dahme mehlel. Ihme kahrehda, irail me poakohng me mehlel kin perenki rong Sises. (Sohn 18:37) Koht kupwurki soangen aramas pwukat en wia sapwellime tohnkaudok kan.​—Wadek Sohn 4:23, 24.

Tepilo Sehdan kahrehiongehr aramas tohto en dehr esehla Koht ni eh wiahda padahk likamw kan duwen Koht. (2 Korint 4:3, 4) Aramas me sohte kin poakohng dahme mwahu kin men rong soangen padahk likamw pwukat. (Rom 1:25) Ahpw aramas mehlel rar rar kei diaradahr dahme mehlel duwen Koht sang ni arail onopki Paipel.​—Wadek Wiewia 17:11.