Kaunopada oh Paiekihda Mihting kan en Mwomwohdiso
1. Dahme pahn sewese kitail en paiekihda atail mihting kan?
1 Kitail anahne wiahda ahnsou pwehn kaukaule kaunopadahng mihting kan. Ekei kin kak doadoahngki ahnsou laud sang meteikan pwehn kaunopada. Ahpw sohte lipilipil ia uwen atail kedirepw, e pahn wia kamwahupatail ma kitail kin koasoanehdi ahnsou pwehn kaunopadahng mihting kan.—1 Tim. 4:15, 16.
2-5. Ia duwen atail kak kaunopadahng: (a) Onop en Paipel en Mwomwohdiso? (b) Sukuhl ong Sapwellimen Koht Doadoahk? (c) Mihting en Kalohk? (d) Onop en Kahn Iroir?
2 Ong Onop en Paipel en Mwomwohdiso: Keieu, kasawih mahs iren onopo. Tehk oaralap en irelaudo oh sawaspen oaralap kan. Eri ni omw pahn wadek, kilelehdi ire kesempwal kan. Tehk iren Paipel kan me kileldi pwehn utungada ire kesempwal pwukat. Song en sapengla peidek kan ni pein omw koasoi. Mwurin omw kaunopada iren onopo, kousapahlih ire pwukat. Song en tamanda ire kesempwal kan oh ia duwen iren onopo eh kin kawehwehda ire pwukat.—2 Tim. 2:15.
3 Ong Sukuhl ong Sapwellimen Koht Doadoahk: Nantihong en kaukaule wadek wadawad en Paipel erein wihko. (Sos. 1:8) Kousapahlih ire kan me pahn kadoadoahk oh wahdo pwuhk kan me pahn anahn pwe ken kak idawehn padahk kan. Medewe ia duwen omw kak doadoahngki ire pwukat nan doadoahk en kalohk.
4 Ong Mihting en Kalohk: Kilang koasoandi me kileldi nan Atail Doadoahk ong Wehio. Wadek ire kan me koasoiepe pahn wiawi. Ma mie ekei ire kan sang nan ehu Kahn Iroir de sang sawaspen Paipel teikan, wadek mepwukat. Ma kamwomwada kan pahn wiawi, ke kak tehk ire pwukat mwowe pwe ken kak doadoahngki nan kalohk.
5 Ong Onop en Kahn Iroir: Wadek iren onopo mwowe oh kilang pasapeng kan ong peidek kan. En wadek iren Paipel kan me kileldi pahn sewese iuk en wehwehkihla mwahu. En doudouloale ia duwen ire kan nan iren onopo kin pahrekiong dahme ke esehier pahn kalaudehla omw wehwehki Paipel. Koasoanehdi ken iang pasapeng erein ahnsoun onopo ni omw pahn kaunopada pasapeng mwotomwot ong ehu de riau parakrap. Met pahn wia ahl kesempwal ehu en kadehdehda ong wehipokon duwen atail koapworopwor.—Ipru 10:23.
6. Dahme pahn pil kahrehiong kitail en paiekihda mihting kan?
6 Paiekihda Mihting kan: Pwehn paiekihda mihting kan, e kesempwal en mwadang kohdo oh iang towehda tepin kapakap pwehn peki sawas en sapwellimen Koht manaman. Ke pil pahn paiekihda koul en Wehio. Nantihong en wadek iren Paipel kan me pahn kohda. Met pahn sewese iuk en taman dahme ke rong. En koasoiaiong kompoakepahmw kan de omw peneinei pahn katengehdi ire pwukat nan omw madamadau. Doadoahngki ire pwukat pahn kahrehiong kitail en paiekihda mihting kan oh met pahn uhdahn wia “kasalepen atail limpoak oh atail wiewia mwahu kan.”—Ipru 10:24, 25.