Mihding kan kin Kangoangekin Kitail en Nsenoh Sawaspene ni Kasalepen Atail Wiewia Mwahu
1 Soahng kesempwal riau me wia kisehn atail kaudok iei en iang towehda mihding kan oh iang kalohk. Koaros me kesempwal. Ehu kin pid mehteio. Mihding en Kristian kan kin kangoangekin kitail en nsenoh sawaspene ni kasalepen atail wiewia mwahu, iangahki kalohki Wehio oh doadoahk en katohnpadahk. (Ipru 10:24) Ma kitail sohla kin iang mihding kan, kitail pil pahn sohla men iang kalohk pwe atail ineng en men iang kalohk kin kohsang mehn kangoang kan me kitail kin alehdi sang mihding kan.
2 Wihk koaros ni atail kin iang towehda mihding kan, kitail kin ale ketinain en pali ngehn pwehn kamwekid kitail en men iang kalohk. Audepen mihding kan kin katamankin kitail duwen imwin ahnsou me kitail mihmi loale, oh kin kamwekid kitail en kalohki audepen Pwuhk Sarawi me kak sewese aramas en ale mour soutuk. (Madiu 24:13, 14) Ni atail kin iang pasepeng nan mihding kan, kitail pahn ahnla kasalehda atail pwoson mwohn mehteikan. (Ipru 10:23) Ni atail kin iang wia atail padahk kan nan Theocratic Ministry School, kitail kin ale kasukuhl pwehn koahiekla ni atail kin kalohk oh katohnpadahkih mehteikan.—2 Tim. 4:2.
3 Iaduwen Service Mihding kan kin Kangoangekin Kitail en Men Iang Kalohk: Kangoang kin kohwong kitail koaros en wadek Atail Doadoahk Ong Wehio mwohn kitail kin iang towehda Service Mihding kan. Ni ahnsou kitail pahn iang towehda Service Mihding kan oh kilang kamwomwada kan, kitail pahn tamatamante dahme kitail wadekehr. Ni ahnsou me kitail kin iang kalohk, kitail pahn tamatamante dahme kitail wadekehr nan Atail Doadoahk Ong Wehio oh kamwomwada kan me kitail kilangehr nan Service Mihding kan, oh kitail kak pweida mwahu nan kalohk. Sounkalohk tohto diarada me soahng pwukat kin sewese irail pweida mwahu nan doadoahk en kalohk.
4 Pwehn doadoahngki ire kan me kitail sukuhliki nan Service Mihding kan, ekei kin inoupene en ehu nan kalohk pwehn sawaspene oh doadoahngki ire pwukat. Sounkalohk kan kin tamatamante ire pwukat me irail ahpwtehn sukuhliki oh mihding kan kin kangoangekin irail en doadoahngki ire pwukat ni arail kin iang kalohk wihk koaros.
5 Sohte mehkot kak wiliandi atail mihding en Kristian kan, ahnsou me kitail kin tuhwong riatail kan oh mehn kangoang kin kohwong kitail koaros en nsenoh sawaspene ni kasalepen atail wiewia mwahu. Ma kitail men atail kalohk en pweida mwahu, kitail anahne kaukaule iang mihding kan. Kitail anahne kalahnganki mehn sawas kaselel wet sang Siohwa ni atail “dehr tokedihsang atail tiahk en pokonpene.”—Ipru 10:25.