Sewese Irail en Pwurehng Papah
1. Ihs nan mwomwohdiso me kitail anahne sewese?
1 Wahnpoaron Pohl kin nsenohki irail akan me solahr kin papah Siohwa. (Rom 13:11) Duwehte Pohl, kitail kin nsenohki riatail kan me solahr kin iang mihting oh kalohk. Ia duwen atail kak sewese irail en pwurehng papah?
2. Dahme elder kan kak wia pwehn sewese irail pwukat?
2 Dahme Elder kan Kak Wia: Pali laud en irail pwukat sohte kin uhdahn kesehla padahk mehlel. Pali laud en ahnsou, riatail kan kin wawaila pwehki arail mworusala, de pein arail kahpwal kan, kedirepwkihla dipwisou, de kapwunod teikan en mour. (Luk 21:34-36) Ma kak, e pahn mwahu en mwadang sewese irail mwohn arail uhdi sang iang mihting oh kalohk. Koasoandi kan kak wiawihda pwe elder kan en mwemweitla rehrail. Elder kan anahne song diarada uhdahn kahrepen arail kahpwalo oh ia duwen arail kak sewese irail.
3. Ia duwen atail kak sewese irail pwukat?
3 Ia Duwen Meteikan Ar Kak Sawas: Pali laud en kitail ese emen me solahr iang mihting de kalohk. Mwein ih emen me kitail kin karanih mahs. Dahme kitail kak wia pwehn sawas? Ke sou mwemweitla reh? Ndaiong me ke loaleidkihda ih. Nantihong kaperenda oh nda soahng kangoang kan. Kasalehda omw nsenoh ahpw ke dehr kasalehda me eh nanpwungmwahu rehn Siohwa luwetalahr. Koasoia soahng mwahu kan me wiawi nan mwomwohdiso. Eh pahn pwurehng iang mihting kan pahn wia sawas me keieu mwahu. Padahkihong me ke kak iang ih kohla ni mihting kan. Padahkihong elder kan ia duwen meno eh mwekidki sawas me ke kihong ih.
4. Dahme pahn sewese irail kan me pwurehng pwurodohng mihting kan?
4 Ni ahnsou me emen me wereila eh sohte iang mihting pwurehng pwurodo, e pahn namenek en tuhwong irail kan me e kin ese mahs. Ke dehr nda, “Wereila I solahr kilang uhk.” Ahpw kasamwo ih. Wia pwe en iang koasoi. Sewese en tuhwong irail akan me e saikinte ese. Iang ih mwohd ni ahnsoun mihting, tehk ma mie nah pwuhken koul oh pwuhk teikan me anahn ong mihtingo. Kangoange ih en pwurehng pwurodo oh nda me ke kak sewese ma e anahne sawas.
5. Ia pahn imwilahn atail sewese meteikan en pwurehng papah Siohwa?
5 Pwehki Siohwa oh Sises ara kin ketin poakohng irail akan me peila sang padahk mehlel, ira kin kupwurperenkihda irail pwukat ar kin pwurodohng mwomwohdiso. (Mal. 3:7; Mad. 18:12-14) Kitail pil kak ahneki soangen perenohte ma kitail pweida ni atail sewese meteikan en pwurehng papah Siohwa.