Ngoangki Kalohki Rongamwahu Ni Karuwaru
1 Kitail kin kasalehda atail kin kalanganki inou kan en Wehin Koht ni atail kin iang kalohk oh wia met ni mongiong unsek. Kitail anahne iang doadoahk wet oh ngoangki wia ni karuwaru. Pwekida? Pwehki tohndoadoahk malaulau, imwin koasoandi suwed wet kerendohr oh aramas me kin mihmi nan atail wasahn kalohk kakete pilada mour ma kitail tuhwong irail. (Esek. 3:19; Madiu 9:37, 38) Pwehki kitail anehki pwukoah toutou wet, kitail anahne wia uwen me kitail kak ni atail iang doadoahk en kalohk. Iaduwen kitail pahn kak ngoangki wia doadoahk en kalohk ni karuwaru? Ki atail kaunopada mwahu oh mwadang, ni atail nannanti diarada aramas sohte lipilipil iawasa irail kin mie, oh ni atail kin ntingihdi pwung rekord en irail me men rong oh kitail nantiong en pwurala rehn aramas pwukat oh ni atail kin tamataman me atail doadoahk kin pid mour en aramas akan, kitail pahn nannanti en wia uwen me kitail kak en mehlel ong atail kalohk. Mehn sawas me pwarada pah pahn kak sewese kitail en kaunopada ong kalohki rongamwahu ni ngoang ni sounpwong en March. Kitail pahn kihla brochure kapwo Dahme Koht Kupwurki Kitail En Wia?
2 Ke kak tepida koasoi duwen kahpwal kan nan ahmw wasa, oh ke kak nda:
◼ “Tohto aramas kin kamehlele me mie Koht, ahpw irail kin pwonopwonki: ‘Dahme Koht kupwurki ong aramas ni ahnsou kohkohdo?’ Iaduwen ke pahn sapengki met? [Mweidong en sapeng.] Ke kin wehwehki me Pwuhk Sarawi kin kawehwe ni sansal kupwuren Koht ong aramas oh dahme e kin wia pwe kupwure en pweida?” Pahkalahng pali 11 nan “Kupwurki” brochure. Wadek parakrap 5 oh 6, oh kasalehda kilel kan nan pali 11 oh 13 pwehn kasalehda duwen ni ahnsou kohkohdo. Wadek Kaudiahl 21:3, 4 pwehn kasansalehda dahme parakrap 5 koasoia. Ma tohnihmwo perenki rong mehpwukat, idek rehn tohnihmwo ma irail men naineki brochure. Kawehwe ong tohnihmwo duwen koasoandi en sawas ong doadoahk wet. Koasoanehdi ahnsou en pwurala pwehn pwurehng koasoipene.
3 Ke kak pwurala oh tamanda amwa koasoipene Kaudial 21:3, 4, ni ahmw pahn nda:
◼ “Ni ahnsou me I koasoi ong uhk rahn teio, kitail koasoi duwen inou en Koht me e kaunopada koasoandi kapw ong aramas. [Pil ehu kasalehda kilel kan ni pali 11 oh 13 nan “Kupwurki” brochure.] Ke men kilang ahmw peneinei mihmi nan soangen irair peren duwehte met? [Mweidong en sapeng.] Ahpw peidek ehu kin pwarada, ‘Kitail kak likih inou kan en Koht?’ Tehk mwahu dahme pein ih mahsanih. [Wadek Kaudiahl 21:5.] Medemedewe soahng koaros me Koht inoukihda me e pahn wia oh ke soh men sukuhliki oh wehwehkihla Koht sang dahme ke ese mahs? Pahkala ni pali 5, wadek parakrap 6, oh mwurin mwo koasoi duwen koasoandi en onopki Pwuhk Sarawi ni soh isepe. Koasoanehdi en kamwomwada onopki Pwuhk Sarawi mwuhr.
4 Pwehki aramas tohto kin pwunodki kekeiradahn kahpwal kan en aramas, ke kak nda met ni ahmw pahn tepin tuhwong aramas men:
◼ “Koaros me I kin tuhwong kin pwunodki kahpwal kan me kin pwarada nan pein atail wasa. [Pilada ekei kahpwal kan oh koasoia.] Sangete mahs irail kaun en wehi kan kin inoukihong aramas me re kak kamwahuiala kahpwal pwukat, oh ekei kin nantiong en wia met. Ahpw dahme kahrehda kahpwal kan kin tohtohla oh susuwedla? [Mweidong en sapeng.] Pwuhk Sarawi kin koasoi duwen kawehwehpen ire wet ahpw tohto aramas saikinte medemedewe kesempwalpen kawehwe wet. Pwuhken Kaudiahl kin koasoi duwen mahwin ehu me wiawi nanleng. Tehk duwen imwilahn mahwin wet nan Kaudiahl 12:9.” Wadek iretikitiko oh pahkalahng Mehn Kasukuhl 4 (pali 8-9) nan “Kupwurki” brochure. Doadoahngki kilel kan pwehn kawehwe iaduwen Sehdan kin pid mwekid en wehi kan oh aramas. Ma tohnihmwo kin perenki rong, idek rehn tohnihmwo ma e men naineki brochure oh ndaiong ih duwen koasoandi en sawas. Koasoanehdi ahnsou me ke pahn pwurala oh koasoi duwen iaduwen Koht pahn kamwahuiala kahpwal akan en aramas.
5 Ma ke inoukihong tohnihmwo me ke pahn pwurala oh kawehwe duwen iaduwen Koht pahn kamwahuiala kahpwal akan en rahnwet, ke kak nda:
◼ “I nannanti en pwurodo pwe kita en pousehla ata koasoipene duwen dahme pahn uhdahn kamwahuiala kahpwal kan en aramas. Rahn teio ahnsou me I koasoi ong uhk, kita kilang nan Pwuhk Sarawi me Sehdan me Tepil me kin pitih sampah pwon. Pwehki ih me emen ngehn kehlail, mie mehkot me pahn wiawi me kak kahrehda e sohlahr pahn kak kamwekid aramas oh wehi kan? [Mweidong en sapeng.] Tehk duwen dahme Pwuhk Sarawi kin koasoia.” Wadek oh kawehwe Kaudiahl 20:1-3. Ni ahmw doadoahngki kilel ni pali 13 en “Kupwurki” brochure, kasalehda irair en sampah ahnsou me Sehdan sohlahr pahn kamwekid aramas oh wehi kan. Idek rehn tohnihmwo ma e men onopki Pwuhk Sarawi oh nantiong en tepida rahnohte.
6 Aramas tohto kin nsenohki irair en nan wehwe, pihl oh mwenge (environment), ke kak nda:
◼ “Kiht diarada me kerenieng koaros kin pwunodki kasaminehlahn nan wehwe, pihl oh mwenge. Ni ekei sahpw kan irair en soahng pwukat kin keper ong mour en aramas. Pwehki Koht iei Sounkapikada en sampah, dahme ke lemeleme e pahn wiaiong kahpwalo (sampah wia saminla)? [Mweidong en sapeng.] Pwuhk Sarawi kin koasoia me Koht pahn kauwehla irail me kauwehla sampah. [Wadek Kaudiahl 11:18b.] Medewehla ma kitail mihmi pohn sampah me sohte samin!” Kasalehda sapwellimen Koht inou en kaparadaisla sampah, nin duwen dahme Kaudiahl 21:3, 4 kin kasalehda. Oh pil, kasalehda kilel ni pali 13 en “Kupwurki” brochure. Ma tohnihmwo perenki rong, idek reh ma e men naineki brochure oh koasoanehdi en pwurala. Kawehwe ong tohnihmwo duwen koasoandi en sawas oh mweidong ih en kihong uhk eh sawas ma e mwahuki.
7 Ma ke pahn pwurala rehn emen me perenki rong me sampah pahn paradaisla, ke kak nda:
◼ “Ni ahnsou me I koasoiong uhk rahn teio, kita pwungkipene me pwehn kamwahuiala kasamin en sampah wet, Koht anahne wia mehkot. Ahpw peidek ehu kin pwarada, Dahme kitail anahne wia pwehn mour nan sampah kapw me Koht pahn wahdo?” Wadek Sohn 17:3. Kangoange tohnihmwo en onopki Pwuhki Sarawi pwehn anehki loalokong tohrohr wet.
8 Kitail anehki pwais kaselel en iang doadoahk en rahk ni pali ngehn oh iang doadoahk en kalohk pwehn sewese aramas en ale kamourparail. Kitail en nannanti kalohki rongamwahu ni ngoang, ‘pwe kitail ese me papah Siohwa kaidehn doadoahk mwahl ehu.’—1 Cor. 15:58.