Mahsen en Koht Kin Kihda Kaweid
1 “Nsenamwahu nan sampah—met likamwete sohte kak en wiawi mehnda ma ongete ahnsou mwotomwot ehu. Soumwahu, mahla, duhpek, mwersuwed—iei ekei kisehn kahpwal kan—me kahrehda mour kainsensuwed. Eri, ke pahn ele mwein nda me, koasoia mour kohkohlahte nan paradais sampah duwehte emen kin meirpene oh sohte kilang me mehlel. Ke mwein pehm me e kawehla ahnsou en koasoia ire wet, oh mour kohkohlahte soutuk ihte auramen ehu.”
2 Ih duwen pwuhk Ke Kak Mour Kohkohlahte Nan Paradais Nin Sampah kin tepida. Wasao kin pid atail ahnsou laud sang ahnsou me pwuhko ahpwtehn wiawihda sounpahr 15 samwalahro. Aramas anahne en wehwehki me Mahsen en Koht kin kihda kaweid oh kaweid wet kak kamwahuiala kahpwal me kin lelong irail. Kitail pahn nantiong sewese aramas nan January ni atail men kihla rehrail ehu pwuhk sang pwuhk riau kan: Ke Kak Mour Kohkohlahte Nan Paradais Nin Sampah de Nai Pwuhk en Poadoapoad Kan en Paipel. Ahpw mehlel, kaidehn ihte kihla pwuhk rehn emen pahn wehwehki me e pahn mwekidki kaweid en Koht. Kitail anahne pwurala rehrail oh tepida onop Paipel rehrail. Ma kitail nannanti, sawas pahn kohwong kitail. (Madiu 28:19, 20) Iet ekei iren sawas kan:
3 Ma ke tuhwong emen mah, ke kak nda:
◼ “I kak idek rehmw mehkot? Ahnsou me ke pwulopwul, ia mwomwen nanpwungen aramas nan ahmw wasa? [Mweidong en sapeng.] Irair en ahnsouwet wuksang mahs, kaidehn? Dahme ke lemeleme kahrepe irairo wukila? [Mweidong en sapeng.] Ni mehlel, kitail kilikilang pweidahn kokohp en Paipel ni ahnsouwet. [Wadek 2 Timoty 3:1-5.] Pwuhk Sarawi kaidehn ihte kohpada pwung irair en sampah wet, e pil kin kohpada me sampah pahn mwahula ni ahnsou keren. Ihme kahrehda, kitail kin kangoangehkin aramas koaros en wadek Pwuhk Sarawi. Kasalehong tohnihmwo pwuhken Ke Kak Mour Kohkohlahte Nan Paradais Nin Sampah, oh kasalehda irelaud 18 me kin kawehwehda pil ehu kohkohp me kitail kilang pweipweida. Idek rehn tohnihmwo ma e men naineki pwuhko. Ma e men naineki, ke kak koasoia duwen koasoandi en sawas me kin sewese doadoahk wet sampah pwon.
4 Ni ahnsou me ke pwurala rehn aramas mah men me ke kihong pwuhken “Mour Kohkohlahte,” ke kak nda:
◼ “Ahnsou me kita koasoakoasoipene rahn teio, kita pwungkipene me ni ahl tohto atail ahnsou suwed sang sounpahr kei samwalahr ko. Ahpw, I kohdo pwehn kasalehong uhk me Pwuhk Sarawi kin kihda inou kan me ehu rahn kitail kak kasikasik en mihmi nan sampah me mwahu sang sampah wet. [Wadek Kaudiahl 21:3, 4.] Pwehki kitail wehwehki me inou pwukat kin kohsang Mahsen en Koht kin kangoangehkin kitail en men sukuhliki dahme Paipel mahsanih.” Kasalehong tohnihmwo pali 15 nan pwuhken Mour Kohkohlahte, oh wadek parakrap 19. Idek rehn tohnihmw ma e men onop Paipel ni soh isepe.
5 Ma ke tuhwong emen pwulopwul, ke kak nda:
◼ “I men idek rehmw peidek ehu: Nin duwen emen pwulopwul, ke lemeleme ke ahneki kahrepe mwahu en kasikasik dahme pahn wiawi mwotail? Ke lemeleme ahnsou mwahu kan mihmi mwotail de e pahn suwed sang ahnsouwet? [Mweidong en sapeng.] Kitail kak en peren pwe mie kahrepe mwahu kitail en kasikasik me ahnsou kohkohdo pahn mwahu sang rahnwet. [Wadek Melkahka 37:10, 11.] Pwehki aramas tohto kin wukpeseng nin duwen arail wehwehki Paipel oh audepe kan, ihme kahrehda se wiahda pwuhk wet, Nai Pwuhk en Poadoapoad Kan en Paipel. Tehk duwen kahrepe mwahu kan me kitail koaros anahne wadek Pwuhk Sarawi. [Wadek parakrap keieu oh keriau ni pali kan mwohn wasao me kasalehda audepen pwuhk.] Ni ahnsou me kitail kin kamehlele ma Pwuhk Sarawi mehlel, kitail kin ahneki koapwoaroapwoar mehlel ong ni ahnsou kohkohdo. Ma ke men wadek pwuhki wet, I pahn perenki kihong uhk ehu.”
6 Ni ahnsou me ke pwurala rehn aramas pwulopwul men me ale pwuhken “Poadoapoad Kan en Paipel,” ke kak nda:
◼ “I kalanganki ahmw kawehwe ong ie rahn teio duwen ahmw nsenohki duwen dahme pahn wiawi ni ahnsou kohkohdo. Ke tamanda me I kasalehong uhk ire Paipel me kihda inou me ehu rahn tohnsampah pahn peren oh nsenamwahu. Iet pil ehu iren Paipel. [Wadek Kaudiahl 21:3, 4.] Pwuhko me I kihong uhk rahn teio kin kihda kadehde mwahu me Pwuhk Sarawi iei Mahsen en Koht, kaidehn aramas. E kin pid atail mour. Tehk mwahu ire wet. [Kasalehong tohnihmw Poadoapoad Nempe 116, “Iaduwen Kitail Pahn Kak Mour Kohkohlahte.”] Ma ke mwahuki, I kak onop Paipel rehmw ni soh isepe.” Ma tohnihmwo men onop, idek rehn tohnihmw ma mie nah Pwuhk Sarawi. Ma sohte, ke kak ndaiong ih me ke kak wahdo nah. Ke kak pil koasoi duwen koasoandi en sawas.
7 Ma ke tuhwong emen me sehse iawasa e pahn ale kaweid mwahu me pid kahpwal kan en mour, ke kak nda:
◼ “Kitail kin mihmi nan ahnsou me kereniong koaros aramas kin ahneki kahpwal laud. Pali laud kin rapahki sawas sang sounkaweid kan. Ekei kin rapahki sawas sang sounwunani kan. Ahpw iawasa ke lemeleme kitail kak diarada kaweid mwahu me kin kak kamwahuiala kahpwal kan? [Mweidong en sapeng.] Pwuhk Sarawi kin kihda ire kesempwal ieu me kitail koaros anahne kalanganki.” Wadek Seremaia 10:23. Pahkpeseng pwuhko Ke Kak Mour Kohkohlahte Nan Paradais Nin Sampah oh pahkalahng pali 14, oh wadek parakrap 14. “Pwuhk wet pahn sewese komwi en wehwehki iaduwen, panangin Wehin Koht, koaros kahpwal pahn sohlahr mie. Komw men wadek pwuhko?” Ma tohnihmw ale pwuhko, ke kak kawehwe duwen koasoandi en sawas.
8 Ma ahnsou me ke keieu tuhwong tohnihmwo ke koasoi duwen anahn en aramas en ale kaweid, ahnsou me ke pwurala reh, ke kak pousehla oh nda:
◼ “Ni ahnsou me kita ahpwtehn tuhpene rahn teio, kita pwungkipene me kitail anahne kaweid sang Koht ma kitail mwahuki powehdi mwahu kahpwal kan en mour. I lemeleme ke pahn kalanganki ire kan me pwarada ni imwin irelaud en pwuhko me I kihong uhk rahn teio. [Wadek parakrap 14 oh 15 nan pali 255 nan pwuhko Mour Kohkohlahte.] I men pil ndaiong uhk me se kin onop Paipel rehn aramas ni soh isepe oh I kak wia kamwomwada met ma ke mwahuki.”
9 Siohwa pahn kapaiada atail nantiong en wia doadoahk en sewese me mah oh me pwulopwul—koaros—en kalanganki uwen sawas Mahsen en Koht oh kaweid me e kin kihda ong atail mour.—Melkahka 119:105.