Pwuhk Sarawi—Pwuhko me Koht kin Doadoahngki Pwehn Kahluwa Aramas Koaros
1 Pwuhk Sarawi pahlik samwa wiawihdahr ni lokaia 2,100 samwa, oh ihme persent 90 samwa en tohnsampah kak naineki Pwuhk Sarawi. Ahpw, mie lehk lapalap nan sampah: aramas “men tungoalehda oh nim ehu mahsen en sang rehn Kauno (Siohwa).” (Eimwos 8:11) Aramas tohto sohte kin wadek neirail Pwuhk Sarawi de sohte kin wehwehki audepe. Iaduwen kitail kak kamwekid irail en doadoahngki neirail Pwuhk Sarawi pwehn kahluwa arail mour?
2 Nan January kitail pahn kihla kawehwehpen Pwuhk Sarawi me sewese kitailehr sang sounpahr 47 samwalahro lau lel met—New World Translation. Kitail kak kasalehong mehteikan me Pwuhk Sarawi wet kin doadoahngki lokaia mengei oh lokaiahn wai en ahnsouwet. (Kilang pwuhken “All Scripture,” pali 328, parakrap 6.) Kitail pahn kasalehda me kitail kalahnganki kisakis wet sang Siohwa ni atail pahn ngoangki sewese mehteikan en wehwehki me Koht kin doadoahngki Pwuhk Sarawi en kahluwa aramas koaros. Ahnsou me aramas perenki rong, kitail kak pil kihla pwuhk teikan me mihmi nan Kingdom Hall.
3 Ke kak tepiada ahmw padahk ni ahmw pahn doadoahngki doaropweo “Dahme Kahrehda Komw Kak Likih Paipel” oh nda:
◼ “Mendahki persent 90 samwa en tohnsampah kin naineki Pwuhk Sarawi, aramas malaulaute me kin wadek neirail Pwuhk Sarawi kaukaule. Dahme kahrehda?” Wadek keieun parakrap riau nan doaropweo, iangahki 2 Timoty 3:16. Kasalehda New World Translation. Ma tohnihmw men naineki, ke kak koasoia koasoandi en sawas. Ma e sohte men naineki Pwuhk Sarawi, idek rehn tohnihmwo ma e men naineki doaropweo. Kasalehda sawaspen oaralap, “Kokohpen Ahnsou Kohkohdo.”
4 Ni ahnsou me ke pahn pwurehng pwurala rehn aramas me ke kihong doaropwe “Dahme Kahrehda Komw Kak Likih Paipel,” ke kak nda:
◼ Mwurin ahmw pahn pwurehng ndaiong tohnihmw ihs kowe, ke pahn wadek parakrap riau me kin kaimwsekla doaropweo. Idek rehn tohnihmwo ma mie pak e medemedewe duwen mour kohkohlahte nan sampah. Mwurin eh pahn sapeng, ke kak nda: “Sounkadehdehn Siohwa kan kin kamehlele me kokohp koaros me mihmi nan Pwuhk Sarawi pahn pweida, iangahki kokohp kan me kohpada me ehu rahn aramas koaros me kin kapwaiada kupwuren Koht pahn momour nan paradais.” Kasalehda kilel me mihmi ni pali 13 nan brochure Kupwurki, oh mwurin mwo pakalahng iren mehn kasukuhl 5 oh ndaiong tohnihmwo me ke pahn perenki pwurehng pwurala reh oh sapengla peidek kan me ntingihdi mwo, eri ih duwen met ke pahn tepida onop en Paipel rehn tohnihmwo.
5 Nan wasahn kalohk kan me aramas kin nsenohki arail pali ngehn, ke kak nda:
◼ “Se kin kangoange aramas en kalaudehla arail wauneki Pwuhk Sarawi. Peneinei tohto kin naineki Pwuhk Sarawi, ahpw ahnsou me kahpwal kan kin pwarada, re sohte kin rapahki kaweid sang Pwuhk Sarawi. Ke pil kasawihada met? [Mweidong en sapeng.] Mwein re kin kamehlele me Paipel sohte kin kihda kaweid ong mour en ahnsouwet. Brochure wet, Dahme Koht Kupwurki Kitail en Wia?, kin kihda mehn kamehlel me Pwuhk Sarawi kin mehlel oh kihda sawas me pahn kamwahuiala kahpwal laud kan en atail ahnsou.” Kasalehda ire kesempwal kan sang Iren Mehn Kasukuhl 1 de Iren Mehn Kasukuhl 2 nan brochure, oh mwurin mwo, idek rehn tohnihmw ma e men naineki brochure.
6 Mwurin ahmw kihdi brochure “Kupwurki” rehn tohnihmwo, ke kak nda:
◼ “Ahnsou me I tuhwong uhk rahn teio, kita koasoiapene duwen iaduwen Pwuhk Sarawi kak sewese kitail en kamwahuiala kahpwal kan en rahn pwukat. Aramas me kin kamehlele me Pwuhk Sarawi iei Mahsen en Koht kin kilang me Pwuhk Sarawi kak sewese irail en ahneki mour peren oh nsenamwahu. I men kasalehong uhk iaduwen Pwuhk Sarawi kak sewese kitail sang kawehwehpen brochure me I kihong uhk rahn teio.” Koasoia iren Paipel ehu oh iaduwen e kak sewese kitail rahnwet sang nan Iren Mehn Kasukuhl 10. Ma tohnihmw perenki rong, ke kak idek reh ma e men onop Pwuhk Sarawi. Pil kasalehda me ke kak kihong New World Translation irail kin perenki rong Pwuhk Sarawi.
7 Ahnsou me ke tuhwong aramas mah kan, ke kak nda:
◼ “Mahs, pali moron en peneinei kan kin wadek neirail Pwuhk Sarawi oh peneinei kan kin mourki kaweid en Pwuhk Sarawi. E pil duwehte ahmw peneinei mahs? [Mweidong en sapeng.] Ahpw rahnwet, likamwete peneinei tohto kin kedirepwki soahng teikan oh sohla arail ahnsou en wadek neirail Pwuhk Sarawi oh re kin kamehlele me kaweid en Pwuhk Sarawi kin ongete ansoun mahs. Nan irelaud 5 nan pwuhken Ke Kak Mour Kohkohlahte Nan Paradais Nin Sampah, e kin kihda mehn kamehlel kan pwe kitail en kasawihada Pwuhk Sarawi. Ma ke men wadek iaduwen manaman sang nan Pwuhk Sarawi kak sewese kitail, I pahn perenki pwilikihdi pwuhk wet rehmw.”
8 Ahnsou me ke pwurehng pwurala rehn tohnihmwo, ke kak nda:
◼ “Ni ahnsou me kita koasoipene rahn teio, kita pwungkipene me kitail sohte kak pohnsehsehla kaweid sang Pwuhk Sarawi me pid tiahk mwahu. Ke lemeleme ahn aramas pohnsehsehla kaweid wet pahn pid kitail? [Mweidong en sapeng.] Sises Krais kasalehda kesempwalpen sukuhliki Pwuhk Sarawi.” Wadek Sohn 17:3. Mwurin mwo, pakalahng irelaud 5 nan pwuhken Mour Kohkohlahte oh wadek parakrap 1 oh 2. Kawehwe duwen atail prokram en onop Paipel rehn aramas ni soh isepe, oh ndaiong tohnihmwo me ke men wia kamwomwada rahnwet de ehu rahn.
9 Kapakapki me Siohwa pahn kapaiada ahmw nannanti en sewese mehteikan en kasawihada Pwuhk Sarawi—pwuhko me Koht kin doadoahngki pwehn kahluwa aramas koaros.