Siohwa Kin Ketikihong Kitail Manaman Lapalap
1 Pwais kaselel ieu en papah Koht—doadoahk en katohnpadahk—me nein Sises tohnpadahk koaros kin pwukoahki. (Madiu 24:14; 28:19, 20) Ahpw sohunsek en aramas oh kasongosong kan en koasoandi suwed wet kin kahrehda kitail kin medemedewe me pein kitail sohte itar ong doadoahk wet.
2 Ni ahnsou me pepehm wet kin pwarada, dahme wahnpoaron Pohl ntingihdi nan nah kisin likou ong Kristian keidi kan me kin mihmi nan Korint kak kamweit kitailla. E ntingihdi: “Kiht ahneki pai kesempwal wet, se rasehng sah pwehl kan me kopwukopw oh kehohla.” (2 Kor. 4:7) Pohl ahneki lamalam en ehi ni eh ntingihdi: “Nan sapwellimen Koht kalahngan lapalap e ketikihong kiht kohwa doadoahk wet; ihme se sohte kin pwangahkihda.” (2 Cor. 4:1) Mehlel, e sohte mengei ong kitail koaros, mehnda ma kitail kisehn me keidi kan de kisehn “sihpw teikan,” kitail anahne kalohki rongamwahu oh “dehr uhdi.” Kitail anahne kehl sang Siohwa, pwe Ih me kin ketikihong aramas “manaman lapalap.”—Sohn 10:16; 2 Kor. 4:7b.
3 E wia kangoang laud ong kitail ahnsou me kitail rong duwen Sounkadehde tohto me kin nannanti kalohk mendahki uhwong laud de soumwahu de apwal en mwohni. Kitail koaros anahne wehwehki me kehl en wia doadoahk wet kin kohsang Siohwa. Kitail en dehr mweidong pepehm en men uhdisang doadoahk wet de pepehm en masak aramas en kaluwetala atail nantiong wia doadoahk en kalohk, kitail anahne “kehlailkihda amwail miniminiong Kauno oh manaman en sapwellime roson.”—Episos 6:10; Lepin Padahk 24:10.
4 Iaduwen Kitail Kak Ale Kehl Sang Koht: Poadidiong kapakap ahnsou koaros, peki sawas oh kehl sang Koht. (Rom 12:12; Pilipai 4:6, 7) Ni mongiongomw unsek, likih Siohwa me e pahn ketikihong uhk manaman lapalap. (Lepin Padahk 3:5) Wadek duwen mour en riatail brother oh sister kan en ahnsou wet nan neitail makasihn kan, pwehki ekspiriens pwukat kin kasalehda me Siohwa kin sewese sapwellime ladu kan rahnwet pwehn powehdi kalokolok kan. Miniminiong riatail brother oh sister kan nan mwomwohdiso, oh dehr tokedihsang mihding kan en mwomwohdiso.—Rom 1:11, 12; Ipru 10:24, 25.
5 Kitail anahne wia uwen me kitail kak en warohng ale kehl sang Siohwa—manaman lapalap oh manaman wet pahn sewese kitail en dehr uhdisang doadoahk kesempwal en kalohki Wehio.