Wauneki Sapwellimen Siohwa Wasahn Kaudok
1 Ni ahnsou me kitail kin mwemweitla rehn aramas akan oh irail kin kasamwo kitail nan imwarail, kitail kin kanaieng arail dipwisou kan, kanaieng pwehn dehr kauwehla dipwisou kan de kauwehla koasoandi en imwarail. Kitail pahn pil kanaieng ahnsou me Siohwa kin kasamwo kitail nan sapwellime wasahn kaudok! Kitail anahne wehwehki duwen tiahk konehng kan nan wasahn kaudok. (Melkahka 15:1; 1 Tim. 3:15) Mehnda ma mihding wiawi nan Kingdom Hall, de imwin riatail kan, de wasao me wehi pokon, pali moron en kitail kin wauneki atail wasahn sarawi oh kilangwohng wasa kan nin duwen sapwellimen Siohwa wasahn sarawi, me “sapwellime lingan kin ketiket pohnangin lahng oh sampah.”—Melkahka 148:13.
2 Ekei brother oh sister kan sohte kin kasalehda wahu ahnsou me irail kin katairong oh ni arail kin wia met, re kasalehda me re sohte kin kesempwalki audepen mihding. Mie ekei brother oh sister kan me kin koasoakoasoia soahng kan me sohte katepe ni tihnsou en ihmw sarawi, oh nan imwen kainen, oh likin ihmw sarawi ahnsou me mihding kin wiawi. Ni ahnsou me pahpa oh nohno kin mweidong seri laud kan en apwalih seri tikitik kan ansoun mihding, ekei pak ira koaros kin tepida mwadongpene oh ira sohla kin rong mihdingo. Mwurin mihding, ekei seri kan kin mwadong likin Kingdom Hall, oh kin uhdahn katairong, oh kin wia mwekid en aramas kan en karate. Mie pak me seri kan kin kauwehla onopek en mehn mpen wasahn kaudok de kauwehla tangatang mwahu en sidohsa kan nan wasahn peidi de nanial.
3 Iaduwen Kitail Kak Kasalehda Wahu: Pwehki kitail kin kalahnganki atail kaudok oh wehwehki me e kesempwal oh sarawi, kitail anahne wia uwen me kitail kak en dehr wia soahng kan me pahn kauwehla en sounrongorong kan rongorong kanaieng padahk kan duwehte koasoakoasoi mwenginingin oh mwengemwenge oh kang pwilis oh kamwekid doaropwe kan pwehn katairong oh kohla imwen kainen ni soh kahrepe kan oh kalap pwand en pidelong nan wasahn mihding kan. Pahpa oh nohno kan me kin kesempwalki atail wasahn kaudok sohte pahn mweidong neirail seri kan en kauwehla dipwisou de tile de dihd kan nan Kingdom Hall de kauwehla nan imwen riatail brother oh sister kan me mihding kan kin wiawi ie. Oh kitail pil pahn pwungki me kitail sohte pahn wia tiahk sohte konehng kan oh lokaia sohte konehng kan oh kamwan suwed kan nan wasahn mihding kan.—Episos 5:4.
4 Ma kitail kin ahnsou koaros tamataman kahrepen atail mihding en Kristian kan kin wiawihki, kitail pahn tehk kanaieng ma pein kitail oh neitail seri kan pahn kasalehda wahu me konehng sapwellimen Siohwa wasahn kaudok nan wasao me kitail “pilidahn kesihnenda ie.”—Melkahka 84:10, New World Translation.