Kasalehda Wauneki Atail Pokonpene Sarawi Kan
“I pahn weikumwaillahng Saion, ei dohl sarawio, oh kihong kumwail peren nan ei tehnpas en kapakap.”—AISEIA 56:7.
1. Ia kahrepe kan me kohsang nan Pwuhk Sarawi ong atail wauneki mihding kan?
SIOHWA ketikihpene sapwellime aramas akan, Kristian me keidi kan oh iangarail teikan, pwe irail en kaudokiong ih pohn sapwellime “dohl sarawio.” E ketin kahrehong irail en peren nan sapwellime “tehnpas en kapakap,” sapwellime tehnpas sarawi en ngehn, me kin adaneki “imwen kapakap rehn tohn sampah koaros.” (Aiseia 56:7; Mark 11:17) Met kin kasalehda me sapwellimen Siohwa kaudok me sarawi, mwakelekel, oh ileile. Ni atail kin kasalehda wahu ni ahnsoun mihding en onop oh kaudok, met kin kasalehda me kitail pil kin ahneki sapwellimen Siohwa madamadau ong mehkan me sarawi.
2. Dahme kasalehda me Siohwa kin wiahki wasa me e pilada ong kaudok en kin wiawi ie wasa sarawi ehu oh iaduwen Sises pil kasalehda duwehte met?
2 Ni mwehin Israel, wasahn kaudok me Siohwa kin ketin pilada wia wasa sarawi ehu. Impwalo oh kepwe kan koaros loale me e wiawihkihda oh dipwisou kan me mih loale kin keikihdi leh oh kasarawihla pwe ‘irail en wiahla mehkan me keieu en sarawi.’ (Eksodus 30:26-29) Pere riau loale adaneki “Wasa Sarawi” oh “Wasa Sarawihe [‘Wasa keieu Sarawi,’ NW].” (Ipru 9:2, 3) Mwuhr impwalo uhd wiahla tehnpas sarawi ehu nan Serusalem. Pwehki sapwellimen Siohwa tehnpas sarawio mih nan Serusalem, ihme kahrehda wasao adaneki “kahnimw sarawio.” (Nehmaia 11:1; Madiu 27:53) Ni ahnsou me Sises ketiket sampah, e pil kin kasalehda me e kin wauneki tehnpaso. E lingeringerkihda ahn aramas ko mwamwahliki oh wiahki arail wasahn pisnis ni tehnpaso.—Mark 11:15, 16.
3. Dahme kin kasalehda duwen sarawi en kapokon en mehn Israel ko?
3 Mehn Israel kan kin kaukaule pokonpene pwe irail en kaudokiong Siohwa oh rong wadawad en sapwellime Kosonned akan. Ekei rahn en arail kasarawi kan kin adaneki kapokon sarawi kei pwe en kasalehda duwen sarawi en pokonpene pwukat. (Lipai 23:2, 3, 36, 37) Ni mwehin Esra oh Nehmaia, ni ehu kapokon me wiawi, irail mehn Lipai ko “kawehwehiong [aramas ako] Kosonnedo.” Pwehki “ni aramas ako ar rong dahme audepen Kosonnedo oh tapihada sengiseng,” mehn Lipai ko “padahkiong aramas koaros: ‘Rahnwet iei rahn ehu me kasarawihong Siohwa, amwail Koht. Kahrehda kumwail dehr mwahiei de sengiseng.’” Mehn Israel ko ahpw kasarawi rahn sarawi isuh en Impwal kan ni “pereperen.” Pil patehng met, “sang ni keieun rahnen sarawi wet lel ni kaimwiseklahn rahn, re kin wadek rahn koaros ekis wasa sang nan sapwellimen Koht Kosonnedo. Re wiewiahki sarawi wet erein rahn isuh, oh ni kawaluhn rahn, re ahpw wia sarawien kaimwisekala, duwen me koasoandier nan Kosonnedo.” (Nehmaia 8:7-11, 17, 18) Kapokon pwukat uhdahn wia mwekid sarawi kei oh irail me towehda kan anahne kasalehda wahu.
Atail Mihding kan Wia Pokonpene Sarawi kan
4, 5. Dahme kin wiawi ni atail mihding kan me kin kasalehda me pokonpene pwukat sarawi?
4 Mehlel, sohte sapwellimen Siohwa kahnimw sarawi pohn sampah rahnwet oh tehnpas sarawi tohrohr ehu ohngete kaudok. Ahpw, kitail en dehr manokehla me mihding en kaudok kan ohng Siohwa wia pokonpene sarawi kei. Pak siluh nan wihk ehu, kitail kin tuhpene oh wadek oh onopki iren Pwuhk Sarawi kan. Nin duwen mwehin Nehmaia, Mahsen en Siohwa kin “kawehwehda mwahu pwe aramas koaros en kak dehdehki.” (Nehmaia 8:8) Atail mihding kan koaros kin tepikihda oh imwikihla kapakap, oh ni pali laud en mihding pwukat, kitail kin koul en kaping ohng Siohwa. (Melkahka 26:12) Mihding en mwomwohdiso kan uhdahn wia kisehn atail kaudok ihme kahrehda kitail anahne en kasalehda tiahk en wahu.
5 Siohwa kin kapaiada sapwellime aramas akan ni arail kin tuhpene en kaudokiong ih, onopki sapwellime mahsen, oh perenki werek ong Kristian akan. Kitail kak kamehlele me ni wasahn mihding iei wasa me ‘Siohwa ketin inoukihda me e pahn ketikihong kitail sapwellime kupwuramwahu.’ (Melkahka 133:1, 3) Kitail kak ale kapai wet ma kitail kin iang towehda mihding oh rongorong kanahieng prokram ngenin pwukat. Pil patehng met, Sises mahsanih: “Wasa kis me riemen de silimen kin kohpene ie ni mwarei, I kin iang irail mi wasao.” Mehlel me ire wet kin dokedoke ahnsou me Kristian elder kan kin tuhpene pwe en koasoia kahpwal laud kan me kin lelohng ekei aramas akan, ahpw ire wet pil kak dokedoke atail mihding kan. (Madiu 18:20) Ma Krais, ki ngehn sarawi, kin ieiang irail Kristian akan me kin tuhpene ni mware, soangen pokonpene wet soh pil sarawi?
6. Dahme kitail kak ndahki atail wasahn mihding kan, me laud oh tikitik kan?
6 Mehlel me Siohwa sohte kin ketiket nan tehnpas sarawi kan me aramas wiahda. Ahpw, atail Kingdom Hall kan iei wasahn kaudok mehlel. (Wiewia 7:48; 17:24) Kitail kin tuhpene ni wasa pwukat pwe en onop mahsen en Koht, kapakapohng ih oh koulki sapwellime kaping. Met me pil kin wiawi ni atail wasahn kapokon laud kan. Soangen wasahn pokonpene laud kan me kitail kin rent pwe kitail en kak wia atail kapokon kan—duwehte wasahn mwadong laud kan ape—kin uhd wiahla wasahn atail pokonpene sarawi kan. Soangen ansouhn kaudok pwukat, me laud de tikitik, e konehng kitail en kasalehda wahu oh met anahne en sansalda sang ni mwomwatail oh atail tiahk kan.
Ahl akan en Kasalehda Wahu ni Atail Pokonpene kan
7. Ni ahl sansal dahieu kitail kak kasalehda wahu ong atail pokonpene kan?
7 Mie ahl sansal kan me kitail kak wia pwe en kasalehda me kitail wauneki atail pokonpene kan. Ehu ahl iei en kin iang towehda ahnsoun koul en sarawi kan. Pali laud en koul pwukat iei kapakap kei, ihme kahrehda kitail anahne en iang koul ni wahu. Wahnpoaron Pohl kin kasalehda Melkahka 22 ni a ntingihdi met duwen Sises: “I pahn kapinga komwi ni ar kin pokonpenehn kaudok.” (Ipru 2:12) Ihme kahrehda, kitail anahne en koasoanehdi kitail en kin miher nan dewetail ni ahnsou me chairman pahn pakairki koul oh tehk kanahieng wehwehn lokaia kan en koulo ni ahnsou me kitail kin kokoul. Atail pepehm kan en duwehte pepehm en sounmelkahkao me ntingihdi: “I pahn kasapahlkalahngan ong Siohwa sang nan kapehdi unsek mwohn pokon en sapwellime aramas akan.” (Melkahka 111:1) Ei, en iang koulki kaping kan en Siohwa wia kahrepe mwahu ehu kitail en kin iang mwadang kohla mihding oh mihmi lao lel mihdingo imwisekla.
8. Karasaras dah nan Paipel me kasalehda me kitail anahne kasalehda wahu ahnsoun kapakap en mihding kan?
8 Pil ehu ahl me kin kalaudehla kesempwal en atail mihding kan iei kapakap me kin wiawi ohng irail koaros me iang towehda mihding pwukat. Ni ehu ahnsou, irail Kristian en senturi-keieu kan nan Serusalem tuhpene oh “ehupene kapakap ong Koht.” Imwilahn met, irail doudoulahte—mendahki kalokolok—“padapadahngkiseli mahsen en Koht ni eimah mehlel.” (Wiewia 4:24-31) Kitail kak medemedewe mie emen me iang mih wasao me ah lamalam mih ekis wasa tohrohr erein kapakapo? Soh, irail “ehupene kapakap.” Kapakap me kin wiawi ni mihding kan kin kasalehda pepehm en koaros me iang towehda. Warohng kitail en kasalehda wahu ong ni ahnsoun kapakap pwukat.
9. Iaduwen atail kin kasalehda wahu ohng pokonpene sarawi kan sang ni mwomwen atail likou oh wiewia?
9 Kitail pil kak kasalehda atail wauneki laud sarawi en pokon pwukat sang ni mwomwen atail kapwat. Mwomwen atail likou oh wiahda pitenmoangatail kan pil kin kihong wahu en atail mihding kan. Wahnpoaron Pohl kaweidki: “I kin men aramas koaros [‘ohl kan,’ NW] wasa koaros en kapakap, aramas poadidi kan, me kak kauwada pehrail kan ni kapakap ni soh lingeringer de akamai. I pil men lih akan en tiahk mwahu oh kanahieng arail likou kan, re en likoumwahuda, kaidehn ni arail pahn wiahda pitenmoangarail ni ehu soangen mwohmw, de kapwatki kisin kohl kan, de takai kesempwal kan, de likou pweilaud kan; ahpw ni wiewia mwahu, nin duwen me konehng lih poadidi kan.” (1 Timoty 2:8-10) Ni atail kin iang kapokon laud kan me kin wiawi nan wasahn mwadong laud kan, atail likou en kin pwungiong irair en rahno oh pil ahnsowohte kasalehda wahu. Patehng met, atail wauneki koasoandi en kapokon pahn kahrehiong kitail en dehr mwengemwenge de kangkang pwilis erein ahnsoun kapokon. Atail kin likouda mwahu oh wiewia kan nan atail wasahn pokonpene kin kasalehda wahu ohng Siohwa Koht, sapwellime kaudok, oh pil ong riatail kan me kin iang kitail kaudok.
Tiahk me Konehng ong Towe kan en Tehnpas en Koht
10. Iaduwen wahnpoaron Pohl kasalehda me mie soangen irair en tiahk kan me kitail anahne mwekid pahrekiong ni atail kin wia atail mihding en Kristian akan?
10 Nan 1 Korint, irelaud 14, kitail kin diar en wahnpoaron Pohl kaweid loalokong me pid iaduwen mihding en Kristian akan kin wiawi. Ni kaimwiseklahn ah kaweid, e mahsanih: “Kumwail wiahda mehkoaros nin duwen me konehng oh koasoandi pwung.” (1 Korint 14:40) Atail mihding kan kin wia kisehn wiewia kesempwal en mwomwohdiso en Kristian, oh konehng kitail en kin kasalehda tiahk kan me konehng towe kan en tehnpas en Siohwa.
11, 12. (a) Dahme kitail en kasukuhlikihong neitail seri kan me kin iang atail mihding kan? (b) Ni ahl dah kan me seri kan kak kasalehda arail pwoson ni atail mihding kan?
11 Seri kan anahne sukuhliki duwen tiahk kan me konehng nan atail mihding kan. Pahpa oh nohno kan anahne kawehwehiong neirail seri kan me Kingdom Hall oh wasa kan me Pwuhk Study en Mwomwohdiso kin wiawi kaidehn wasahn mwadong. Wasa pwukat wia wasa kei me kitail kin kaudokiong Siohwa oh onop sapwellime mahsen. Nanmwarki loalokong Solomon ntingihdi: “Kanahieng ni omw pahn patohlahng nan Tehnpas Sarawio. Ni omw pahn patohla pwe ke en padahngki mehkot mwahu.” (Eklesiasdes 5:1) Moses padahkiong mehn Israel kan en kapokonepene me mah kan oh “seri kan.” E mahsanih: “Kapokonepene aramas akan koaros. . . pwe re en rong oh esehla duwen ar pahn lemmwiki Siohwa, amwail Koht, oh loalopwoatohng kapwaiada sapwellime padahk kan. Eri, kadaudokamwail, me sohte iang rong Kosonned en Siohwa, amwail Koht, pahn rong oh esehla duwen ar pahn peikiong.”—Deuderonomi 31:12, 13.
12 Pil duwehte nan rahn pwukat, irail me pwulopwul kan kin iang atail pahpa oh nohno kan towehda mihding kan pwehn rong oh sukuhliki. Ni arail pahn kakehr wehwehki ire mengei kan me pid padahk mehlel kan en Paipel, seri kan kakehr “kadehde” duwen arail pwoson sang ni arail pahn wia pasapeng mwotomwot kan. (Rom 10:10) Seri pwulopwul men mwein ele kak tepikihda pasapeng mwotomwot ohng peidek ehu me e wehwehki. Ele nin tepio, e pahn wadek eh pasapeng, ahpw mwuhr, e kak tepida pasapeng ni pein eh lokaia. Serio pahn perenki met oh e pahn wia kamwahu ehu ohng ih, oh soangen kasalepen pwoson wet kin kaperenda mohngiong en irail me mah kan me iang towehda mihdingo. Pahpa oh nohno kan kin wia mehn kahlemeng mwahu ohng neirail seri kan sang ni arail kin iang pasapeng. Ma e kak, e konehng seri kan en pein naineki neirail Paipel, pwuhken koul, oh pwuhk me iren onop kohsang ie. Irail anahne sukuhliki en wauneki pwuhk pwukat. Mepwukat koaros pahn sewese seri kan en wehwehki me atail mihding kan me kesempwal oh sarawi.
13. Dahme kitail mwahuki irail me ahpwtehn iang towehda atail mihding kan en kak ese me pid duwen atail kaudok?
13 Ni mehlel, kitail sohte mwahuki atail mihding kan en duwehte sarawi en Kristiandom. Arail sarawi kan kin wiawi ni mwohmw me sohte kin kasalehda kadek de ni mwomwen irair me aramas akan me nohn dipan de me kin nohn mwoaroangoaroang duwehte rock concerts. Kitail mwahuki atail wasahn mihding kan en kin wia wasa me aramas kak pehm kadek oh men pwaredo ie, ahpw kaidehn en wiahte wasahn tuhpenehte. Kitail kin tuhpene pwe kitail en kaudokiong Siohwa, ihme kahrehda atail mihding kan en kin wiawi ni wahu. Kitail men irail akan me ahpwtehn iang towehda atail mihding kan en rong padahk kan oh kilang atail wiewia kan oh pil wiewia en neitail seri kan oh kak nda: “Koht ketiket rehmwail met.”—1 Korint 14:25.
Irair Poatopoat Ehu me Pid Duwen Atail Kaudok
14, 15. (a) Dahme kitail kak wia pwe kitail en dehr ‘sohpeisang anahn akan en tehnpesen atail Koht’? (b) Iaduwen iren Aiseia 66:23 kin pweida?
14 Nin duwen kohdahr mwowe, Siohwa kin ketin kapokonepene oh kaperenih sapwellime aramas akan nan sapwellime “tehnpas en kapakap” me wia sapwellime tehnpas sarawi en ngehn. (Aiseia 56:7) Ohl lelepek Nehmaia katamankihong ienge mehn Suhs akan me irail anahne kasalehda wahu ong tehnpas sarawio ni arail pahn kin apwalih anahn akan en tehnpaso. E mahsanih: “Se sohte pahn sohpeisang anahn akan en tehnpesen at Koht.” (Nehmaia 10:39) Patehng met, kitail en dehr soikala sapwellimen Siohwa luhk ohng kitail en kaudokiong ih nan sapwellime “tehnpas en kapakap.”
15 Ni eh kasalehda anahnepen kaukaule tuhpene ni kaudok, Aiseia kohpada: “Ni rahn sarawien maram kapw oh rahnen sapad koaros tohn wehi koaros pahn patohdo pwe re en kaudokiong ie wasaht.” (Aiseia 66:23) Met kin wiawi nan rahnpwukat. Kristian inouda kan kin kaukaule tuhpene pwehn kaudokiong Siohwa wihk koaros nan sounpwong koaros. Irail kin wia met ni arail kin iang towehda mihding en Kristian kan oh iang kalohk en wehi pokon. Iaduwen, kowe emen me kin iang ‘patohdo pwe en kaudokiong Siohwa’?
16. Dahme kahrehda kitail anahne wiahki mehkot poatopoat ehu nan atail mour kitail en kaukaule iang towehda mihding kan nan ahnsou wet?
16 Aiseia 66:23 pahn dokedoke mehlel mour nan sapwellimen Siohwa sampah kapw me eh inoukidahr. Ni ahnsowo, “tohn wehi koaros,” pahn kin “patohdo pwe re en kaudokiong” Siohwa wihk koaros oh sounpwong koaros kohkohlahte. Pwehki kaudokiong Siohwa pahn wia kisehn atail mour en pali ngehn me poatopoat nan koasoandi kapw, e sou pil konehng kitail en wiahki mehkot poatopoat ehu nan atail mour kitail en kin kaukaule iang towehda mihding kan nan ahnsou wet?
17. Dahme kahrehda kitail anahne towehda mihding kan “duwen [atail] ese rahnen Siohwa kerendohr”?
17 Ni imwio kerendohr, kitail anahne koasoanehdi teng atail madamadau me kitail pahn iang towehda atail pokonpenehn Kristian akan ong kaudok. Pwehki atail wauneki koasoandi sarawi en mihding kan, kitail sohte kin mweidong atail doadoahk, homework en sukuhl, de sukuhl en ni soutik kan en kahrehong kitail en sohte kaukaule iang riatail kan nan mihding kan. Kitail anahne ale soangen kakehl me kin kohda sang ni atail kin patpene. Atail mihding kan kin kihong kitail ahnsou mwahu en esehla emen emen, kangoangpene, oh kasalehda “limpoak oh wiewia mwahu kan” nanpwungatail. Kitail anahne nantihong en wia met “pwe duwen [atail] ese rahnen Siohwa kerendohr.” (Ipru 10:24, 25) Kahrehda kitail en kasalehda atail wauneki atail pokonpene sarawi kei sang ni atail pahn kin kaukaule towehda, likouki likou me konehng, oh kasalehda wiewia de tiahk me konehng. Ni atail wia met, kitail kin kasalehda me kitail kin ahneki sapwellimen Siohwa madamadau me pid soahng kan me sarawi.
Kousapahl
• Dahme kasalehda me pokonpene kan en sapwellimen Siohwa aramas akan anahne en sarawi?
• Soangen ire dah kan me pid atail mihding kan kin kasalehda me pokonpene pwukat me sarawi?
• Iaduwen seri kan kak kasalehda me irail wauneki sarawien atail mihding kan?
• Dahme kahrehda kitail anahne wiahki atail towehda mihding kan mehkot me poatopoat?
[Kawehwehpen kilel kan nan ehu ehu pali 10]
Mihding kan ong kaudokiong Siohwa kin wia pokonpene sarawi kan sohte lipilipil iawasa pokonpene pwukat kin wiawi ie
[Kawehwehpen kilel kan nan ehu ehu pali 13]
Neitail seri kan kin iang mihding kan pwe irail en rong oh sukuhlikihdi mehkan