Doadoahk Ehu me Koht kin Ketin Utung
1 Rahnwet, aramas malaulau sang sapwellimen Koht ladu kan kin iang sukuhl laud, kepwehpwe, de wiahla aramas ndand nan koasoandi en ahnsouwet. Ihme kahrehda, ekei aramas kin mwamwahleki atail doadoahk en kalohk. (Aiseia 53:3) Ahpw, atail doadoahk en kasukuhlih aramas duwen Pwuhk Sarawi kin wahdohng aramas rar kei nin sampah pwon kamweit oh koapworopwor. Iaduwen aramas akan me sohte kin iang sukuhl laud de semwehmwe kin pweida mwahu nan ahr doadoahk en kalohk? Pwehki Koht kin ketin utung doadoahk en kalohk wet. (Madiu 28:19, 20; Wiewia 1:8) Wahnpoaron Pohl kawehwehda oh mahsanih: “Koht ketin pilada me luwet akan nan sampah pwe en ketin kasarowehdi me kehlail kan.”—1 Korint 1:26-29.
2 Pali laud en irail wahnpoaron kan oh Kristian teikan nan keieun senturi “me sohte wad oh pil sohte iang sukuhl.” (Wiewia 4:13) Ahpw, irail kin eimah kapwaiada ahr doadoahk en kalohki Rongamwahu, oh Siohwa kin ketin kapaiada irail. Mendahki irail kin lelong kahpwal akan oh uhwong kan, ‘mahsen en Kauno ahpw inenen kekeirda kehlail oh lolohkseli.’ Sohte mehkot kak kauhdi doadoahk wet pwe Koht kin ketin utung. (Wiewia 5:38, 39; 19:20) E kin duwehte nan atail ahnsou. Kaun kehlail kan me kin nantiong en uhwong doadoahk wet sohte kak kauhdi Rongamwahu wet en kekeirda kehlail oh lohkseli.—Aiseia 54:17.
3 Kaping en Kohwong Koht: Pwehki kitail kin ahneki pwais kaselel en wiahla sapwellimen Koht sounpapah kan, met kin kihong kitail kahrepe mwahu ieu en suweiki pein kitail? Soh kowahlap. Pohl me ntingihdi duwen doadoahk en Kristian: “Ahpw kiht me kin ahneki pai kesempwal wet, se rasehng sah pwehl kan me kopwukopw oh kehohla; eri met pwe en kadehdehda duwen manaman lapalap eh uhdahn sapwellimen Koht, a kaidehk aht.” (2 Korint 4:7) Pohl kin pohnese kahrepen e kak wia e doadoahk en kalohk, pwehki Koht kin ketin kakehlahda ih.—Episos 6:19, 20; Pilipai 4:13.
4 Kitail pil kin pohnese me doadoahk en kalohk kin pweida mwahu pwehki “Koht kin ketin sewese kitail.” (Wiewia 26:22) Ki doadoahk en kalohk me kin wiawi nin sampah pwon, Siohwa kin ketin doadoahngki kitail en kahrehong wehi kan en masapwehkada—met kin wia kilel ieu duwen kadeik me pahn wiawi ni ahnsou keren. (Akkai 2:7) Kitail kin ahneki pwais kesempwal ieu en wiahla “tohndoadoahk kei me kin iang Koht ketin wiewia sapwellime doadoahk”!—1 Korint 3:6-9.