Doadoahngki Brochure kan en Kamwekid Lamalam oh Mongiong
1 Padahk mehlel en Paipel anahne en wiawi ni ahl ehu me pahn kamwekid lamalam oh mongiong. Ni ahnsou me Sises kawehwehda padahk mehlel ong irail kan me rongorong ih, e kin pilada oaralap kan me irail kin perenki oh me pahn kamwekid irail. (Luk 24:17, 27, 32, 45) Pweida mwahu en atail doadoahk en kalohk kin poahsoanda keieu laud pohn atail nannanti en kasalehda anahn en pali ngehn en irail kan me kin rongorong atail padahk.
2 Brochure kan kin kak wia mehn padahk lipwalipw en kamwekid lamalam oh mongiong en irail ko me kitail tuhwong nan kalohk. Medemedewe mwowe duwen ihs me pahn mwekidki rohngo nan ehu ehu brochure me kitail pahn kihla nan sounpwong en September:
—Paieki Mour Sampah Kohkohlahte! Kilel tohto kan oh iren Paipel kan me kileledi pahn sewese seri kan oh irail kan me sohte nohn ese wadawad en wehwehkihla kupwuren Koht.
—Koperment Me Pahn Wahdo Paradais. Aramas koaros me kin iang pidada koperment pahn mwekidki rohng wet me pid iaduwen Wehin Koht pahn kamwahuiala kahpwal kan en tohnsampah.
—“Look! I Am Making All Things New.” (Lokaiahn wai) Aramas kan me kin lelohng kahpwal kan pahn kalahnganki rohng en kamweit wet me pid ahnsou kohkohdo me pahn saledek sang lokolok.
—Dahme Koht Kupwurki Kitail en Wia? Nan iren mehn kasukuhl mwotomwot oh mengei 16, irail ko me men esehla laud duwen Paipel kak ale kasukuhl en kaudokiong Koht ni ahl me pwung.
—When Someone You Love Dies. (Lokaiahn wai) Sounapwalih wasahn mehla kin kalahnganki naineki brochure wet pwe re kak kihong peneinei kan me kin nsensuwedla. Sounkalohk kan me kin kalohk nan wasahn serdi en me mehlahr kan kin doadoahngki brochure wet pwehn kamweitihki me nsensuwed kan. Sister riemen tuhwong ehu peneinei me tohtohki aramas isimen me kin wia kapakap ni sousouwo. Sang ni ara ehukihong peneinei wet rohng en kamweit sang brochure wet, nohno en peneinei wet tepiada onop Paipel rahn mwurin sister kan tepin tuhwong ih!
—Should You Believe in the Trinity? (Lokaiahn wai) Aramas emen me kin kesempwalki pelien lamalam pahn mwekidki padahk mehlel me diarek nan brochure wet me kin kasansalehda likamw en padahk kan en Kristendom.
3 Pein esehla ehu ehu brochure pwukat oh nantiong doadoahngki ni ahl me keieu mwahu nan ahmw wasahn kalohk. Ong iren sawas en wia padahk nan brochure kan, kilang neitail doaropwe Atail Doadoahk Ong Wehio en August 1998, pali 8. Siohwa en kapaiada amwail nannanti en wia padahk me pahn lel lamalam oh mongiong en aramas kan.—Mark 6:34.