I Men Tepiada Onop Paipel Rehn Emen!
1 Kitail koaros men tepiada onop Paipel rehn aramas akan, oh mie kahrepe mwahu en ahneki soangen ineng wet. Kitail wehwehki me ma kitail men lel atail mehn akadei en katohnpadahk, kitail anahne onop Paipel rehn aramas. (Madiu 28:19, 20) Ahpw, ekei kitail saikinte pehm soangen peren me kin kohsang padahkiong emen padahk mehlel, mendahki kitail iangehr wia doadoahk en kalohk sounpwong de sounpahr tohto. Dahme kitail kak wia nan sounpwong en December? Pwe kitail pahn kihla pwuhken Mour Kohkohlahte, kitail kak nantiong tepiada onop Paipel rehn aramas ni atail pahn doadoahngki pwuhk wet.
2 Pilahn en Iang Kalohk Imwin Wihk kan: Se kangoange koaros en koasoanehdi arail ahnsou oh nantiong tepiada onop Paipel rehn emen. Brother kan me kin wia Pwuhk Study en Mwomwohdiso pahn pilada imwin wihk ehu de riau (Rahn Kaunop ehu de riau oh Rahn Sarawi ehu de riau) pwe arail pwihn en Pwuhk Study en nantiong pwurehng pwurala rehn aramas akan oh tepida onop Paipel rehrail.
3 Ahnsou me kumwail pahn tuhpene ong kalohk, tamataman en wahdo noumw doaropwe kan me ke ntingihdi eden aramas me ke tuhwong nan kalohk. Ke pahn nantiong pwurehng pwurala rehn aramas me perenki rong, de aramas me ale neitail pwuhk kan de brochure kan de makasihn kan, de irail me iang towehda mihding kan mahs. Ahnsou me ke pahn pwurehng pwurala rehn aramas pwukat, ke kak nantiong tepida onop Paipel rehrail.
4 Wia Kamwomwada Duwen Onop Paipel: Ekei pak, ahnsou me kitail tuhpene ong kalohk, brother me kihpeseng pwihn en kalohk pahn koasoanehdi kamwomwada ehu pwehn kasalehda iaduwen kitail pahn tepiada onop Paipel ahnsou me kitail pwurehng pwurala rehn aramas akan. Ke kak nda: “Aramas tohto naineki Pwuhk Sarawi, ahpw re sohte wehwehki me e kin audaudki pasepeng kan en peidek kesempwal tohto me aramas tohto kin pwonopwonki. [Kasalehda audepen pwuhken Mour Kohkohlahte, oh wadek oaralap kan en irelaud 1, 4, 7, 8, oh 11.] Ma ke onop Pwuhk Sarawi ni ahmw doadoahngki pwuhk wet awa ehu nan ehu ehu wihk, ke kak wehwehkihla Pwuhk Sarawi erein sounpwong kei. Ma ke men pilada oaralap ehu de riau, I kak kasalehong komwi iaduwen kita kak onop Pwuhk Sarawi ni ata doadoahngki pwuhk wet.” Ma aramaso sohte men onop pwehki e kin inenen kedirepw, ke kak kawehwehong ih me ke kak kamwotehla koasoandi en onop. Ke kak kasalehong ih brochure Kupwurki, oh ndaiong ih me ke kak tuhong ih oh kumwa kak onopki ehu iren mehn kasukuhl nan brochure ehu ehu wihk me pahn reireiki minit 15-30.
5 Ma kitail koaros nantiong tepiada onop Paipel rehn aramas akan oh ma kitail kin kapakapkihong Siohwa met pwehn sewesekin kitail, kitail uhdahn pahn diar aramas akan me men onop Paipel! (1 Sohn 5:14, 15) Ma ke men tepiada onop Paipel rehn emen, ke kak nantiong en wia met nan sounpwonget.