Sounapwalih en Mwomwohdiso kan me kin Tiengla Mwowe—Eldero me kin Wia Onop en Kahn Iroir
1 Kahn Iroir me kin Pakapakairki Wehin Siohwa [The Watchtower] iei tepin sawas en mwengehn ngehn me “pwihn en ladu lelepek oh loalokong” kin kihong kitail “ni ahnsou me konehng.” (Madiu 24:45) Eldero me kin onopkihong tohnmwomwohdiso Kahn Iroir ahneki pwukoah kesempwal ehu nin duwen sounpadahk koahiek men me kin wia mehn kalimeng mwahu nan ah mouren Kristian.—Rom 12:7; Seims 3:1.
2 Pwe ah padahk en mie lipwe, eldero me wia onop en Kahn Iroir anahne en nantiong kaunopada ehu ehu wihk. E pahn kapakapki met oh kanaieng kaunopada mwahu. Ah nsenohki tohnmwomwohdiso kin sansalda ni ah kin nannanti ni mehlel pwe ireo me kitail onopki en lel mohngiongatail. E kin kasalehda mouren ireo me kitail sukuhliki oh sewese kitail en kilang iaduwen ire pwukat kin pidada oaralap en artikelo.
3 Ah kaunopada mwahu kin pidada ah pahn onopki mwowe iren Pwuhk Sarawi kan pwehn ese iaduwen ire pwukat kin kadoadoahk. E kin mwohneki Mahsan en Koht ni ah kin kangoangehki tohnmwomwohdiso en doadoahngki mwahu neirail Paipel kan erein onopo. Ni ahnsou me tohnmwomwohdiso sohte kin kapwarehda ire kesemwpal ehu de ni ahnsou me re pil sohte kin kasalehda kadoadoahkpen mouren iren Pwuhk Sarawi kesempwal ehu, eldero pahn kapatahiong ehu peidek tohrohr pwehn kasalehda ire kesempwal wet. Ni ahl wet, e sewese kitail en wehwehkihla ia uhdahn pasepeng pwungo oh en esehla iaduwen kitail en kapwaiada dahme kitail sukuhlkiehr nan atail mour.
4 Eldero me kin wia onop en Kahn Iroir pahn kekeirada nannanti en kamwahuwihla pein ah koahiek en padahk. E sohte pahn kalapw koasoi ahpw kin kangoangehkin kitail en wia pasepeng kan—ni pein atail lokaia, ni mwotomwot, oh kosoiahte mouren ireo. Ekei pak e pahn katamankin kitail me aramaso me tepin sapeng parakrapo me e anahne en kihda pasapeng me mwotomwot, oh doakehte peideko me ntingdi nan parakrapo. Pasepeng teikan sang rehn tohnmwomwohdiso teikan pahn kasalehda iaduwen iren Paipelo kin kadoadoahk, oh ire kan me kin utung, de iaduwen atail kak kapwaiada ireo. Ni ah kin kangoange emen emen kitail oh peneinei kan en kaunopada, eldero me kin wia onop en Kahn Iroir pahn nantiong kamwekidada koaros en men iang pasepeng.
5 Nin duwen “aramas kan me kin ale kasukuhl sang rehn Siohwa,” kitail kin kalahnganki “kisakis kan rehn ohl akan,” duwehte elder kan me kin wia onop en Kahn Iroir, me kin “doadoahk laud . . . padapadahk.”—Aiseia 54:13; Episos 4:8, 11; 1 Tim. 5:17.