Sounapwalih en Mwomwohdiso kan me kin Tiengla Mwowe—Brother kan me kin Wia Onop en Pwuhk en Mwomwohdiso
1 E kin wia kapai kaselel ehu ong elder koahiek men de ministerial servant koahiek men en papah nin duwen emen me kin wia Onop en Pwuhk en Mwomwohdiso. Apwalih anahn en pali ngehn en irail ko me kin iang ah onop kin wia pwukoah toutou ehu. Ah epwel kin pidada pwukoah siluh.
2 Koahiek en Padahk: Brothero anahne en kaunopada mwahu ehuehu wihk ong Onop en Pwuhk en Mwomwohdiso pwe pwihn en onopo en kak wehwehki. E kin nantiong kalaudehla arail kalahnganki ireo me re onopki. Pein ih sohte pahn kin kalap koasoakoasoite erein onopo, ahpw ni ahnsou kan me konehng e pahn kapataiong peidek kan me kin dokdoke ireo pwehn kapwarehda mouren iren mehn kasukuhlo. E kin song en wia onopo ni ahl ehu me pwihno en perenki oh kak padahkihsang mehkot oh me koaros me towehda en iang koasoi. Ah mehn akadei iei en kakehle kitail ni pali ngehn, oh en kasalehda kesempwalpen en doadoahngki mehn kasukuhlo, oh en wia onopo en lel madamadau oh mohngiong.—1 Des. 2:13.
3 Epwel en Sawas kan: Brothero me kin wia Onop en Pwuhk en Mwomwohdiso kin “rasehng wasahn rukusang kisinieng oh melimel.” (Aiseia 32:2) E uhdahn kin nsenohki irail ko koaros me iang ah pwihn en onop oh kin tehkada me sawas en pali ngehn kin kohda ma emen irail ko me e apwalih kin mworusla.—Esek. 34:15, 16; 1 Des. 2:7, 8.
4 Idipek nan Kalohk: Brothero me kin wia Onop en Pwuhk en Mwomwohdiso kin loalopwoatohng wiahda koasoandi kan me kak doadoahk rehn irail ko koaros nan ah pwihn pwe irail koaros en iang kalohk. E kin tiengla mwowe nan doadoahk en kalohk, ni ah kin ese me ma e pahn iang kalohk ahnsou koaros, oh idipek nan kalohk, oh ngoangki kalohk, met pahn pil kamwekid ah pwihn en onopo en pil wia soahng pwukatte. (Kol. 4:17; 2 Des. 3:9) Kedekedeo, e pahn song en iang emenemen tohn ah pwihn en onopo kalohk. Ma kitail men kamwahuwiala atail koahiek en kalohk oh padahk, brothero me kin wia Onop en Pwuhk en Mwomwohdiso kak sewese kitail en lel atail mehn akadei kan.—1 Tim. 4:16; 2 Tim. 4:5.
5 Kitail kin inenen paiekihda kisakis pwukat rehn ohl pwukat me kin onopadahngehr en sewese kitail ni pali ngehn oh utung kitail ni limpoak. (1 Des. 5:14) Kitail en kasalehda atail kalahnganki koasoandi kaselel wet sang rehn Siohwa ni atail pahn iang onop en pwuhk ahnsou koaros oh lelepek utungada doadoahk en kalohk.—Ipru 10:25.