Kihla Pwuhken Mouren Peneinei ong Aramas Koaros
1 Emen lih sang Indiana, U.S.A. kasalehda ah kalahnganki pwuhken Wiaiong Mour En Ahmw Peneinei Nsenamwahu. E ntingihdi: “I men kapinga kumwail pwehki pwuhk kaselel wet. Audepe me kaselel oh mengei en wehwehki, oh me pwulopwul kan iangahki me mah kan pahn kak paiekihda arail wadek pwuhk wet. I men naineki ekei pwe I en kihong kompoakepahi keren kan, oh I men kisekisehki serepein kan me pahn pwopwoudla.” Eksperiens wet pahn kangoangehkin kitail en kihla pwuhken Mouren Peneinei ong pahpa/nohno kan, oh me mah kan oh me pwulopwul kan. Iet ekei iren sawas kan me ke pahn men song doadoahngki nan omw kalohk erein sounpwong en March.
2 Ni ahnsou me ke pahn tuhwong emen me pwulopwul, ke kak nda:
◼ “Me pwulopwul tohto me weiuhk kin medemedewe en pwopwoudla. Ahpw iawasa me ke pahn kak diarada kaweid likilik kan me pid ire wet? [Mweidohng en sapeng.] Me pwulopwul kan kin kalap koasoia me re saikinte wehwehki ma re kakehr pwopwoud. Mweidohng ie en ehukihong uhk dahme kisin pwuhk wet koasoiahki ire wet.” Pahkalahng irelaud 2 nan pwuhken Mouren Peneinei, me kawehwehda duwen kesempwalpen en ahneki poahsoan en peneinei ehu me kehlail. Kasalehda ehuehu sawaspen oaralap kan nan irelaudo. Pwilikihdi pwuhko reh oh koasoanehdi me ke pahn pwurehng pwurodo.
3 Ni ahnsou me ke kin koasoiong pahpa men de nohno men, ke kak nda:
◼ “Se kin ehukihong pahpa oh nohno kan kaweid katapan kan me uhdahn kin doadoahk oh pweida ong kekeirada seri kan. Kisin pwuhk wet Wiaiong Mour En Ahmw Peneinei Nsenamwahu kin audaudki kaweid pwukat.” Pahkalahng pali 115, oh wadek parakrap 5. Mwuri, wadek Deuderonomi 6:6, 7, me ntingdi nan parakrahp 13 ni pali 120. Pousehlahte ni omw pahn nda: “Pwuhk wet seweseiehr pahpa oh nohno tohto en pweida nan arail kekeirada neirail seri kan. Ma ke men wadek pwuhk wet, I pahn perenki pwilikihdi rehmwi met.”
4 Ni ahnsou me ke kin koasoakoasoiong emen aramas mah, ke kak nda:
◼ “Mwurin ahi pahn wadek koasoi mwotomwot wet, menlau padahkihong ie dahme ke lemeleme.” Pahkpeseng pwuhken Mouren Peneinei ong ni pali 171, oh wadek parakrap 2. Mwuri kalelepek reh ia ah pasepeng. Me poahsoanehda pohn ah pasepeng, ke kak wadek ekei wasa kan nan pwuhko mwohn omw pahn kihong.
5 Ni ahnsou me ke pahn pwurehng pwurala rehn irail kan me ke pwilikihdi rehrail pwuhken Mouren Peneinei, tamataman en song tepiada ehu onop en Paipel rehrail. E pahn konehng en tepida onop Mehn Kasukuhl 8 nan brochure Kupwurki de irelaud 15 nan pwuhken Knowledge. Nindoken met, kitail en nantiong sewese aramas koaros, pahpa/nohno, me mah kan, oh me pwulopwul kan en wiahda arail mouren peneinei en Kristian en nsenamwahu.