Sewese Peneinei kan en Anehki Koapwoaroapwoar Ong Ni Ahnsou Kohkohdo
1 “Noarok me mwahu,” emen sounkoasone mwohni padahkiong ehu pwihn en kesepwil sang sukuhl, oh kapataiong: “Ke kak noarok ahpw sohte suwedki pepehm wet.” Ih duwen lamalam en sampah me kin mwohnki pein emen laud sang mehkoaros oh kin lemeleme me noarok kak kihong kitail koapwoaroapwoar kaselel en ahnsou kohkohdo. Ahpw, weksang met, Sises padahkiong irail me ma emen men wiahla emen Kristian en “tohnmeteikihla pein ih . . . Pwe dah katepehiong aramas emen, ma e alehdi kepwe koaros en sampah pokon, e ahpw pahn pwupwusang eh mour?” (Madiu 16:24-26) Pwehn anehki koapwoaroapwoar ong ahnsou kohkohdo, emen anahne mwohnki kupwuren Koht nan eh mour—mehn akedei me keieu kesempwal nan mour en peneinei rahnwet. (Mel. 143:10; 1 Tim. 4:8) Met kin sansal nan irelaud 14 nan pwuhken Wiaiong Mour En Ahmw Peneinei Nsenamwahu. Pwuhk wet kin sewese aramas en wehwehki dahme keieu kesempwal nan arail mour oh dahme irail kak wia pwehn kak sewese arail peneinei kan. Ni atail kin kalohki rongamwahu wasa koaros, dahme kitail kak nda pwehn kangoange mehteikan en wadek pwuhken Peneinei? Iet ekei mehn koasoi:
2 Ni ahnsou me ke tuhwong aramas nan imwarail de naniahl, ke kak doadoahngki doaropwe “Paieki Mour En Peneinei” pwehn tepida koasoi ong aramas. Ke kak nda:
◼ “Edetehn mour en ahnsou wet kin kihda kapwunod tohto, ke lemeleme aramas kak anehki peneinei me pahn nsenamwahu? [Mweidong en sapeng.] Doaropwe wet kin kasalehda me e kak wiawi. Ke men wadek doaropwe wet?” Ma tohnihmw men naineki doaropwe, ke kak pousehla oh nda: “Pwehki ke men wadek duwen mour en peneinei, mwein ke pil pahn perenki wadek pwuhk wet me kin kihda kaweid me pid iaduwen kitail kak diarada peren nan mour en peneinei.” Pakalahng pali 3 me kin kasalehda audepen pwuhken Peneinei. Kasalehda sang wasao ekei irelaud kan me kaselel. Pakalahng pali 8 oh wadek parakrap 9 oh 10. Idek rehn tohnihmwo ma e men naineki pwuhko, oh koasoi duwen koasoandi en sawas. Kawehwe ong tohnihmwo me ke mwahuki pousehla amwa koasoipene oh idek reh iahd me kumwa kak pwurehng tuhpene.
3 Ke kak pousehla dahme ke koasoia duwen paieki mour en peneinei oh nda:
◼ “I men kasalehong uhk mehkot sang nan pwuhko me ke ale rahn teio me I lemeleme ke pahn kalahnganki. Irelaud 14 kin koasoi duwen dahme me keieu kesempwal ma kitail men anehki peneinei nsenamwahu. [Kasalehda ire kan sang nan parakrap 8 oh 9 ni pali 184 oh 185.] Ke kilang wasaht me mehn kapiro en diarada pereperen nan mour en peneinei iei me tohnpeneinei koaros anahne sawaspene pwehn wia kupwuren Koht. Kiht kin kangoange peneinei kan en mwohndipene oh onopki Pwuhk Sarawi pwehn sukuhliki kupwuren Koht oh iaduwen irail kak wia kupwuren Koht nin duwen mour en peneinei. Se kin idek rehn tohnihmw kan ma irail men onopki Pwuhk Sarawi ni soh isepe oh wia koasoandi wet erein sounpwong kei. Ma ke mwahuki, I kak wia kisin kamwomwada pwehn kasalehong uhk ia mwomwen koasoandi en onopki Pwuhk Sarawi kin wiawi.” Ke kak pwurala oh doadoahngki brochure Dahme Koht Kupwurki Kitail en Wia? de pwuhken Mour Kohkohlahte, sohte lipilipil me ke lemeleme pahn mwahu ong tohnihmwo.
4 Ahnsou me ke koasoi ong iengomw tohnsukuhl kan nan sukuhl de me pwulopwul kan ni imwarail, ke pahn mweidong ren sapeng peidek wet:
◼ “Ia uwen kesempwal ke lemeleme pahpa/nohno kan oh me pwulopwul kan anahne mweidong selen kapehse en kin langalang ahnsou koaros nanpwungarail? [Mweidong en sapeng.] Tehk dahme pwuhk wet me pid mour en peneinei kin koasoi duwen ire wet nan irelaud 11 me koasoia ‘Selen Kapehse en kin Langalang.’ [Wadek parakrap 1 oh 2 nan pali 146 nan pwuhken Peneinei.] Parakrap kan en mwuhr kin kihda kaweid mwahu ong iaduwen emen kak kamwahuiala kapehse nanpwungen eh peneinei. Pwuhk wet adaneki Wiaiong Mour En Ahmw Peneinei Nsenamwahu. Ma ke men uhdahn wadek pwuhk wet, ke kak naineki.” Kawehwe me ke pahn pwurodo oh kilang ma mie mehkot eh men nda duwen dahme e wadek.
5 Ke kak pousehla dahme ke koasoiong me pwulopwulo rahn teio duwen nanpwungen pahpa/nohno oh nah me pwulopwul oh nda:
◼ “I perenki kilang me ke kin kesempwaliki kapehse en mwahu nan ahmw peneinei. Soangen ire dahieu me ke lemeleme me keieu kesempwal pahpa/nohno oh seri kan en koasoipene?” Mweidong tohnihmwo en sapeng. Mwurin mwo, pakalahng pali 159 nan pwuhken Peneinei oh wadek pasepeng nan parakrap 29. “Onop Pwuhk Sarawi iei ahl kaselel en sukuhliki duwen Koht.” Kasalehda brochure Dahme Koht Kupwurki Kitail en Wia? Ke kak nda me iren mehn kasukuhl 16 pahn oaralapiehda mour en padahk en Pwuhk Sarawi. Wadek tepin koasoi nan pali 2 oh wadekpene Iren Mehn Kasukuhl 1.
6 Ma ke tuhong emen pahpa de nohno ni imwarail de wasahn mwemweit de wasahn mwadong, ke kak nda:
◼ “I ese me ke pahn pwungki me kakeirada seri kan nan rahn pwukat inenen apwal. Dahme ke lemeleme pahn kak pere atail peneinei sang irair suwed en sampah wet. [Mweidong en sapeng.] Iet kaweid kan me inenen sawas laud ong ie. Oaralapiehda karasaras nan parakrap 29 oh mwurin mwo wadek parakrap 28 ni pali 111 nan pwuhken Peneinei. Kawehwe me pwuhko kin kihda kaweid mwahu ong iaduwen pahpa/nohno kak perehla arail peneinei sang irair suwed en sampah wet. Idek rehn tohnihmwo ma e men naineki pwuhko oh ndaiong ih me ke kak pwurala ahnsou me mwahu ong ih pwehn sapeng eh peidek kan.
7 Ni ahnsou me ke pwurala rehn pahpa/nohno me ke tuhong rahn teio oh me naineki pwuken “Peneinei,” ke kak nda:
◼ “Ni ahnsou me kita tuhpene rahn teio, I kilang me ke kin inenen nsenohki noumw seri kan oh ke men wia uwen me ke kak en pere irail sang irair suwed en sampah wet. I sehse ma ke wadekehr wasaht, ahpw mie ehu wasa nan pwuhk me I kihong uhk me ke pahn men wadek. [Wadek parakrap 12 ni pali 119.] Pwehn wiahda nanpwung mwahu rehn Koht, kitail anahne en esehla Ih sang ni atail wadek sapwellime mahsen, Pwuhk Sarawi. Ke mwahuki ie en kamwomwada iaduwen se kin onopki Pwuhk Sarawi nin duwen peneinei ehu?”
8 Sounkaweid en sampah sohte kak kasalehong peneinei kan elen mour nsenamwahu oh irail pahn uhd kansensuwedih peneinei. E mwahu kitail en kihseli pwuhken Peneinei wasa koaros pwehn sewese aramas wasa koaros en ese me Mahsen en Koht me pahn kak sewese peneinei kan en anehki koapwoaroapwoar ong ahnsou kohkohdo.—1 Tim. 6:19.