Iaduwen Tohnpeneinei kin Miniminpene Pwehn Iang Kisehn—Mihding kan en Mwomwohdiso
1 Peneinei Kristian kan anahne en kapwaiada kehkehlik en iang pokon ong mihding kan en mwomwohdiso. (Ipru 10:24, 25) Ni arail kin miniminpene, koaros kak pweida ni arail kaunopada, iang towehda, oh iang pasapeng nan mihding kan. Irair en peneinei kan kin wekpeseng, ahpw mie soahng kan me Kristian ohl pwopwoud men, lih pwopwoud pwoson men, de emen pahpa de nohno kiripw kak wia pwehn kekeirada en peneinei kin miniminpene ni mehkan me ngehnin, mendahki ia uwen tohtohn neirail seri kan oh re sounpahr depe.—Lepin Padahk 1:8.
2 Wiahda Ahnsoun Kaunopada: Tohnpeneipei kan kin miniminpene pwehn kilang me emenemen kin kaunopada mwahu ong mihding kan en mwomwohdiso. Peneinei tohto kin onopkihpene artikel en Watchtower (Kahn Iroir) ehuehu wihk. Ekei kin kaunopada ong Onop en Pwuhk en Mwomwohdiso de wadek Paipel ehuehu wihk nin duwen peneinei ehu. Mehn akadeio iei en tamatamante mouren ire kesempwal kan mwohn arail pahn iang towehda mihding kan. Ni ahl wet, koaros pahn paiekihda dahme re rong oh onopadahr en iang pasapeng ma mie ahnsou mwahu en wia met.—1 Timoty 4:15.
3 Pilahn en Iang Pasapeng oh Wia Padahk: Koaros nan peneinei anahne en ahneki mehn akadei en kasalehda ah koapworopwor mwohn meteikan ni arail pahn iang pasapeng ni mihding kan. (Ipru 10:23) Mie emen tohnpeneinei me anahne sawas de kangoang en wia met? Sawas dahieu me emen anahne pwehn kaunopada ah pwais nan Theocratic Ministry School? Lih pwopwoud kan kin kalahnganki ma arail pwoud kan kin tiengla mwowe oh mwein ele kihda ehu karasaras me konehng me arail pwoud kan kak doadoahngki nan arail padahk de sewesehki arail pwoud kan soahngen wiepen mwomwen padahko ma kalohk sang lel ihmw, de return visit, de kalohk ni ahnsou soh lipilipil, de wiepe teikan. Pahpa oh nohno kan en dehr lemeleme me re anahne wiahda ong neirail seri tikitik kan arail padahk kan. Pwe ma re pahn wia met, e pahn kihsang en seri ko ineng en tiengla mwowe oh pein wiahda arail padahk kan. Ahpw pahpa oh nohno kan kak sewesehki neirail me tikitik kan met oh rong en seri ko kin praktis arail padahk kan.—Episos 6:4.
4 Koasoanehdi Pwehn Towehda: Seri kan kak ale kaiahn sang ahnsou me re tikitik me ren likouda oh onopada pwehn mweselahng wasahn mihding ahnsou ehu me kileleiong. Tohnpeneinei kan anahne en miniminpene oh apwaliala pwukoahn nan ihmw kan pwe ren dehr pwandasang mihding kan.—Kilang iren sawas kan nan pwuhk ko Family Life, pali 165, parakrahp 10, oh Young People Ask, pali 316-17.
5 Wiewiahn pahpa kan oh nohno kan oh seri kan koaros kak kasalehda mahsan ko en Sosua en mahsie, me mahsanih: “A ngehi oh ei peneinei, se pahn papah Kauno [Siohwa].” Eri en inoukihda en miniminpene pwehn uhdahn iang kisehn mihding kan en mwomwohdiso.—Sosua 24:15.