Kalaudehla Kalohk Ong Aramas Koaros Pwehki Imwin Koasoandi Wet Kerendohr
1 Ahnsoun rahk kin wia ahnsoun kaperen. E pil wia ahnsoun doadoahk laud. Ahnsou mwotomwotlahr pwehn dolung wahnsahpw kan. Soundolung wahnsahpw kan sohte kak wawaila nan arail doadoahk.
2 Sises koasoia me “imwin koasoandi wet” kin rasehng ahnsoun rahk. (Madiu 13:39, New World Translation) Kitail momour nan imwin rahn akan en koasoandi wet, oh atail ahnsoun kalohk “wasa koaros nin sampah” wie tikitikla. (Madiu 24:14) Ni imwin koasoandi wet kerendohr, kitail anahne kalaudehla atail ahnsoun kalohk. Pwekida? Sises mahsanih: “Rahket me inenen laud, a tohndoadoahk kan me malaulau.”—Madiu 9:37, 38; Rom 12:11.
3 Nantihong Kalohk: Ni ahnsou me Sises tepida kalohk, miehte sounpahr siluh elep me luhluhwe pwehn wia soahng koaros me e anahne wiahda. Ni ngoang, e wia met, oh mahsanih: “I uhdahn pahn pil kapahrengki Rongamwahu en Wehin Koht, pwe ih me Koht ketin poaronekiniehdo.”—Luk 4:43.
4 Sises sewese sapwellime tohnpadahk kan en ahneki soangen ngoang wet. (Mark 13:32-37) Ihme kahrehda, “rahn koaros, nan Tehnpas Sarawio oh nan imwen aramas akan irail kin wonoweite ni padahk oh kawehwe Rongamwahu duwen Sises me iei Mesaia.” (Wiewia 5:42) Wiewia soh katepe kan sohte kin wiahla dahme keieu kesempwal nan arail mour. Mendahki ma tohnpadahk kan me malaulau, re kalohki rongamwahu ong “aramas koaros nin sampah.”—Kolose 1:23.
5 Mie kahrepe laud pwe kitail en pil kakairada soangen ngoangohte ni ahnsouwet, pwe “imwin mehkoaros kerendohr.” (1 Piter 4:7) Siohwa koasoanehdier mehnia rahn oh awa pwehn wahdo imwin koasoandi wet. (Madiu 24:36) Doadoahk en kalohk pahn kaneknekla nan ahnsouwo me luhluhwe. Ihme kitail anahne kalaudehla atail nannanti pwehn lelohng rehn aramas koaruhsie oh kalohk ong irail.
6 Ma kitail kalaudehla atail ahnsoun kalohk ong aramas nin doken imwin koasoandi wet kerekerendohr, kitail kak perenki ndaiong Siohwa, duwehte me Sises wia: ‘I kaimwsekalahr doadoahk kan me komw ketin kilelehiong ie.’—Sohn 17:4.