“Kalohki Mahseno . . . Ni Karuwaru”
1 Ma ke ale mehkot me kilikilel powe lepin lokaia “KARUWARU,” iaduwen ke pahn kilangwong lepin lokaia wet? Lepin lokaia “karuwaru” kin wehwehki “ken mwadang apwalihala.” Ihme kahrehda, wahnpoaron Pohl kaweidki Kristian kan en “kalohki Mahseno . . . ni karuwaru.” (2 Tim. 4:2, New World Translation) Ke kin kapwaiada doadoahk en kalohk ni ahmw men “mwadang apwalihala” de wia doadoahk wet?
2 Pohl rong ekei ripoht kan me mie ekei Kristian kan me kin ‘pohnkahke’ ni arail wia doadoahk en Kristian. (Rom 12:11) Pwehki met, arail doadoahk oh arail peren me kin kohsang sewese meteikan wia tikitikla.
3 Iaduwen Sises kin Kilangwong Doadoahk en Kalohk: Sises kin uhdahn perenki wia doadoahk en kalohk! E mahsanih: “Ei kapwaiada kupwuren ih me ketin poaroneiehdo, oh wiahda sapwellime doadoahk iei me ei tungoal.” Ni en Sises kin wia mehn kahlemeng mwahu, e kin kamwekid sapwellime tohnpadahk kan en wia duwehte, oh Sises kangoange irail ni e mahsanih me ‘wahn mwetuwel kan mahier oh mwahuwongehr en dondol.’ (Sohn 4:34, 35) E sansal me Sises ahneki madamadau en karuwaru me pid doadoahk en kalohk pwe e mahsanih ong sapwellime tohnpadahk kan: “Kumwail eri kapakap oh peki rehn Kaunen rahket pwe en ketin kadarodo tohndoadoahk tohto pwe re en iang doadoahk.” (Madiu 9:38) Sises wehwehki me sapwellime doadoahk iei doadoahk en kalohk, oh e sohte pahn mweidohng mehkot en kauhdi ih sang en wia doadoahk wet.
4 Iaduwen Kitail? Rahnwet, e inenen kesempwal kitail en wia doadoahk en kalohk ni karuwaru. Nan pali laud en sahpw kan, “wahrail kan mahier oh mwahuwongehr en dondol.” Pil nan sahpw kan me sounkalohk kan kin kalohk ong aramas tohto, miehte aramas kid kid kei me kin papidaisla ehu ehu pahr. Pwehki koasoandi suwed wet pahn kereniong imwisekla, kitail en tamataman me mie “doadoahk tohto me kitail anahne wia me pid doadoahk en Kauno.” (1 Korint 15:58) E kin kesempwal me kitail en nannanti doadoahk laud ni atail kin kalohki Rongamwahu en Wehio, oh met wia anahn laud sang mahs.
5 Kitail en nantihong lel aramas koaros oh kalohk ong irail, oh kitail en kalohk ihmw-lel-ihmw oh pil kalohk ong aramas sohte lipilipil wasa aramas kin mih ie. Nin duwen kitail pahn wia uwen me kitail kak en kalohk ong aramas ahnsou koaros, kitail kin kasalehda me kitail kin rapahki mahs Wehin Koht nan atail mour. (Madiu 6:33) Atail lelepek ong atail doadoahk en kalohki Mahseno ni karuwaru pahn kak wahdohng kitail peren laud.