Padahkiong Mehteikan Iaduwen Re Pahn Wia Kamwahu Ehu Ong Pein Irail
1 Siohwa kin ketin kupwurki aramas koaros en wia kamwahu ehu ong pein irail. (Aiseia 48:17) E kin ketin wehwehki dahme pahn kihong kitail peren mehlel. E sohte kin kupwurki aramas akan en lelohng kahpwal, ahpw, e kin kupwurki aramas en peikiong sapwellime kosonned akan oh nsenamwahuki mour. Kitail kak wia kamwahu ehu ong pein kitail ma kitail pahn mourki sapwellimen Koht ahlo. (Melkahka 34:8) Iaduwen kitail kak padahkiong mehteikan en wia met?
2 Dahme Aramas Kin Mwahuki: Dahme aramas kan me kin mihmi nan ahmw wasa kin nsenohki? Re soh kin nsenohki sohte mehkot me pahn kauwehla imwarailo, oh pil arail pwopwoud pahn kehlail, oh pil dahme kin wiawiong neirail seri kan ni ahnsou kohkohdo, oh soahng pwukat? Ni ahnsou me mie kahpwal kan, iawasa re kak rapahki ie sawas kan? Ekei kin likih pein irail, oh ekei kin rapahki sawas kan nan prokram en sawas kan, oh ekei kin likih kaweid en mehteikan. Ahpw, re sohte kak uhdahn nsenamwahu ahnsou me re kin idawehn kaweid me re kin ale. Kitail anahne sewese irail en wehwehki me sapwellimen Koht Mahsen kin kihda kaweid me keieu mwahu ong kitail aramas. (Melkahka 119:98) Kitail kak wia met ni atail pahn kasalehda iaduwen kaweid sang nan Pwuhk Sarawi kak kamwahuiala arail mour ni ahnsouwet me re pahn doadoahngki kaweid wet.—2 Tim. 3:16, 17.
3 Kamwahuiala Mour en Peneinei: Aramas malaulau kin wehwehki iaduwen kaweid en Episos 5:22–6:4 kin sewese kamwahuiala kahpwal kan en peneinei. Ih met me wiawi ong pwopwoud ehu me, mwurin sounpahr eisek en ara pwopwoud, re lemehda en katohrohrpeseng. Ahpw, liho tepida onop Paipel oh e kin sukuhliki duwen pwukoahn lih pwopwoud. Ni ah pwoud ohlo kilang duwen iaduwen liho wukila ni eh kin doadoahngki dahme e sukuhliki sang nan Pwuhk Sarawi, ohlo pil men iang onopo. Mwuhr, e koasoia: “Met se wehwehki dahme pahn keieu wahdo nsenamwahu ong mour en peneinei.”
4 Katepe Mehlel en Mour: Ni en emen me pwulopwul me kin doadoahngki wini en kasaliel kan rapahki sawas sang Sounkadehde kan, e sukuhliki me Siohwa kin nsenohki aramas. E koasoia: ‘I sukuhliki me mie kupwuren atail Sounkapikada me pid aramas oh ong irail me kin wia kupwuren Koht, mie arail koapworopwor en ale mour soutuk. Ke sohte kak wehwehki ia uwen ahi nsenamwahuki sukuhliki soahng pwukat. Rahnwet, I nsenamwahuki ahi roson en paliwar, nsenmwakelekel, oh ahi nanpwung mwahu rehn Koht.’
5 Aramas koaros kak paiekihda kaweid sang nan Mahsen en Koht. Ni atail kin doadoahngki kaweid kan, kitail kak wehwehki me sapwellimen Siohwa ahl kin mwahu sang elen mour teikan koaros. (Melkahka 116:12) Kitail ahneki pwais kaselel wet en pakairki ong mehteikan ire wet oh padahkiong irail iaduwen re pahn wia kamwahu ehu ong pein irail. Ni atail kin wia met, kitail pahn kilang me e uhdahn pahn imwila mwahu.