Sukuhl oh Ahmw Mehn Akadei kan Ni Pali Ngehn
1 En sukuhliki mwahu wadawad, nting oh wehwehki duwen geography oh poadoapoad en aramas (history) oh wahntuhke (mathematics) oh siens oh en wehwehki soahng pwukat sang atail sukuhl ni atail pwulopwul kin kak sewese kitail ni atail laudla. Ke pahn pil sukuhliki iaduwen ahmw pahn medemedewe, kasawih ire kan, kamwahuiala kahpwal kan oh medewehda madamadau kan me pahn mwahu ong mour. Ahmw sukuhl pahn sewese iuk erein ahmw mour. Iaduwen ahmw sukuhl kin pid ahmw mehn akadei ni pali ngehn me pid ahmw mour oh sewese iuk en ale “loalokong oh erpit”?—Lepin Padahk 3:21, 22.
2 Pwehn Kak Doadoahk Mwahu Ni Ahmw Papah Koht: Ni ahnsou me ke iang sukuhl, rong kanahieng dahme ahmw sounpadahk kin padahkihong uhk oh nantiong en wia ahmw homework mwahu. Ma ke pahn ale kaiahn en wadawad mwahu oh onop mwahu, ke pahn kak mengeiong kasawih Mahsen en Koht oh met pahn sewese iuk en kakehlailla ahmw pali ngehn ahnsou koaros. (Wiewia 17:11) Ahmw loalokong pahn pil sewese iuk en sewese aramas me tikida nan soangsoangen irair kan, dahme re kin perenki oh dahme re kin kamehlele ahnsou me ke kin tuhwong irail nan kalohk. Dahme ke sukuhliki pahn sewese iuk en wia ahmw pwukoah nin duwen Kristian men nan sapwellimen Koht pwihn.—Pil kilang 2 Timoty 2:21; 4:11.
3 Sukuhliki Pwehn Kamourih Pein Uhk: Ma ke pahn nantiong ahmw sukuhl, ke kak koahiekla pwehn kak ale doadoahk mwahu mwurin ahmw kesepwil sang sukuhl. (Tehk 1 Timoty 5:8.) Pilada dahme ke pahn ale (subject kan) ni keneinei. Pilada en sukuhliki doadoahk me kin mie wasa sohte lipilipil, kaidehn sukuhliki doadoahk me pahn apwal en diar. (Lepin Padahk 22:29) Ahmw sukuhl pahn sewese iuk pwehn kak ale doadoahk ma ke men kohla wasakis pwehn sewese doadoahk en kalohk nan wasa kan me anahne sawas.—Pil kilang Wiewia 18:1-4.
4 Ni ahmw iang sukuhl, ken sukuhliki mwahu soahng kesempwal kan oh met pahn sewese iuk en kalaudehla ahmw papah Siohwa. Nantiong pwehn ale koahiek kan pwehn kak ale doadoahk en mwohni me pahn kamourih iuk pwe ken kak kekeirada nan doadoahk en papah Siohwa. Ih duwen ahmw sukuhl pahn kak sewese iuk en kekeirada oh lel ahmw mehn akadei ni pali ngehn.