Kahlemengih Sapwellimen Siohwa Irair en Sohte Lipilipilki Aramas
1 Siohwa kin ketin nsenohki aramas akan. E kin ketin kupwurperenki mehmen me kin wia kupwure, sohte lipilipil ih soangen aramas dah. (Wiewia 10:34, 35) Ni ahnsou me Sises kin kalohk ong aramas, e pil sohte kin lipilipilki aramas. (Luk 20:21) Kitail anahne kahlemengih mehn kahlemeng mwahu pwukat, oh ih me Pohl wia, oh e ntingihdi: “Koht, iei ih mehtehmen me pil Kaunen aramas akan koaros, me kin ketin kupwurmwahwih aramas koaros me kin likweriong ih.”—Rom 10:12.
2 Ni atail kin kalohki Rongamwahu en Wehin Koht ong aramas koaros me kitail kin tuhwong, met kin kihda kapinga laud ong Koht. Kitail anahne nantihong ehukihong aramas koaros Rongamwahu wet, sohte lipilipil wehi me re kohsang, ma re lapalap de soh, sukuhl de soh, kepwehpwe de semwehmwe. (Rom 10:11-13) Met kin wehwehki me kitail pahn kalohk ong koaros me kin rong—ohl kan, lih kan, me pwulopwul kan oh me mah kan. Kitail anahne kohla ni ihmw koaros pwehn kihong tohnihmw koaros arail ahnsou mwahu en rong padahk mehlel.
3 Nsenohki Aramas Koaros: Atail mehn akadei iei en kalohk ong aramas koaros. Ihme kahrehda, ekei sounkalohk kan kin kalohk ong aramas ni ohpis en toahkte kan, imwin wini kan, imwin me mah kan, ohpis kan me kin apwalih me semwehmwe kan, oh pil nan wasa kan me aramas kin kohla pwehn kesehla kamamsakau de wini suwed. Oh pil, sounkalohk kan kak kalohk ong aramas me kin apwalih imwen me mehla kan, oh irail sounapwalih en sukuhl, oh sounkaweid en tohnsukuhl kan oh sounkopwung kan. Ni ahnsou me kitail kin tuhwong soangen aramas pwukat, e pahn konehng en kasalehda atail kalahnganki doadoahk mwahu re kin wia en apwalih aramas akan. Kitail en kasalehda wahu oh pilada artikel kan me pid doadoahk me re kin wia oh kahpwal kan me kak pwarada nan doadoahk me re kin wia.
4 Ehu rahn, emen sister kalohk ong emen sounkopwung ahnsou me sounkopwungo mihmi nan eh ohpis. Mwurin ira koasokoasoipene, ohlo koasoia: “Ke ese dahme I kak ndahki Sounkadehdehn Siohwa kan? Re kin daurete kosonned mwahu kan oh re sohte kin pweieksang kosonned pwukat.” E sansal me mehn kadehde mwahu kohwong ohl lapalap menet.
5 Kitail sehse mohngiong en aramas akan. Ahpw, ni atail kin kalohk ong aramas koaros me kitail kin tuhwong, kitail kasalehda me kitail likih Koht en kahluwa atail doadoahk. Oh e pil kin kihong aramas arail ahnsou mwahu en rong duwen koapworopwor en ahnsou kohkohdo oh mwekidki. (1 Tim. 2:3, 4) Kitail en doadoahngki atail ahnsou mwahu oh kahlemengih sapwellimen Siohwa irair en sohte lipilipilki aramas ni atail pahn nantihong kalohk ong aramas koaros oh padahkiong irail duwen Rongamwahuwo.—Rom 2:11; Episos 5:1, 2.