Kasalehda Atail Nsenohki Aramas—Ni Atail Pahn Kalohk ong Aramas Sohte Lipilipil
1 Nan ehu kaudiahl, wahnpoaron Sohn kilangada tohnleng men me pihr nan wehwe oh weuwa Rongamwahu ohng aramas en “sampah kan, wehi koaros, kadaudok koaros, lokaia koaros, oh sahpw koaros.” (Kaudiahl 14:6) Kitail kin kapwaiada en tohnlengo mehn kahlemeng en kalohk ohng aramas soh lipilipil? Mwein kitail kakete ahneki madamadau en lipilipilki aramas ahpw kitail sohte kin tehk mwahu met. Atail wiewia kan ohng aramas me kitail kin tuhwong kak kamwekid irail en rong sang ni mwomwen atail kin kihwei Rongamwahuo ohng irail. Kahrehda, kitail anahne kasalehda ni elen limpoak atail nsenohki aramas ni atail kin kalohk ohng aramas akan me kin tikida wasa wekpeseng kan.
2 Tehk Ahmw Wasahn Kalohk: Mie irail kan me kin kohsang ehu sahpw tohrohr me kin kousoan nan ahmw wasa? Mwein kitail sohte kin tehk irail. Song en rapahkihda soangen aramas pwukat oh nantihong esehla irail. Dahme re kin anahne oh medemedewe, perenki de sohte perenki, arail iren kapwunod kan, oh aramas dah kan me re sohte pwungki? Song en kawekihla ahmw padahk en Wehio en pwungiong arail irair kan. (1 Korint 9:19-23) Duwehte wahnpoaron Pohl, kitail en ahneki pepehm me kitail pwukoahki en ehukihong koaros nan atail wasahn kalohk duwen rongamwahuo, iangahki irail kan me kohsang nan sahpw teikan, irail kan me arail tiahk weksang atail, irail kan me kin lokaiahki ehu lokaia tohrohr, oh irail kan me inenen kepwehpwe.—Rom 1:14, ftn.
3 Ahpw, iaduwen ahmw pahn kak kalohk ong emen me kin lokaiahki ehu lokaia tohrohr? Doadoahngki kisin pwuhk me oaralap koasoia Rongamwahu ong Aramas sang nan Wehi kan Koaros. Ke mwein kak pil weuwaseli tract de brochure me mih ni lokaia kan me tohto kin lokaiahki nan ahmw wasahn kalohk. (Kilang Atail Doadoahk Ong Wehio en July 2003 pali 4, pars. 2-3.) Pil patehng met, ekei sounkalohk kan kin nantihong esehla rahnmwahu de kisin padahk mwotomwot ni ehu soangen lokaia tohrohr. Aramas kin kalapw perenki oh pwungki ni arail kin rong meteikan kin nantihong lokaiahiong irail ni pein arail lokaia, mehnda ma ekiste, oh met pahn kak kahrehong irail en rong Rongamwahuo.
4 Kahlemengih Siohwa: Ni atail pahn kin tuhwong irail kan me kin kohsang nan wasa teikan, kitail kin kahlemengih Siohwa Koht, “me kin ketin kupwurki aramas koaros en ale komourparail oh marainkihla me mehlel.”—1 Timoty 2:3, 4.