Dahme Kak Sewese Kitail en Kesihnenda Teng Nan Pwoson?
1 Sangete ahnsou me kitail tepida werekiong sapwellimen Siohwa pwihn, atail kekeirada ni pali ngehn kin kihong kitail peren laud! Ahpw, ma mouratail pahn ‘poadidiong reh, en pil kekeirkihda ih, oh atail pwoson en kin kehlailla mehlel nin duwen me kitail padahngkiher,’ kitail anahne nantihong kekeirada ni pali ngehn. (Kolose 2:6, 7) Pali laud en kitail wie kekeirada ni pali ngehn, ahpw ekei luwetlahr ni pali ngehn pwehki re sohte kin “dadaurete nan pwoson mehlel.” (1 Kor. 16:13, New World Translation) Kitail kak wia mehkot pwe kitail en dehr mweidohng atail pwoson en luwetala. Dahme kitail pahn wia?
2 Wia Dahme Pahn Kakehlail Ahmw Pali Ngehn Ahnsou Koaros: E pahn mwahu en ahnla wia soahng ngehnin kan me pid sapwellimen Siohwa pwihn. Sapwellimen Siohwa pwihn me kin nsenohki kaitarala atail anahn en pali ngehn kan. Mihding kan en mwomwohdiso oh kapokon kan kin kamwekid kitail en kekeirada ni pali ngehn oh kolokol atail lelepek ong Siohwa, ma kitail kin kaukaule iang mihding kan oh kapokon kan pwehn paiekihda kapai kan me kin kohsang tuhpene pwukat. (Ipru 10:24, 25) Ma kitail pahn wiahda koasoandi en onop Paipel, wadek makisihn en Watchtower oh Awake! oh wadek pwuhk kan me kin koasoia padahk loal kan me kohsang Mahsen en Koht oh ahnla wia koasoandi pwukat, e pahn sewese kitail en kakehlail atail pali ngehn. (Ipru 5:14) Ma kitail pil pahn wiahda mehn akadei kan me pahn kakehlail atail pali ngehn oh nantihong lel mehn akadei pwukat, kitail pahn ale kapai kan me pahn sewese kitail sang met kohla.—Pilipai 3:16.
3 Sawas Sang Irail me Mah ni Pali Ngehn: Ken nantihong werekiong irail me mah ni pali ngehn nan mwomwohdiso. Ken esehla irail elder kan nan mwomwohdiso, pwe irail me pahn keieu kak kakehlail kitail. (1 Deselonika 2:11, 12) Rong kanahieng ni ahnsou me elder kan kin kihong komwi kaweid oh mehn sawas kan. (Episos 4:11-16) Ministerial servant kan pil kin men sewese kitail en kakehlailla atail pwoson, eri, kitail kak ale kangoang sang irail.
4 Ke anahne sawas ong ahmw kalohk? Koasoi ong elder kan oh peki arail sawas. Mwein re kak kihong emen en sewese iuk nan kalohk nin duwen prokram en “Pioneer kan Sewese Meteikan.” Ke ahpwtehn papidaisla? Ke kak onop pwuhken Our Ministry oh doadoahngki iren sawas kan me mihmi loale pwehn kekeirada oh mahla ni pali ngehn. Komwi emen pahpa de nohno? Ken nantihong kakehlailla pali ngehn en noumw seri kan.—Episos 6:4.
5 Ma kitail kehlail ni pali ngehn oh kitail kin kolokol atail pwoson, kitail kak ahneki nanpwung mwahu rehn Siohwa oh pil nanpwung mwahu rehn riatail kan. Mehpwukat pahn sewese kitail en powehdi kasongosong kan me kin kohsang Sehdan, oh kin kakehlailla atail koapworopwor en ale mour soutuk ehu rahn.—1 Piter 5:9, 10.