Irail me Kak Sewese Kitail Ni Ahnsou Apwal akan
1. Iaduwen ahn emen kehl ni pali ngehn kakete luwetala?
1 Anna, emen sister me ah pwoud ohl sohte iang kaudok mehlel, kin ahneki doadoahk me kin kihsang eh ahnsou laud, me kin kahrehong ih en sohte kaukaule iang towehda mihding kan, doadoahk en kalohk oh onop Mahsen en Koht. Mendahki e kin poakohng Siohwa, e sohlahr iang kalohk. Ahpw, mwuhr e ale sawas en pali ngehn sang rehn elder kan me kin nsenohki ih.
2. Ni ahl dahieu me Kristian akan koaros kak sewese meteikan?
2 Ma kitail kin alehdi sawas en pali ngehn me kin kohsang mwomwohdiso en Kristian, eri, met kin kasansalehda me kitail kin likih Siohwa. Irail ohl mah kan ni pali ngehn nan mwomwohdiso kin kahlemengih sapwellimen Sises Krais limpoak ni ahr kin rapahki elen kangoange oh sewese irail tohnmwomwohdiso kan me kin lelohng apwal ni pali ngehn. (1 Deselonika 5:14) Pak tohto, ihte me anahn, iei kangoang me kin poahsoanda pohn iren Paipel kan. Kaidehn irail elder kante, ahpw Kristian akan koaros kin kak sewese irail akan me kin luwet ni pali ngehn. Kitail koaros kin pein pehmada duwen ia uwen kehlail oh sawas laud “mahsen kan me kin kohda ni ahnsou me konehng.”—Lepin Padahk 25:11; Aiseia 35:3, 4.
3, 4. Soangen madamadau dahieu kitail anahne ahneki ni atail kin sewese meteikan, oh iaduwen kitail kak wia met?
3 Pein Nsenoki oh Tepida Sewese Meteikan: Pwehn kasalehda me kitail kin nsenohki irail akan me anahne sawas, kitail anahne pein nsenohki oh tepida sewese irail, kasalehda limpoak, oh ni mehlel, ineng en men sewese irail. Ni ahnsou me Sonadan tepida wehwehki duwen ahn Depit kahpwalo, e “ahpw kohla reh oh kangoangehki ndaiong duwen eh Koht eh ketin sinsile.” (1 Samuel 23:15, 16) Doadoahngki lokaia kadek kan ni ahnsou me ke pahn tuhwong oh sewese meteikan. Lokaia kan me kin poahsoankihda nsenoh mehlel kin imwila mwahu. Oh pil, Sises kin, ni sansal, kihda karasaras ieu me kin kasansalehda me kitail anahne en kasalehda ngoang oh nanti ni atail kin sewese emen brother de sister en pwurehng kehlailda ni pali ngehn. (Luk 15:4) Ma kitail kin ni mehlel ahneki ineng en men sewese meteikan, met pahn kamwekid kitail en nantihong sewese meteikan edetehn irail sohte kin mwadangete kekeirada.
4 Ia uwen kangoang ong irail me kin iang atail Pwuhk Study, ma pein kitail kin nsenkihda oh luhke irail en iang kitail kalohk! Ni ahnsou me kitail kin sewese emen iengetail ladu en Siohwa en iang kalohk, kitail kak isaneki ahnsou mwahu wet en kakehle ih. Soangen ahnsou kaperen pwukat en iang meteikan nan sapwellimen Siohwa doadoahk kin keieu wia kangoang laud ong irail akan me kin song en pwurehng kehlailda ni pali ngehn.
5. Ekei ahnsou, soangen sawas dah kei me irail elder kan kak kihda?
5 Sawas en Limpoak Ieu: Irail akan me werei sang doadoahk en kalohk de iang towehda mihding kan mwein pahn anahne ale sawas pwehn kakehlahda arail pwoson. Mwein ihte me anahn: emen en onop Paipel rehrail, oh kak doadoahngki ehu pwuhk duwehte Worship the Only True God, Draw Close to Jehovah, de What Does the Bible Really Teach? Pwehki aramas menet papidaislahr, onopo sohte anahne wiawi ni ahnsou werei. Congregation Service Committee anahne tehk mwahu ihs me pahn kak paiekihda sawas wet.—Kilang Atail Doadoahk Ong Wehio en December 1998 oh November 2000, Koakon en Peidek kan.
6. Iaduwen emen sister a pwurehng kehlailda ni pali ngehn?
6 Anna perenkihda alehdi sawas sang rehn elder kan ni ahr kin koasoanehdi emen sister mah ni pali ngehn en wia Paipel Study reh. Mwurin ira onop pak pahieute, Anna kin pwurehng karanih Siohwa. E pwurehng tepida iang towehda mihding en mwomwohdiso kan oh ah ineng en kapinga Siohwa Koht oh iang kalohk pil pwurehng kehlailda. Sister mah ni pali ngehn menet pil sewese Anna ni ah kin kahrehla ih ong ah Paipel Study kan lao lel Anna kehlailda oh kak pwurehng iang kalohk sang ihmw lel ihmw. Ihte me e anahne pwe en pwurehng kehlailda iei emen en sewese!
7. Kapai dah kan kin kohsang atail kin sewese meteikan ni pali ngehn?
7 Kakehlahda irail akan me anahne sawas kin wahdohng koaros kapai kan. Emen me kin alehda sawas kin paiekihda karanih Siohwa oh pwurehng iang wiewia kan en sapwellime pwihn. Elder kan kin pil perenki kilang emen kekeirada ni pali ngehn. (Luk 15:5, 6) Tohnmwomwohdiso kan kin ehupene ni ahr kin kasalehda limpoak oh nsenoh sawaspene. (Kolose 3:2-14) Ia uwen met a wia kahrepe mwahu kitail en kin men kahlemengih Siohwa, sawas ehu me kak dierek ahnsou koaros!—Episos 5:1.