‘Kumwail En Weweidki Krais Ni Amwail Miniminiong Ih’
“Nin duwen amwail wiahkihlahr Krais Sises amwail Kaun, kumwail en weweidki ih ni amwail miniminiong ih.”—KOLOSE 2:6.
1, 2. (a) Iaduwen Paipel kin kawehwehda duwen mouren Enok ni eh papah Siohwa ni lelepek? (b) Iaduwen Siohwa ketin sewese kitail en miniminiong ih, nin duwen me Kolose 2:6, 7 mahsanih?
MIE ahnsou ehu me ke kilang kisin pwutak kis iang ah pahpa alialuhwei? Kisin pwutak menet kin alasang soahng koaros me seme kin wia, mesen pwutak menet kin kasansalehda me e kin wadekla eh pahpa; seme kin sewese ih, oh pil mesen pahpa menet kin kasansalehda me e kin poakong oh pwungki nah pwutak. Duwehte met, Siohwa kin doadoahngki soahngen karasaras wet pwehn kawehwehda duwen emen me kin papah ih ni lelepek. Karasepe ieu, sapwellimen Koht Mahsen kin koasoia me ohl lelepek Enok “kin poadidiong Koht [mehlel].”—Senesis 5:24; 6:9.
2 Nin duwen sahm kompoak men kin sewese nah pwutak pwulopwul oh ira kin wiahki ehu kekeidwei, Siohwa pil kin ketikihong kitail sawas me keieu mwahu. E ketin kadarodohr sapwellime Ohl Iehros nan sampah. Ni soahng koaros me Sises wia ni ahnsou me e mihmi nin sampah, e kin ni unsek kasansalehda Seme nanleng. (Sohn 14:9, 10; Ipru 1:3) Pwe kitail en miniminiong Koht, kitail pil anahne miniminiong Sises. Wahnpoaron Pohl ntingihdi: “Nin duwen amwail wiahkilahr Krais Sises amwail Kaun, kumwail en weweidki ih ni amwail miniminiong ih. Mourimwail en poadidiong reh, en pil kekeirkihda ih, oh amwail pwoson en kin kehlailla mehlel nin duwen me kumwail padahngkiher; oh kumwail en audaudki kapingkalahngan.”—Kolose 2:6, 7.
3. Nin duwen pwuhken Kolose 2:6, 7, dahme kahrehda kitail kak nda me kitail en miniminiong Krais sohte kin wehwehki me kitail pahn papidaiste?
3 Pwehki irail men miniminiong Krais, idawehnla sapwellime kahlemeng mwahu, tohnsukuhl en Paipel kan me mehlel kin papidaisla. (Luk 3:21; Ipru 10:7-9) Nan sampah pwon nan pahr 1997, aramas daulih meh 375,000 papidaisla—met daulih aramas 1,000 nan ehu ehu rahn. Kekeirada wet inenen kaperen en kilang! Ahpw, mahsen en Pohl me ntingdi nan pwuhken Kolose 2:6, 7 kin kasansalehda me atail miniminiong Krais sohte ihte kin wehwehki me emen en papidaisla. Lepin lokaia wet ni lokaiahn Krihk “weweidki” kin wehwehki wiewia ehu me sohte pahn uhdi. Oh pil, Pohl kapatahiong me en miniminiong Krais kin pidada ire kesempwal pahieu: en poadidiong Krais, kekeirkihda ih, pwoson en kin kehlail mehlel, oh kitail en audaudki kapingkalahngan. Kitail en tehk lepin lokaia pwukat oh sukuhliki iaduwen soahng pwukat kak sewese kitail en pousehla miniminiong Krais.
Komw kin ‘Poadidiong Krais’?
4. Ia wehwehn ‘poadidiong Krais’?
4 Keieu, Pohl ntingihdi me kitail anahne en ‘poadidiong Krais.’ (Kilang Madiu 13:20, 21.) Iaduwen aramas men kak nantiong en poadidiong Krais? Eri, kalowe kan en tuhke pwoat sohte kin sansal, ahpw re kin inenen kesempwal ong tuhkeo—re kin katengehdi tuhkeo nan pwehl oh e kin kihong tuhkeo ketinain. Me duwehte met, mehn kahlemeng en Krais oh sapwellime padahk kan kin keieu doake atail mour ni soh sansal, oh katengetengdi nan atail madamadau kan oh mongiongatail kan. Met kin kihong kitail katinain ni pali ngehn oh kin kakehlekitail. Ni atail kin mweidong met en kaunda atail madamadau kan, wiewia kan, oh atail pilipil kan, kitail kin mwekidki en inoukihong Siohwa mouratail.—1 Piter 2:21.
5. Iaduwen kitail kak kekeirada atail “ngoangki kang” mwengehn ngehn?
5 Sises kin poakong loalokong sang Koht. E kin karasaihong loalokong wet duwehte mwenge. (Madiu 4:4) Ihme, nan sapwellime Kahpahrek en Pohn Dohl, e ketin doadoahngki iren Paipel 21 me kohsang Nting en Ipru. Pwehn kahlemengih ih, kitail anahne kapwaiada dahme wahnpoaron Piter kaweidkin kitail—“en ngoangkihte kang” mwengen ngehn “nin duwen seri pwelel kan.” (1 Piter 2:2) Ni ahnsou me seri pwelel kan kin ngoangkihte kang pilen dihdi, e kin sansal me e men mwengadahr. Ma kitail ni ahnsouwet sohte kin ahneki soahngen pepehmohte en ngoangkihte kang mwengehn ngehn, Piter kin kangoange kitail en “kekeirada” ngoango. Iaduwen kitail kak wia met? Kaweid me diarekda nan pwuhken Melkahka 34:8 (New World Translation) kak sewese kitail: “Song oh kilang ma Siohwa me mwahu.” Ma kitail pahn ahnsou koaros “song” sapwellimen Siohwa Mahsen, Pwuhk Sarawi, oh nantiong wadek ekei iren Paipel kan ehu ehu rahn, kitail pahn kilang me e kin kihda sawas laud ni pali ngehn. Mwuhr, atail ineng en perenki wadek Paipel pahn kekeirada.
6. Dahme kahrehda e kesempwal kitail en medemedewe duwen dahme kitail kin wadek?
6 Ahpw, e kesempwal me mwenge ko me kitail kangala anahne en kamwutmwutdi nan kapehdatail. Eri, kitail anahne medemedewe duwen dahme kitail kin wadek. (Melkahka 77:11, 12) Karasepe ieu, ni ahnsou me kitail kin wadek pwuhko me oaralap koasoia The Greatest Man Who Ever Lived, kitail pahn paiekihda laud ehu ehu irelaud ma kitail pahn uhdi oh wia peidek ong pein kitail: ‘Mehnia irairen Krais I kilang nan poadoapoad wet, oh iaduwen I kak kahlemengih?’ Madamadau ni ahl wet pahn kak sewese kitail en doadoahngki dahme kitail sukuhliki nan atail mour. Oh ni ahnsou me kitail anahne wiahda pilipil ehu, kitail kak medemedewe duwen dahme Sises ele pahn wia. Ma kitail pahn wiahda atail pilipil kan ni ahl wet, kitail kin kasansalehda me kitail kin poadidiong Krais.
7. Iaduwen kitail pahn kilangwong ketinain en pali ngehn kakaluwak kan?
7 Pohl pil kangoangekinkitail en tungoale “tungoal kekeluwak,” iei padahk loal kan en Mahsen en Koht. (Ipru 5:14) Wadwadek Pwuhk Sarawi pwon ele pahn kak wia tepin atail mehn akadei. Pil mie oaralap kan en onopki, duwehte tomw meirong en Krais, de soahngsoahngen inou kan me Siohwa ketin wiaiong sapwellime aramas akan, de ekei kokohp kan nan Pwuhk Sarawi. Mie mehn onop tohto me kak sewese kitail en, ni karasaras, koledi oh kamwutehdi de medemedewe loal duwen ketinain en pali ngehn. Dahme kahrehda kitail men akadeiong audaudki loalokong wet? Met kaidehn pwe kitail pahn suweiki, ahpw en kalaudehla atail limpoak ong Siohwa oh kakaranihkitailla reh. (1 Korint 8:1; Seims 4:8) Ma kitail ngoangkihte audaudki loalokong wet, oh doadoahngki nan atail mour, oh pil doadoahngki ong sewese aramas teikan, kitail pahn ni mehlel kahlemengih Krais. Met pahn sewese kitail en poadidiong ih.
Komw kin ‘Kekeirkihda Krais’?
8. Ia wehwehn ‘kekeirkihda Krais’?
8 Ong pil ehu irair en weweidki Krais, Pohl uhd doadoahngki ehu karasaras tohrohr—sang karasaras en tuhke pwoat, e uhd doadoahngki karasaras en ihmw. Ni ahnsou me kitail kin medemedewe duwen ihmw ehu me wia kokou, kitail kin medemedewe kaidehn ihte poahsoano ahpw pil ihmwo me koukouda oh sansal ong aramas koaros, oh doadoahk laud me wiawiher. Duwehte met, kitail pil anahne doadoahk laud, kauwada irair kan oh tiahk kan me duwehte Krais. Soangen doadoahk laud wet pahn sansalda, nin duwen Pohl ntingwohng Timoty: ‘Pwe aramas koaros en kak kilang omw kekeirda.’ (1 Timoty 4:15; Madiu 5:16) Ia ekei doadoahk en Kristian akan me kin sewese kitail en kehlailda?
9. (a) Pwehn kalemengih Krais ni atail doadoahk en kalohk, ia ekei mehn akadei konehng kan me kitail kak wiahda? (b) Iaduwen kitail ese me Siohwa ketin kupwurki kitail en perenki doadoahk en kalohk?
9 Sises kapwukoahkinkitail doadoahk en kalohk oh padahkiong aramas teikan duwen rongamwahu. (Madiu 24:14; 28:19, 20) E wia mehn kahlemeng unsek ehu, kadehdehong aramas teikan ni eimah oh pweida mwahu. Ni mehlel, kitail sohte pahn kak duwehte ih. Ahpw, wahnpoaron Piter wiahda mehn akadei wet ong kitail: “Ahpw kumwail lemmwiki Krais nan kapehdomwail kan, oh wiahki amwail Kaun. Onopada ahnsou koaros pwe kumwail en kak sapeng mehmen me peki rehmwail kumwail en kawehwehiong koapworopwor me mi rehmwail.” (1 Piter 3:15) Ma ke sohte lemeleme me ke sohte kak “sapeng mehmen me peki rehmwail kumwail en kawehwehiong koapworopwor me mi rehmwail,” dehr pwunod. Wiahda mehn akadei kan me pahn mwahu ong iuk, oh me pahn sewese iuk en kekeirada. Ma ke pahn kaunopada mwowe, met pahn ele sewese iuk en kawukihla ahmw padahk kan de kapataiong ehu iren Paipel de riau. Ke kak wiahda ahmw mehn akadei en katohtohla ahmw kihla pwuhk en sawaspen Paipel kan, de katohtohla ahmw return visit kan, de katohtohla aramas akan me ke kin onop Paipel rehrail. Dehr medemedewehte duwen ia uwen tohto ahmw awa en kalohk kan, de pwuhk kan me ke kin kihla, de aramas depe me ke kin onop Paipel rehrail, ahpw medemedewe duwen ma mie moure oh ia uwen mwahu soahng pwukat. Wiahda mehn akadei me pahn konehng pein emen emen kitail oh nantiong en kapwaiada mehn akadei pwukat pahn kak sewese kitail en perenki atail doadoahk en kalohk. Ihme Siohwa ketin kupwurki kitail en wia—kitail en pahpa ih oh “pereperen.”—Melkahka 100:2; pil tehk 2 Korint 9:7.
10. Ia ekei doadoahk en Kristian akan me kitail anahne kapwaiada, oh iaduwen met kin sewesekinkitailla?
10 Pil mie doadoahk kan de wiewia kan me kitail kin wia nan mwomwohdiso me kin kekeirkihda Krais. Keieu kesempwal iei en limpoakpene nanpwungatail, pwe met kin kasansalehda ihs me Kristian mehlel akan. (Sohn 13:34, 35) Ni ahnsou me kitail kin wia ononop, pali laud en kitail kin karanihla atail sounpadahk. Ahpw, kitail kak idawehn kaweid en Pohl en “langahda douluhl mohngiongimwail kan” oh pehsepene rehn mehteikan nan mwomwohdiso? (2 Korint 6:13) Elder kan pil anahne atail limpoak oh kalahngan. Ma kitail pahn miniminiong irail, raparapahki oh ale ahr kaweid en Paipel kan, kitail pahn kamarahrahla ahr doadoahk laud kan. (Ipru 13:17) Ni ahnsowohte, met pahn sewese kitail en kekeirkihda Krais.
11. Soangen madamadau pwung dahieu kitail anahne ahneki me pid papidais?
11 Papidais iei ahnsou kaperen ieu! Ahpw, kitail en dehr lemeleme me ahnsou koaros nan mouratail pahn kaperen. Pali laud en atail pahn kekeirkihda Krais kin pidada “nantihlahte mwowe nin duwen kosonned akan me kitail ideidawehnehr lao lel met”? (Pilipai 3:16) Met sohte kin wehwehki memourki soahngen mour me sohte kaperen. Kitail anahne kekeidlahte mwowe ni inen—wehwehki me kitail pahn kamwahuiala atail koasoandi ni pali ngehn oh kapwaiada nan ehu ehu rahn, sounpahr koaros. Tamataman: “me pahn dadaurete lel ni imwi, ih me pahn mourla.”—Madiu 24:13.
Ahmw “Pwoson en kin Kehlailla Mehlel”?
12. Ia wehwehn “atail pwoson en kehlailla mehlel”?
12 Kasiluhn lepin lokaia kan me kin kawehwehda duwen atail weweidki Krais, Pohl kangoangekinkitail me “atail pwoson en kin kehlailla mehlel.” Ehu kawehwehn Paipel mahsanih, “kamehlelpen pwoson,” pwe lepin lokaiahn Krihk me Pohl doadoahngki pil kak wehwehki “katengedi, uhdahn pahn pweida, oh sohte kak pwurehng kihsang pwung me poahsoanda pohn kosonned.” Ni ahnsou me kitail kin kekeirkihda loalokong, kitail pil kin kilang oh sukuhliki duwen kahrepe kan me atail pwoson Siohwa me poadidi, ni mehlel me kin poahsoanda pohn kosonned. Imwilahn met, kin kakehlailda kitail. E pahn apwal ong sampah en Sehdan en kaluwetala kitail. Met kin katamankin kitail duwen ahn Pohl kaweid en “doulahng mahs.” (Ipru 6:1) En wiahla emen me mah oh tengedi ni pali ngehn kin kadoadoahkpene.
13, 14. (a) Nan tepin senturi, Kristian akan nan Kolose kin lelong soahngen kahpwal dah kei? (b) Oh ele dahme wahnpoaron Pohl kin pwunodki?
13 Nan tepin senturi, Kristian akan nan Kolose kin lelong kahpwal akan oh met kin kasongosonge irail. Pohl panawih irail: “Eri, kumwail kanahieng pwe emen de pitihkinkumwaildi loalokong widing mwahl en aramas akan, me re kin alehdi sang ni padahk kodoudou en mehn kawa ko, oh sang rehn ngehn suwed akan me kin kakaun wasa nin sampah, a kaidehn sang rehn Krais.” (Kolose 2:8) Pohl sohte men kilang mehn Kolose kan me wiahlahr tohn “wehin Sapwellime Iehros kompoak” en peilahsang ahr irairen pai en ngehn. (Kolose 1:13) Kaweid sapwungki dah? Pohl koasoi duwen “loalokong en aramas,” oh lepin lokaia wet kin pwarada pak ehute nan Paipel. E kin koasoakoasoi duwen irail loalokong kan en mehn Krihk akan, duwehte Plato oh Socrates? Mendahki aramas pwukat kin wiahda kahpwal ehu ong Kristian mehlel akan nan rahn pwuko, lepin lokaia wet “loalokong en sampah” kin kadoadoahkong ni oaralap me ahneki wehwe laud. E kin kalapw wehwehki pwihn kan de sukuhl kan me aramas kin kamehlele soahng teio—iangahki sukuhl en pelien lamalam akan. Karasepe ieu, mehn Suhs akan nan tepin senturi duwehte Josephus oh Philo kahdaneki ahr pelien lamalam “loalokong en sampah”—ele aramas kan en perenki.
14 Ekei padahk kan me aramas kin kahdaneki “loalokong en sampah” me ele mwein Pohl kin pwunodki kin pid duwen pelien lamalam. Mwuri nan nah kisin likou ong mehn Kolose kan nan irelaudohte, e padahkiong irail akan me kin wia padahk wet, “Kumwail dehr doadoahngki men, kumwail dehr song men, de kumwail dehr sair men,” me kin pid kosonned akan en Kosonned en Moses me imwisekla pwehki sapwellimen Krais pwoula. (Rom 10:4) Iangahki padahk loalokong kan en mehn pakan kan, pil mie irair kahpwal akan me kin pwarada oh wia kahpwal ehu ong tohnmwomwohdiso kan. (Kolose 2:20-22) Pohl kin panawih kitail duwen loalokong en sampah me kin kisehn “padahk mengei kan en sampah wet.” Kaweid likamw pwukat kin kohsang rehn aramas akan.
15. Iaduwen kitail kak liksang en kamehlele madamadau kan me sohte kin poahsoanda pohn Paipel?
15 Utungada madamadau kan oh loalokong en aramas akan me sohte kin poahsoanda pohn Mahsen en Koht pahn kak wia kahpwal ehu ong Kristian men en kak tengedi. Rahnwet, kitail anahne kanahieng kahpwal pwukat. Wahnpoaron Sohn kangoangehkin kitail: “Kompoakepahi kesempwal ko! Kumwail dehr kamehlele irail koaros me kin koasoia me Ngehn Sarawio kin ketiket rehrail, ahpw kumwail song irail pwe kumwail en wehwehki ma ngehn me mihmi rehrailo iei Ngehno me ketido sang rehn Koht. (1 Sohn 4:1) Eri ma iengomw tohnsukuhl men kin kasonge iuk ki me dene kosonned en Paipel kan iei kosonned mering kei, de mehn mpomw men kin kasonge iuk en ahneki madamadau en noahrok mwohni, de iengomw tohndoadoahk men kin ekis ekis song en kaluwetala iuk en kawehla ahmw nsen mwakelekel me poahsoanda pohn Paipel, de iengomw tohnkaudok men kin kauwe mehteikan nan mwomwohdiso me poahsoanda pohn pein eh madamadaute, dehr mwadangete kamehlele. Tehk mwahu oh dehr rong lokaia kan me sohte poahsoanda pohn Mahsen en Koht. Ma kitail pahn wia met, kitail pahn tengedi oh kehlailla ni atail pahn weweidki Krais.
“Kumwail en Audaudki Kapingkalahngan”
16. Ia ire kapahieu en weweidki Krais, oh peidek dahieu kitail kak wia?
16 Ire kapahieu en weweidki Krais nin duwen me Pohl koasoi iei met: kitail en “audaudki [dihrla oh wudekihla] kapingkalahngan.” (Kolose 2:7) Lepin lokaia wet “dihrla oh wudekihla” kin katamankin kitail duwen pihl me pahn dihrla oh audehla ni kehlen pillapo. Met kin kasalehong kitail me atail kalahngan nin duwen Kristian akan pahn anahne wiawi ahnsou koaros, wiahla mehkot me kitail kin ahnla wia. Emen emen kitail ele kak wia peidek ong pein kitail, ‘Ngehi kin kasalehda ahi kalahngan?’
17. (a) Dahme kahrehda kitail koaros kak nda me kitail ahneki kahrepe mwahu tohto en kalahngan ong Siohwa, mendahki kitail mih pahn ahnsou kahpwal akan? (b) Ia ekei kisakis kan me kohsang rehn Siohwa me ke inenen kalahnganki?
17 Ni mehlel, kitail koaros kin ahneki kahrepe mwahu kei en audaudki kapingkalahngan ong Siohwa rahn koaros. Edetehn kitail kin lelong ahnsou apwal kei, mwein mie mehkot tikitik me kin kak ekis kamarahrahla kitail pwehn dehr pwunod. Karasepe ieu, ni ahnsou me koampoakpatail men pahn kadekong kitail. Koampoakpatail men pahn koledi kitail. Meir mwahu kin pwurehng kakehlailda emen. Mwenge iou kin kihsang duhpek. Koulen mehnpihr kan, kouruhr en seri men, lingan en nan wehwe, engitik kansenamwahu—kitail pahn kak ekspiriens nan rahn ehute mehkan koaros de pil tohtosang. E mengei ong kitail en manokehla kisakis pwukat. Kisakis pwukat soh wahrong atail kalahngan? Mehpwukat koaros kin kohsang rehn Siohwa me iei Utupen “soangen wiawi sapan koaros oh kisakis koaros.” (Seims 1:17) Oh e ketikihong kitail kisakis kan me inenen kaselel sang kisakis kan me ntingdi powe—karasepe ieu, atail mour. (Melkahka 36:9) E pil ketkihong kitail koapworopwor en mour soutuk. Pwehn ketkihongkitail kisakis wet, Siohwa ketin kadarodo sapwellime Ohl Iehros, “iei ngehi me kin kapakaparanih rahn koaros.”—Lepin Padahk 8:30; Sohn 3:16.
18. Iaduwen kitail kak kasalehda atail kalahngan ong Siohwa?
18 Ia uwen mehlel ahn sounmelkahka mahsen wet: “Maing Kaun [Siohwa], ia uwen mwahu en ei kin patohwan wia ei kapingkalahngan ong komwi.” (Melkahka 92:1) Met pil duwehte dahme Pohl kin katamankin Kristian akan nan Deselonika: “Kumwail kasapahlkalahngan ong Koht ni mehkoaros.” (1 Deselonika 5:18; Episos 5:20; Kolose 3:15) Emen emen kitail kak medemedewe en kalaudehla atail kapingkalahngan ong Koht. Atail kapakap kan sohte anahne ihte pid duwen pekipek kan ong Koht duwen atail anahn akan. E konehng en wia atail pekipek kan ong Koht ni ahnsou me konehng. Ahpw medewehla duwen kompoakpomw men me ihte e kin lokaiaiong uhk ni ahnsou e anahne mehkot sang iuk! Eri, dahme ke soh kapakap ong Siohwa en kapingkalahngan ong ih? Ia uwen laud soangen kapakap pwukat kin kaperenda Ih ni ahnsou me e kilangdong sampah sohkalahngan wet! Pil kariau en sawas, soangen kapakap pwukat ele mwein kak sewese kitail en medemedewe duwen mour ni ahl me mwahu, oh pil katamankin kitail duwen ia uwen pai kitail koaros.
19. Iaduwen ahn Pohl mahsen nan pwuhken Kolose 2:6, 7 kasansalehda me kitail koaros kak katengedi atail kin weweidki Krais?
19 E soh wia mehkot kapwuriamwei en kilang ia uwen tohto kaweid loalokong kan me kak kohsang ehute iren Paipel? Ahn Pohl kaweid en pousehla en weweidki Krais iei mehkot me kitail koaros men kapwaiada. Eri, kitail en wiahda atail pilipil mwahu en ‘poadidiong Krais,’ “en pil kekeirkihda ih,” “oh amwail pwoson en kin kehlailla mehlel,” oh ‘kumwail en audaudki kapingkalahngan.’ Kaweid wet kin wia kaweid kesempwal keieu ong irail akan me ahpwtehn papidaisla. Ahpw e pil kadoadoahkong kitail koaros. Medemedewe duwen iaduwen kalowe laud de kesempwal en tuhke pwoat kin kekeirada oh kohdi pah oh iaduwen ihmw me kokouda kin posokehdahla powe. Eri, met duwehte atail kin weweidki Krais me sohte pahn imwila. Kitail koaros anahne kekeirada ni pali ngehn. Siohwa pahn ketin sewese kitail oh kapaiada kitail, pwe e kupwurki kitail en weweidki ih oh sapwellime Ohl ni ahnsou kohkohlahte.
Iaduwen Komw Pahn Sapeng?
◻ Ia wehwehn en weweidki Krais?
◻ Ia wehwehn en ‘poadidiong Krais’?
◻ Iaduwen kitail kak ‘kekeirkihda Krais’?
◻ Dahme kahrehda e kesempwal “atail pwoson en kin kehlailla mehlel”?
◻ Ia kahrepe kan kitail ahneki en ‘audaudki kapingkalahngan’?
[Kilel nan pali 22]
Kalowehn tuhke pwoat sohte kin sansal, ahpw re kin kamwenge oh katengehdi tuhkeo