Keid Nan Lipwen Sises Krais
“Mehmen me koasoia me e kin ehuong Koht a en momourki mour me duwehte mour me Sises ketin ieiaski.”—1 SOHN 2:6.
1, 2. Dahme kin pidada en kilikilangwohngete Sises?
“WAHNPOARON Pohl ntingihdi, “Kitail kainenehiongete kapehditail kan ong Sises, me tepin atail pwoson oh me kaunsekala atail pwoson.” (Ipru 12:1, 2) Pwe kitail en kak keid nan ahl en lelepek, kitail anahne en kilangwohngete Sises Krais.
2 Lepin lokaiahn Krihk me kawehwehdi en “kilangwongete” me pwarada nan Mahsen en Krihk kan kin wehwehki emen en “kainenehiong ah lamalam oh sohte mehn kerempwa,” “en kilang sang mehkot pwehn kak kilang mehkot tohrohr,” oh “en kangkakilte.” Ehu pwuhk koasoia: “Ni ahnsowohte me emen soun weirentang en Krihk kin kasau ah lamalam sang nan wasahn tangatang oh uhd kilanglahng pokono, e kin wawaila. Kristian akan pil kin duwehte met.” Mehn kerempwa kan kin kedirepwala atail kekeirada ni pali ngehn. Kitail anahne kilangwohngete Sises Krais. Eri, dahme kitail anahne kilang rehn Kaun Lapalap menet? Lepin lokaiahn Krihk me kin kawehwehdi “kaun lapalap kin wehwehki emen me kin tiengki mehkoaros pwe en wia mehn kahlemeng.” Eri en kilangwohngete Sises kin wehwehki me kitail en kahlemengih ih.
3, 4. (a) Dahme kitail anahne en wia ni atail kin keid ni lipwen Sises? (b) Peidek dah kan kitail anahne pein idek rehtail?
3 Pwuhk Sarawi mahsanih, “Mehmen me koasoia me e kin ehuong Koht, a en momourki mour me duwehte mour me Sises ketin ieiaski.” (1 Sohn 2:6) Kitail kin ehuong Koht ni atail kin peikiong sapwellimen Sises kosonned akan nin duwen Sises kin wia ong Semeo.—Sohn 15:10.
4 Eri, en keid nan lipwen Sises kin wehwehki me kitail anahne kasawih mwahu ih nin duwen Kaun Lapalap emen oh kahlemengih ih. Peidek kesempwal me pwarada met iei: Iaduwen Krais kin kahluwa kitail? Iaduwen atail kin kahlemengih ah wiewia kan kin kamwekid kitail? Ia kamwahu kan me kin kohsang ni atail kin kahlemengih ih?
Iaduwen Krais kin Kahluwa Sapwellime Tohnpadahk kan
5. Mwohn Sises ketidahla nanleng, inou dahieu Sises wiahda ong irail me kin idawehn ih ko?
5 Mwohn ah ketidahla nanleng, Sises me iasadahro pwarohng sapwellime wahnpoaron ko oh kihong irail doadoahk kesempwal ehu. E mahsanih: “Kumwail eri kohwei wasa koaros oh padahkiong tohn wehi kan koaros; pwe re en wiahla nei tohnpadahk.” Ahnsowo, Kaun Lapalapo me iei Sises pil inoukihong irail me e pahn ieiang irail ni ahr kin kapwaiada arail pwukoa, mahsanih: “Eri, kumwail en ese pwe I pahn ieiang kumwail ahnsou koaros lel ni imwin kawa.” (Madiu 28:19, 20) Ia mwomwen Sises kin ieiang sapwellime tohnpadahk kan ni imwin koasoandi suwed wet?
6, 7. Iaduwen Sises kin doadoahngki ngehn sarawi en kahluwa kitail?
6 Sises mahsanih, “A sounsawaso, ngehn sarawi, me Semei pahn poaronehdo ni edei, iei ih me pahn kawehwehiong kumwail mehkan koaros, oh katakatamankin kumwail mehkoaros me I ndaiongkumwailehr.” (Sohn 14:26) Ngehn sarawi me kohkihdo ni mwaren Sises kin kahluwa oh kakehle kitail rahnwet. E kin kamarainih kitail ni pali ngehn oh sewese kitail en wehwehki “wasa rir kan en kupwuren Koht.” (1 Korint 2:10) Sapwellimen Koht irair akan iei “limpoak, peren, popohl, kanengamah, kadek, kamwahu, pwoson, opampap, oh liksang me suwed” oh irair pwukat iei “wahn ngehno.” (Kalesia 5:22, 23) Ngehn sarawi kak sewese kitail en kekeirada irair pwukat.
7 Ni atail kin sukuhliki Pwuhk Sarawi oh kin song en kapwaiada kaweid, sapwellimen Siohwa ngehn sarawi kin sewese kitail en kalaudehla atail erpit, kasawih pein kitail, wehwehki, loalokongkihla, teneki irair kan oh ese lamalam. (Lepin Padahk 2:1-11) Ngehn sarawi pil kin sewese kitail en kak powehdi kasongosong oh kalokolok kan. (1 Korint 10:13; 2 Korint 4:7; Pilipai 4:13) Kaweid kohieng Kristian akan en “kamwakeleikitailsang mehkoaros me kin kasaminehla paliwar oh pali ngehn, oh kitail song en sarawihla unsek, ni atail pahn kin momour nan atail lemmwiki kupwur en Koht.” (2 Korint 7:1) Kitail uhdahn kak kapwaiada sapwellimen Koht koasoandi en mwakelekel oh sarawihla reh ma kitail sohte sawas sang ngehn sarawi? Ehu ahl me Sises kin doadoahngki en kahluwa kitail rahnwet iei ngehn sarawi me Siohwa Koht ketikihong ih en doadoahngki.—Madiu 28:18.
8, 9. Iaduwen Krais kin doadoahngki “ladu lelepek oh loalokong” en kahluwa kitail?
8 Medewehla pil ehu ahl me Krais kin doadoahngki pwe en kahluwa mwomwohdiso rahnwet. Me pid duwen ahnsou me e pahn ketiket nan mwoale nanleng oh imwilahn koasoandi wet, Sises mahsanih: “Ihs sounpapah me kumwail lemeleme me uhdahn loalopwoatohng eh kaun oh loalokong? Eri, iei ih me eh kaun kasapwiladahngehr pohn papah teikan, pwe en kin nehkohng irail kanarail kisin mwenge ahnsou me konehng. Meid pai papah meno me eh kaun pahn kin diar eh wiewia met, ni eh kin pwarodo ni imwe! Kumwail en ese pwe kaun menet pahn kasapwilada papah menet pwe en kaunda eh dipwisou kan koaros.”—Madiu 24:45-47.
9 Sises me wia “Kauno.” “Ladu lelepek oh loalokong” iei irail me keidi kan me ketiket sampah. Sises kihong pwihn en ladu wet pwukoa en apwalih sapwellime mwomwohdiso oh kihong irail mwengehn ngehn akan ni ahnsou konehng. Pwihn en Governing Body wiawihkihda ekei irail elder kan me kisehn pwihn en ladu lelepek oh loalokong, oh irail me wia weliepen pwihn en ladu lelepek oh loalokong. Irail kin apwalih oh kaweid doadoahk en kalohk oh kihda mwengehn ngehn ni ahnsou me konehng. Krais kin kahluwa mwomwohdiso ni e doadoahngki ladu lelepek oh loalokong oh pil pwihn en Governing Body me keikihdi ngehn sarawi.
10. Iaduwen atail wiewia oh lamalam ong elder kan oh pwekihda?
10 Pil ehu ahl me Krais kin doadoahngki “kisakis kan me mih rehn ohl akan” me iei Kristian elder kan, de sounapwalih mwomwohdiso kan. Irail alehier “doadoahk en papah me Kristian kan uhdahn pahn wia, pwe en kakairada paliwar en Krais.” (Episos 4:8, 11, 12) Ipru 13:7 mahsanih met duwen irail: “Kumwail tamanda amwail sounpadahk en mahs ako, me kawehwehiong kumwail mahsen en Koht. Medemedewe duwen ar mour, duwen ar mehla, oh kahlemengih ar pwoson.” Elder kan me kin kaweid mwomwohdiso. Pwehki irail kin kahlemengih Sises Krais, e konehng kitail en alasang arail pwoson. (1 Korint 11:1) Kitail kak kasalehda atail kalahnganki koasoandi en elder kan sang ni atail pahn kin peikiong irail oh uhpa “kisakis kan me mih rehn ohl akan.”—Ipru 13:17.
11. Dahme Krais kin doadoahngki en kahluwa sapwellime kan rahnwet oh dahme pil kin pidada en kekeid nan lipwe kan?
11 Ehi, Sises kin kahluwa sapwellime kan rahnwet ki ngehn sarawi, pwihn en “ladu lelepek oh loalokong,” oh elder kan nan mwomwohdiso. Ni atail kin kahlemengih Krais, met kin pid wehwehkihla mwomwen ah kin kaunda oh peikiong. Met pil wehwehki me kitail anahne kahlemengih mwomwen a kin kekeid. Wahnpoaron Piter ntingihdi, “Pwe ong ni met me Koht ketin malipehkinkumwaildo; pwe duwen pein Krais eh lokolongkin kumwail oh ketikihong kumwail karasepe mwahu, ih pil duwen amwail pahn idawehn oh kahlemengih.” (1 Piter 2:21) Ni ahl dahieu atail kahlemengih mehn kahlemeng unsek en Sises pahn kamwekid kitail?
Doadoahngki Atail Manaman Ni Elen Loalokong
12. Mehn kahlemeng en Krais dah me elder kan nan mwomwohdiso anahne tehk?
12 Mendahki Sises sapwellimaniki manaman me kohsang rehn Seme, oh e kin doadoahngki ni ahl me uhdahn pwung de konehng. Aramas koaros nan mwomwohdiso—keieu irail sounapwalih kan—anahne en kasalehda “kadek ohng aramas koaros.” (Pilipai 4:5; 1 Timoty 3:2, 3) Pwehki mie en elder kan arail manaman nan mwomwohdiso, irail anahne en kahlemengih mehn kahlemeng mwahu en Krais ni arail kin doadoahngki manaman wet.
13, 14. Ni ahl dahieu elder kan kak kahlemengih Krais ni arail kin kangoange meteikan en papah Koht?
13 Sises kin tamataman duwen soh itar en sapwellime ko. E sohte kin idingkihong irail en wia mehkan me re sohte kakong. (Sohn 16:12) Sises sohte kin iding sapwellime kan en wia mehkot, ahpw e kin kangoange irail en ‘nantihong’ kapwaiada kupwuren Koht. (Luk 13:24) E kin wia met ni a kin tiengla oh sair mohngiongarail kan. Duwehte met, elder Kristian kan rahnwet sohte anahne en kamasak meteikan en papah ni namenek oh mworus. Ahpw, elder kan kin kangoange irail en papah Siohwa sang ni arail limpoak ong Ih, Sises oh pil aramas teikan.—Madiu 22:37-39.
14 Sises sohte kin doadoahngki manaman me kohieng ih ni ahl sapwung oh kin song en kaunda arail mour. E pil sohte kin wiahda soangen mehn akadei me nohn daulihala de kosonned nohn tohto. Ahpw, e kin song en kangoange irail sang ni a kin sair mohngiongarail kan ni a kin doadoahngki kaweid kan me kin kohsang kosonned en Moses kan. (Madiu 5:27, 28) Elder kan kin kahlemengih Sises oh liksang wiahda oh idingkihong meteikan pein arail madamadau kan. Me pid likou, kapwat de mehn kamweit kan, elder kan anahne en song en lel mohngiong en meteikan sang ni arail kin doadoahngki kaweid en Koht kan me duwehte kaweid me pwarada nan Maika 6:8; 1 Korint 10:31-33; oh 1 Timoty 2:9, 10.
Kasalehda Limpoak oh Mahk ong Meteikan
15. Iaduwen Sises kin mwekidki sapwung en sapwellime tohnpadahk kan?
15 Krais kin wia mehn kahlemeng mwahu ehu ni mwomwen ah kin apwalihala sapwellime tohnpadahk kan arail sapwung kan. Medewehla soahng riau me wiawi ni kaimwiseklahn pwong me e pahn mour nan sampah wet nin duwen aramas emen. Ni e lella nan Ketsemeni, Sises “eri ketin kahrehda Piter, Seims oh Sohn” oh padahkiong irail en “pepehd.” E ahpw “ketila ekis dohlahsang irail, poaridiong nanpwel, oh loulou.” Ni a pwurodo e “diarada ar memeir.” Ahpw, dahme Sises wia? E mahsanih: “Pwe ngehn me peik, a paliwar me luwet.” (Mark 14:32-38) Sises sohte uhdahte lipwoare irail, ahpw e kasalehda limpoak! Ni pwongohte, Piter kahmahmki Sises pak siluh. (Mark 14:66-72) Ia mwomwen Sises ong Piter mwurin mwo? “Kauno ketin iasadahr! Pwe e ketin pwarehr rehn Saimon!” (Luk 24:34) Pwuhk Sarawi mahsanih, “duwen eh ketin pwarohng Piter, a mwuhr ong wahnpoaron ehk riemeno koaros.” (1 Korint 15:5) E sohte kin imwintihti ong Piter, ahpw e kin mahk ong wahnpoaron koluhla menet oh kin kakehle ih. Mwuhr, e kihong Piter pwukoa laud kei.—Wiewia 2:14; 8:14-17; 10:44, 45.
16. Iaduwen atail pahn kahlemengih Sises ni riatail kan ni pali ngehn pahn wia sapwung ong kitail?
16 Ni en riatail ni pali ngehn kan kin ekei pak wiahda sapwung ong kitail pwehki arail soh unsek, e soh konehng kitail en kasalehda limpoak oh mahk ong irail nin duwen me Sises kin wia? Piter kihong ienge kan ni pali ngehn kaweid wet: “Eri, kumwail en kin soangen lamalamteieu oh kupwurteieu; kumwail limpoakpene nin duwen Kristian mehlel kan, oh kadekpene oh aktikitikpene. Kumwail dehr dupungki me suwed ong me suwed, de lokaia suwed ong lokaia suwed; ahpw dupungkihong me suwed amwail kupwuramwahu, pwe iei kupwuramwahu me Koht ketin inoukihong kumwail ni eh ketin malipei kumwail.” (1 Piter 3:8, 9) Iaduwen ma emen riatail sohte kin men kahlemengih Sises oh kasalehda limpoak oh mahk ong kitail atail sapwung kan? Mendahki met, kitail anahne en song en kahlemengih Sises oh mwekid nin duwen me Sises pahn wia.—1 Sohn 3:16.
Rapahki Mahs Wehio
17. Dahme kin kasalehda me Sises kin mwohnki wia kupwuren Koht?
17 Mie pil ehu ahl me kitail anahne kahlemengih Sises. Sises kin mwohnki sapwellime doadoahk en kalohki Rongamwahu en Wehin Koht. Mwurin a kalohk ong lihen Sameria limwahn Saikar, Sises mahsanih ong sapwellime tohnpadahk kan: “Ei kapwaiada kupwur en ih me ketin poaroneiehdo, oh wiahda sapwellime doadoahk, iei me ei tungoal.” (Sohn 4:34) En kapwaiada kupwuren Semeo iei me kin komour Sises; e kin apwalih, kansenamwahu oh kakehle ih duwehte mwenge. Eri, en kahlemengih Sises oh kilangwohngete en wia kupwuren Koht soh pahn kihong kitail mour nsenamwahu oh katepe laud?
18. Soangen kapai dah kan me kin kohsang atail kin kangoange seri kan en wia pioneer kan?
18 Ni en pahpa oh nohno kan kin kangoange neirail seri kan en wia doadoahk en pioneer irail pil kin iang neirail seri kan ale kapai. Emen pahpa me naineki pwutak mpwer ehu kin kihong nah seri ko en akadeiong wia pioneer sangete ara tikitik. Ni ara kanekehla High School, ira wiahla pioneer kei. Pahpa menet kin medewehla duwen kapai kan me e kin alehdi sang met oh e ntingihdi: “Neit pwutak kan sohte kin kansensuwedih kiht. Se kak nda ni kalahngan me ‘seri kan kin wia kisakis ehu sang rehn Siohwa; uhdahn kapai ehu sang reh.’” (Melkahka 127:3) Iaduwen seri kan kin paiekihda doadoahk en pioneer? Emen nohno me naineki seri limmen nda: “Doadoahk en pioneer kin sewese nei seri kan koaros en kak karanih Siohwa, kamwahuwihala pein arail onop Paipel, sewese irail en kak doadoahk mwahu arail ahnsou, oh kin sewese irail en mwohnki mehkan en ngehn nan arail mour. Mendahki irail koaros anahne en wia soangen wekidekla kan, sohte emen irail koluhkihla ahl me irail piladahro.”
19. Soangen mehn akadei dah kan me pwulopwul kan en medemedewe?
19 Pwulopwul kan, ia amwail mehn akadei ong ahnsou kohkohdo? Kumwail kin nantihong pwehn ale doadoahk pweilaud kan? De kumwail kin song wia sounkalohk kaukaule kei? Pohl ketikihda kaweid wet: “Eri, kumwail kanahieng duwen amwail mour me kumwail weweidki. Kumwail dehr duwehte aramas me loalopwon kan, ahpw kumwail duwehte me loalokong kan. Kumwail isaneki ahnsou mwahu koaros, pwe ahnsou pwukat ahnsou suwed kei.” E kapataiong mahsanih: “Kumwail dehr pweipwei, a kumwail song rapahki dahme Kauno ketin kupwukupwure kumwail en kin wia.”—Episos 5:15-17.
Kitail en Lelepek
20, 21. Iaduwen Sises kasalehda lelepek oh iaduwen kitail kak kahlemengih ih?
20 Ma kitail pahn idawehn Sises, kitail anahne kahlemengih lelepek me e kasalehda. Me pid lelepek Sises kin kasalehda, Pwuhk Sarawi mahsanih: “E sapwellimaniki roson en Koht ahnsou koaros, ahpw sohte ketin kupwukupwure en kapahrekiong Koht pein ih. Eri, pwehki sang ni sapwellime kupwur saledek e ketin tounmeteikihla mehkoaros, oh ketin wiahla ladu men. E ketin wia-aramasala oh ketidohng sampah ni mwomwen aramas. E ketin mpahi, oh e ketin weid nan elen peik lao lel mehla—eh pwoula pohn tuhkehn lokoloko.” Sises ni lelepek kalinganahla sapwellimen Siohwa kaunda sang ni eh kin kapwaiada kupwure kan. E kin peikiong lao e pil kamatala pohn tuhkehn lokoloko. Kitail anahne en “ahnekihla soangen lamalamohte” oh ni lelepek kapwaiada kupwuren Koht.—Pilipai 2:6-8.
21 Sises pil kin kasalehda lelepek ong sapwellime wahnpoaron lelepek ko. Mendahki arail luwet oh soh unsek, Sises kin ketin loalloale “irail lel ni imwi.” (Sohn 13:1) Duwehte met, kitail en dehr mweidong soh unsek en riatail kan en kahrehong kitail en kauwe irail oh ahneki madamadau sapwung kan ong irail.
Kahlemengih Mehn Kahlemeng Mwahu en Sises
22, 23. Kapai dah kei kin kohsang atail kahlemengih mehn kahlemeng mwahu en Sises?
22 Mehlel, nin duwen aramas soh unsek kei, kitail sohte kak kahlemengih Sises ni unsek. Ahpw, kitail kak song en nantihong kahlemengih ih keneinei. Ni atail pahn wia met, kitail anahne en wehwehkihla iaduwen ah kin kaunda oh song en kahlemengih mehn kahlemeng mwahu me e wiahdahr.
23 Ni atail kin kahlemengih Krais, met kin wahdo kapai tohto. Atail mour kin mie katepe laud oh nsenamwahu pwehki kitail kin mwohnki wia kupwuren Koht a kaidehn pein atail ineng kan. (Sohn 5:30; 6:38) Kitail kin ahneki nsen mwakelekel. Atail mour pil wia mehn kahlemeng mwahu ong meteikan. Sises luhke koaros me toutoulahr oh pwangadahr en kohla reh oh e pahn sewese irail. (Madiu 11:28-30) Ni atail kin kahlemengih mehn kahlemeng mwahu en Sises, kitail pil kak sewese oh kamweitala meteikan sang ni atail kin werekiong irail. Kitail en kin kekeidweite nan lipwen Sises.
Ke Tamanda?
• Iaduwen Krais kin kahluwa sapwellime kan rahnwet?
• Iaduwen elder kan kak kahlemengih sapwellimen Krais kaunda oh doadoahngki arail manaman ni ahl me pwung?
• Iaduwen kitail kak kahlemengih sapwellimen Sises mehn kahlemeng mwahu ni ahnsou me meteikan kin wiahda sapwung ong kitail?
• Iaduwen me pwulopwul kan kak mwohnki mahs Wehin Koht nan arail mour?
[Kawehweh pen kilel kan nan ehu ehu pali 15]
Elder Kristian kan kin sewese kitail en uhpahiong sapwellimen Krais kaunda
[Kawehweh pen kilel kan nan ehu ehu pali 16]
Kumwail me pwulopwul kan, ia amwail mehn akadei kan me pahn sewese kumwail en kak iang paiekihda mour en Kristian?