Kitail Kin Kalohki Rohng me Mwahu
1 Kitail kin ahneki pwais kasehlel ni atail kin wia sounwah “rongamwahu en rohng me mwahu!” (Rom 10:15, New World Translation) Kitail kin kalohki rohng me kin kansenamwahu ong aramas akan me soahng kansensuwed kin kapilpene irail. Ahpw, iaduwen kitail kak sewese irail en wehwehki me kitail kin wa ong irail “rongamwahu en mehkot me mwahu sang dahme mie”?—Aiseia 52:7, NW.
2 Kaunopada Padahk me Kitail Pahn Koasoia Dahme Mwahu: Atail koasoiong aramas nan kalohk pahn pweida ma kitail pahn koasoia dahme mwahu. Ihme kahrehda, ni atail kin kaunopada atail padahk oh kousapahlih pwuhk de brochure de makasihn me kitail pahn kihong tohnihmwo, kitail anahne koasoia dahme mwahu. Ni atail pahn ngoangki koasoia duwen atail koapworopwor me poahsoanda pohn Pwuhk Sarawi, kitail pahn kak pweida mwahu nan kalohk.—Lepin Padahk 25:11.
3 Mendahki kitail kin rong duwen ahn aramas arail kahpwal kan oh kin nsensuwedkihla met, kitail anahne kasalehong irail me dahme pahn kamwahuiala kahpwal koaros me tohnsampah kin lelohng iei Wehin Koht. Ahnsou me kitail pil kin koasoia duwen sapwellimen Siohwa “rahnen kadeik,” kitail anahne kasalehda me rahno pahn wia “rongamwahu ong irail me aktikitik kan.” (Aiseia 61:1, 2) Kitail kak kamehleleiong irail me kin rong kitail me soahng koaros me Siohwa pahn ketin wia pahn imwikihla peren laud oh wahdo dahme keieu mwahu ong kitail.
4 Kasalehda Peren Mehlel Ni Ahmw Pahn Ehukihong Meteikan Padahk Mehlel: Ni ahnsou me aramas pahn kilang me kitail kin mas peren oh kamehlele dahme kitail kin koasoia, re pahn men rong kitail. Ma aramas teikan kin tehk me kitail kin medemedewe soahng mwahu kan, re kak kilang me “atail koapworopwor kin kaperenkitailla.” (Rom 12:12) Ihme kahrehda, re kakete men mwekidki Rongamwahu. Ni mehlel, mie kahrepe mwahu me kitail anahne kasalehda lamalam peren oh pwung nan atail kalohk.
5 Nin duwen sounkalohk kan en Rongamwahu, kitail kin wia laudsang ihte kasalehong aramas rohng. Atail kalohk kin kak sewese meteikan en ahneki koapworopwor en mour mehlel met oh ni ahnsou kohkohdo. (1 Timoty 4:8) Ni atail kin tuhwong aramas akan, atail madamadau mwahu pahn sansalda sang dahme kitail kin nda oh met pahn sewese aramas en perenki rong duwen Rongamwahu. Ni atail pahn kanahieng dahme kitail kin nda oh iaduwen kitail pahn koasoiaiong aramas, kitail en sewese irail me mohngiong mehlel kan en rong oh mwekidki rohng mwahu me kitail kalohki!