Kahlemengih Atail “Koht en Peren,” Siohwa
1 Siohwa kin kupwurki mehlel aramas en peren. Sapwellime Mahsen kin kahrehiong kitail en kasikasik kapai kan me e pahn ketikihong sapwellime aramas akan nan ahnsou kohkohdo. (Aiseia 65:21-25) Kitail anahne kasalehiong meteikan me kitail kin perenki ehukihong irail “Rongamwahu lingan me kohsang Koht en peren.” (1 Timoty 1:11) Mwomwen atail kin koasoia duwen Wehin Koht en kin kasalehda atail limpoak ong padahk mehlel oh atail nsenohki mehlel aramas akan me kitail kin koasoiong.—Rom 1:14-16.
2 Mehlel me ekei pak e kin apwal kitail en kin ahnsou koaros kasalehda peren. Nan ekei wasahn kalohk kan, aramas malaulau me kin rong. Ekei ahnsou, pein kitail kin lelohng nan irair apwal kan nan atail mour. Pwe kitail en kolokol atail peren, kitail anahne medemedewe uwen kesempwal aramas akan nan atail wasahn kalohk en rong Rongamwahu en Wehin Koht me kitail kin kalohki. (Rom 10:13, 14, 17) Atail doudouloale met pahn sewese kitail en kak doudoulahte kalohki ni peren duwen sapwellimen Siohwa koasoandi en komour.
3 Koasoia Duwen Soahng Mwahu kan me Pahn Wiawi: Kitail anahne tehk kanahieng dahme kitail kin koasoia. Mendahte ma kitail pahn tepikihda atail padahk kan ni atail pahn koasoiahda duwen kahpwal ehu de rohng suwed ehu me aramas akan rong nan nuhs oh kin medemedewe, kitail en dehr ihte koasoakoasoia duwen rohng kapwunod akan. Kehkehlik me kohwong kitail iei en wa “rongamwahu en mehkot me mwahu sang.” (Aiseia 52:7; Rom 10:15) Rohng mwahu wet iei ire kan me pid duwen sapwellimen Koht inou me pid duwen soangen mour mwahu me kitail pahn kak ahneki ahnsou kohkohdo. (2 Piter 3:13) Pwehki met, kitail en kin doadoahngki iren Paipel kan pwehn “kansenamwahwihala me nan kapehd toutoulahr akan.” (Aiseia 61:1, 2) Met pahn sewese emenemen kitail en kak kolokol peren oh irair mwahu kan nan atail mour.
4 Aramas akan uhdahn pahn kak kilang duwen atail kin peren ni atail wia atail doadoahk en kalohk. Kahrehda, kitail en kin kasalehda duwen irair en atail “Koht en peren,” Siohwa, ni atail kin ehukihong aramas akan nan atail wasahn kalohk duwen Rongamwahu en Wehin Koht.