Ke Kin Ahneki Ngehn en Tohnmetei?
1 Atail kalahnganki dahme Sises Krais wia ong aramas akan ni soh roporop pahn kamwekid kitail koaros en doadoahngki atail koahiek koaros oh atail kehl koaros ni ahl en tohnmetei. Pwuhk Sarawi mahsanih: “Kumwail mweidala paliwaramwail kan pwe en wiahla mehn meirong momour, me sarawi oh kaperen pahn kupwuren Koht.” (Rom 12:1) Ma ke pahn ekei pak kasawihada pein kowe, e pahn sewese iuk en kilang ma ke kin kasalehda ngehnen tohnmetei ni uwen me ke kakong nin duwen pein ahmw irair akan.
2 Tohnmetei Pwehn Sukuhliki Dahme Mihmi Nan Paipel: Ke kin koasoanehdi ahnsou ong kaukaule pein wadek Pwuhk Sarawi oh onop? Ke kin kolokolte ahmw koasoandi? Ke kin kaukaule kaunopada mwahu ong mihding kan en mwomwohdiso? Ma komwi emen tapwin peneinei, ke kin kaukaule onop Paipel rehn ahmw peneinei? Ma ke pahn wia mehpwukat, mwein ke anahne tohnmeteikihla ahmw ahnsoun kilang TV de doadoahngki computer de soahng teikan. Ahpw, mendahki mie soahng kan me ke pahn tohnmeteiki, ke kak tamataman me ahnsou me ke kin wia soahng ngehnin kan kakete kahluwaiukalahng mour soutuk!—Sohn 17:3.
3 Tohnmetei Pwehn Kaiahne Noumw Seri kan: Ahnsou me keieu mwahu en padahkiong noumw seri kan duwen ngehnen tohnmetei iei ahnsou me noumw seri kin tikitik. Ke anahne padahkiong noumw seri kan me mie ahnsou en mwadong, ahpw, pil mie ahnsou en doadoahk oh pil ong soahng ngehnin kan. (Episos 6:4) Kihong irail doadoahk me re anahne wia nan ihmw oh likin ihmw. Koasoanehdi koasoandi ieu pwehn iang noumw seri kan nan kalohk. Ken pil wia mehn kahlemeng mwahu pwe e pahn sewese irail en rong ahmw kaweid ong irail.
4 Tohnmetei nan Mwomwohdiso: Ma tohnmwomwohdiso kin tohnmetei pwehn wahdo kamwahu ong tohnmwomwohdiso koaras, arail mwomwohdiso kak pweida mwahu oh koaros pahn kak nsenamwahu. (Ipru 13:16) Ke kak kalaudehla ahmw ahnsou en kalohki Wehio oh katohnpadahk? Ke kak sewese me soumwahu oh me mah kan, duwehte tohnmeteiki ahmw ahnsou oh waromw sidohsa pwehn sewese irail ong mehn peidaid ong mihding kan?
5 Mwohn Sises tohnmeteiki moure, e kaweidki sapwellime tohnpadahk kan en rapahki mahs Wehio, oh soahng teikan en keriau nan arail mour. (Madiu 6:33) Ma kitail ahneki ngehnen tohnmetei, kitail pahn ahneki peren mehlel ni atail pahn papah Siohwa ni peren.