Ke Kin Mwekidki Sapwellimen Krais Limpoak?
1 Ni en wahnpoaron Sohn kin medewehla eh Soumas eh mour, e ntingihdi: “Sises kin ketin loalloale sapwellime kan me mihmi nin sampah, oh e ketin loalloale irail lel ni imwi.” (Sohn 13:1) Ni mehlel, nan sounpwong en April, kitail kalapw tamataman duwen iaduwen Sises keieu kasalehda sapwellime limpoak ong aramas. Kitail kak mwekidki limpoak wet ni atail pahn pwoson sapwellime tomw, oh pil ni atail pahn ngoangki kalohk, oh pil, ni atail pahn, duwehte Sises, dadaur lao lel “ni imwio.”—Madiu 24:13; 28:19, 20; Sohn 3:16.
2 Mwekidki Sapwellimen Krais Limpoak: Sises inenen doadoahk laud nan wihk me kaimwisekla sapwellime mour nan sampah. (Madiu 21:23; 23:1; 24:3) Ma kitail men kahlemengih Krais, kitail pil pahn mwekidki limpoak me Sises kasalehda ni atail men ‘nantihong’ nan doadoahk en papah Siohwa. (Luk 13:24) Ke kak kalaudehla ahmw awahn kalohk nan sounpwong en April?
3 Katamanpen Kamatalahn Krais pahn wiawi Ni Esil, April 19 nan pahr wet. Aramas depe pahn iang kasarawi wiewia kesempwal wet? Ni mehlel, pasepengpen peidek wet pahn poahsoanda pohn dahme kitail wia. Ke ntingihdier eden irail me ke pahn luhke—aramas me ke kin onop Paipel rehrail oh pil irail me kin perenki rong, oh ahmw peneinei, irail me ke ese sang ahmw wasahn doadoahk, oh pil iengomw tohnsukuhl kan? Ke tuhwongehr irail oh luhkehr irail? Ke pahn pwurehng tuhwong irail rahn kei mwohn Katamano pwehn katamankin irail? Re anahne mehn peidaid? Elder kan pahn pil luhke irail me kin kalohk mahs, ahpw ni ahnsou wet, re sohla kalohk. Mendahki ma Kataman pahn wiawi erein wihk (Ni Esil) kaidehn ni imwin wihk sohte wehwehki me e sohte kesempwal en iang towehda.
4 Kaunopada Mwahu: E inenen kesempwal me kitail pahn kaunopada mwahu oh ahneki madamadau me pwung oh konehng ni atail pahn iang towehda Katamano. Pohl kaweidki rie Kristian kan en tamataman kesempwalpen rahno. (1 Kor. 11:20-26) Kumwail kak wadek Sohn irelaud 13 lel 17 nan amwail onop en peneinei oh mwurin mwo, emen emen tohnpeneinei kak koasoia ia uwen kesempwal sapwellimen Sises meirong en tomw kin wia ong pein ih. Oh pil, menlau dehr manokehla en wia ahmw wadawad en Paipel rahn koaros erein wihk me Katamano pahn wiawi!
5 Atail limpoak ong Krais me inenen loal, oh e pahn pil mihmihte mwurin April 19. Kitail en kasalehda atail limpoak ong Sises erein ahnsou kohkohlahte! Kataman me pahn wiawi pahr wet pahn sewese kitail en kakehlail atail kasalehda limpoak ong Ih.