Ke Kin Kaukaule Iang Kalohk?
1 Kitail koaros uhdahn kin peren ahnsou me kitail kin rong me kekeirada laud wiawi nan United States oh sounkalohk tohtohkihla meh 1,040,283 nan August 1998. Met kasalehda me koaros nantihong miniminpene oh doadoahkpene! Ahpw, sounpwong kei mwuri, likamwete ekei sounkalohk pwukat kin apwalki kaukaule iang kalohk, pwehki average en sounpwong mwuri ko iei sounkalohk 940,000 samwa. Met kasalehda me sounkalohk emen sang ehk riemen sohte kin iang kalohk ehu ehu sounpwong. Se koapworopworki me kangoang me pahn kohda met pahn sewese irail me sohte kin iang kalohk sounpwong koaros.
2 Kalahnganki Pwais Kaselel: Kitail anahne kalahnganki laud pwais me kitail ahneki en kalohkihong aramas akan Rongamwahu en Wehin Koht. Doadoahk wet kin kaperenda Siohwa oh kin sewese aramas me ahneki mohngiong mehlel en sukuhliki dahme re anahne wia ma re men ahneki mour soutuk. (Lepin Padahk 27:11; 1 Tim. 4:16) Ma kitail kin kaukaule iang kalohk, e pahn sewese kitail en koahiekla nan doadoahk en kalohk oh kitail pil pahn ahneki peren mehlel oh nsenamwahu me kin kohsang doadoahk me kin pweida mwahu.
3 Ripohtki Dahme Kitail Wia Nan Kalohk: Ekei sounkalohk kan me kin iang kalohk sohte kin ripohtki dahme re kin wia nan kalohk ni imwin sounpwong. Kitail en dehr lemehda me sohte katepe awahn atail kalohk. (Tehk Mark 12:41-44.) E kesempwal kitail en riportki dahme kitail kin wia nan kalohk! Ke kak wiahda koasoandi ieu, karasepe ieu: ke kak langahda kalendar ehu nan imwomw pwehn wia mehn kataman ong uhk en ntingihdi ahmw awa kan nan kalohk oh met pahn sewese iuk en ripohtki ahmw awa ni imwin sounpwong koaros.
4 Sewese Irail Me Anahne Sawas: Koasoandi kan anahne en wiawihda pwehn sewese irail me anahne sawas en kaukaule iang kalohk. Secretary en mwomwohdiso oh brother kan me kin wia Pwuhk Study en Mwomwohdiso kak koasoanehdi pwe sounkalohk koahiek kan kak sewese irail me anahne sawas. Ma ke naineki seri kan de aramas me ke kin onop Paipel rehrail kin wia sounkalohk me saikinte papidais, kaiahne irail en riportki arail awa kan ni imwin sounpwong koaros.
5 Mwein ke tamanda duwen poadoapoad en sister men nan Watchtower en October 1, 1997 me oaralap koasoia, “Grateful for a Long Life in Jehovah’s Service.” Sister Ottilie Mydland sang Norway tepida wiahla sounkalohki Rongamwahu mwohnte eh papidais nan 1921. Rahnwet, sounpahr isihsek weneu mwuhr ni e mahki sounpahr 99, e koasoia: “I kin inenen peren pwe I kakete kaukaule iang kalohk.” E wia mehn kahlemeng mwahu ong sapwellimen Siohwa ladu kan en kahlemengih!