Wia Emen me kin Rong Kanahieng
1 Kitail anahne kaiahne pein kitail ma kitail men rong kanaiehng. Oh pil, kitail anahne ahneki ineng en sukuhliki mehkot oh doadoahngki dahme kitail sukuhliki oh paiekihda dahme kitail sukuhliki. Ihme kahrehda, Sises kasalehda me e kesempwal en “kanahieng iaduwen amwail kin rong.”—Luk 8:18.
2 Kitail anahne kapwaiada met ahnsou me kitail kin iang towehda mihding kan en mwomwohdiso oh pil kapokon kan. Soangen ahnsou pwukat kitail anahne rong kanahieng. (Ipru 2:1) Iet ekei mehn sawas kan me pahn sewese iuk en rong kanahieng nan mihding kan oh kapokon akan.
◼ Kitail anahne kalahnganki kahrepen mihding kan kin wiawi. Mihding pwukat kin wia ehu ahl me “ladu lelepek oh loalokong” kin sewese kitail en ale “padahk kan me kohsang Siohwa.”—Aiseia 54:13; Luk 12:42, New World Translation.
◼ Kaunopada mwowe. Kousapahlih pwuhk kan me kitail pahn doadoahngki ansoun mihding, oh tamataman en wahda noumw Pwuhk Sarawi oh sawaspen Paipel kan me kitail pahn doadoahngki ansoun mihding.
◼ Ahnsoun mihding, wia uwen me ke kak en rong kanahieng. Ieremen koasoiong irail me mwohndi limwahmw oh pil ieremen kilikilang meteikan nan Kingdom Hall. Nantihong en kaiahne ahmw madamadau pwehn dehr medemedewe dahme ke pahn wia mwurin mihding oh duwen soahng kan me sohte pid mihding.
◼ Medemedewe duwen dahme sounkapahreko koasoia. Idek pein rehmw peidek pwukat: ‘Iaduwen I kak doadoahngki dahme I sukuhliki? Ahnsou dah kan I kak doadoahngki dahme I sukuhliki?’
◼ Ntingihdi ire kesempwal kan oh iren Paipel kan. Ma ke pahn wia met, e pahn sewese iuk en medemedewe dahme sounkapahreko koasoia oh e pahn sewese iuk en tamataman ire kesempwal kan ahnsou me ke men doadoahngki ire pwukat nan ahmw mour mwuhr.
3 Padahkiong Noumw Seri kan Iaduwen Re Kak Rong Kanahieng: Seri kan anahne kaweid en pali ngehn. (Deud. 31:12) Mahso, “seri ko me esehier lamalam oh kakehr dehdehki mehkot” nanpwungen sapwellimen Koht aramas akan anahne en rong kanahieng ahnsou me emen pahn wadek ong irail Kosonnedo. (Neh. 8:1-3) Ma pahpa oh nohno kan kin rong kanahieng ansoun mihding kan, pali laud en ahnsou neirail seri kan pahn pil rong kanahieng. E sohte mwahu en wahdo mehn mwadong kan de pwuhk kan me seri kan kak color loale (coloring books) ni mihding kan pwe seri kan pahn mwadongki soahng pwukat ahnsou me mihding pahn wiawi. Oh pil, ma seri kan pahn kalap kohla imwen kainen ni soh kahrepe, met pahn pil kauwehla arail rong kanahieng. Pwehki kitail koaros wehwehki me “seri kan kin wia mehkot sapwung ni ar sohte wehwehki oh seukautih,” pahpa oh nohno kan anahne nantihong sewese neirail seri kan en mwohndi oh nennenla ahnsou me mihding kin wiawi oh ren sewese irail en rong kanahieng dahme sounkapahreko koasoia.—Lepin Padahk 22:15.
4 Ma kitail kin wia aramas me kin rong kanahieng, kitail kak kasalehda me kitail inenen loalokong mehlel oh kitail men “kalaudehla” atail loalokongkihla Siohwa Koht oh soahng ngehnin kan.—Lepin Padahk 1:5.