“Rehn Koht Mehkoaros Kak Pweida”
1 Doadoahk me keieu kesempwal ong Kristian kan iei en kalohkiseli Rongamwahu en Wehin Koht wasa koaros nan sampah. (Madiu 24:14) Met inenen doadoahk laud. Aramas tohto me kin kilang kitail oh nda me soahng kan me kitail anahne pwehn wiahda doadoahk wet kin inenen apwal en ahneki. Pil ekei kin nda me en kapwaiada oh wia doadoahk wet kin apwal douluhl pwehki sounkalohk kan kin lelohng kapailok oh uhwong sang aramas akan. (Madiu 24:9; 2 Tim. 3:12) Irail me kin kauwe sounkalohk kan kin nda me doadoahk wet sohte kak pweida mwahu. Ahpw, Sises mahsanih: “Rehn Koht mehkoaros kak pweida.”—Madiu 19:26.
2 Mehn Kahlemeng Mwahu kan me Kitail kak Kahlemengih: Sises tepida sapwellime doadoahk en kalohk nin duwen emen me kin mihmi nan koasoandi en aramas me koaros kin uhwong ih. Pwehn irehdi ih sang pweida mwahu, irail me kin uhwong ih kin wia soahng koaros me re kak pwehn kauwe oh kasaroh ih, oh ni imwio, re kemehla ih oh wia met ni ahlo me uhdahn kamedek ong ih. Ahpw, ni kaimwiseklahn mehkoaros, Sises mahsanih ni eimah: “I kalowedier sampah.” (Sohn 16:33) E inenen kapwuriamwei dahme e wia!
3 Sapwellimen Sises tohnpadahk kan kin kasalehda soangen eimah oh ngoang nan doadoahk en kalohk duwehte Sises. Tohto en irail kin ale kalokolok, selidi nan imweteng, oh ekei pil kamakamla. Ahpw, re kin “perenkihda kowahlap duwen Koht eh ketin kupwure re en warohng lokolongki saroh pwehki mwaren Sises.” (Wiewia 5:41) Mendahki aramas tohto pahn lemeleme me re sohte kak pweida, re pweida mwahu nan doadoahk wet me inenen apwal iei doadoahk en kalohki Rongamwahu “lelohng ni irepen sampah.”—Wiewia 1:8; Kolose 1:23.
4 Iaduwen Kitail Kak Pweida Nan Atail Ahnsou: Kitail pil kin ngoangki wia doadoahk en kalohki Wehio mendahki e apwal. Mendahki ekei kin lelohng uhwong, de wehi kan kin keinapwih sounkalohk kan en dehr wia doadoahk en kalohk, de wia soahng kan pwe sounkalohk kan kin selidi nan imweteng de sohte lipilipil dahme re kin wia pwehn kauhdi doadoahk en kalohk, kitail kin pweida mwahu nan doadoahk en kalohk. Iaduwen met kak wiawi? “Siohwa me kin wia Kaun en karis en sounpei kan mahsanih: ‘Kaidehn sang ni kehlail en sounpei de ni pein omw kehlail, ahpw sang manaman en ngeni.’ ” (Sekaraia 4:6, New World Translation) Ma Siohwa kin uhpalihkin kitail, sohte me kak kauhdi de kauwehla atail doadoahk!—Rom 8:31.
5 Ahnsou me kitail kin kalohk, kitail sohte anahne namenek de masepwehk de pehm me kitail sohte itar. (2 Kor. 2:16, 17) Kitail ahneki kahrepe mwahu tohto en nantihong kalohkiseli Rongamwahu en Wehin Koht. Kitail kak wia dahme aramas lemeleme me kitail sohte kak, ihte ma Siohwa pahn uhpalihkin kitail!—Luk 18:27.